ଭୁବନେଶ୍ୱର,୨୬/୦୨: କେନ୍ଦ୍ରର  ବିଜେପି ଓ ରାଜ୍ୟର ବିଜେଡି ସରକାରର  ବିଫଳତା ବିରୋଧରେ ଅସନ୍ତୋଷ  ତେଜିବାରେ ଲାଗିଛି । ୨୪ ବର୍ଷ ଶାସନ  ପରେ ମଧ୍ୟ ରାଜ୍ୟର ମୌଳିକ ସମସ୍ୟା  ସମାଧାନ ହୋଇପାରିନି । ତେଣୁ ସୋମବାର  ୧୧ଟାରେ ରାଜ୍ୟ ସଚିବାଳୟ (ଲୋକସେବା  ଭବନ) ଘେରାଉ କରିବ କଂଗ୍ରେସ । ପିସିସି  ସଭାପତି ଶରତ ପଟ୍ଟନାୟକ ଏଭଳି  ଚେତାବନୀ ଦେଇଛନ୍ତି । ଏହି ଘେରାଉରେ  ହଜାର ହଜାର କଂଗ୍ରେସ କର୍ମୀ ଯୋଗ  ଦେବେ । ବିଶାଳ ଶୋଭାଯାତ୍ରାରେ କଂଗ୍ରେସ  ଭବନରୁ ବାହାରି ଲୋୟର୍‌ ପିଏମ୍‌ଜି ହୋଇ  ଲୋକସେବା ଭବନ ଅଭିମୁଖେ ଯିବ ବୋଲି  ଶ୍ରୀ ପଟ୍ଟନାୟକ କହିଛନ୍ତି । 

ପିସିସି ସଭାପତି  କହିଛନ୍ତି, ରାଜ୍ୟର ସବୁ ବ୍ଲକକୁ ଏ ପର୍ଯ୍ୟନ୍ତ  ଜଳସେଚନ ସୁବିଧା ମିଳିପାରିଲା ନାହିଁ ।  ଧାନର ଅଭାବୀ ବିକ୍ରି ସମସ୍ୟାର ସମାଧାନ  ହୋଇପାରୁନି । ଚାଷୀଙ୍କୁ ଧାନର ସର୍ବନିମ୍ନ  ସହାୟକ ମୂଲ୍ୟ ୨୯୩୦ ଟଙ୍କା ମିଳିପାରୁନି ।  ରାଜ୍ୟରେ ୧ଲକ୍ଷ କୋଟି ଟଙ୍କାର ଖଣି  ଦୁର୍ନୀତି, ୨୦ ହଜାର କୋଟି ଟଙ୍କାର  ଚିଟଫଣ୍ଡ ଦୁର୍ନୀତି, ପାନୀୟଜଳ ଯୋଗାଣରେ  ୩୩ ହଜାର କୋଟିର ଠିକା ଦୁର୍ନୀତି,  ବିଦ୍ୟୁତ୍‌ ସେବା ଭିତ୍ତିଭୂମି ଆଳରେ ୩୫  ହଜାର କୋଟି ଟଙ୍କାର ଦୁର୍ନୀତି ଅଭିଯୋଗ  ଆସିଉି । ଏସବୁ ଦୁର୍ନୀତି ପ୍ରତିବାଦରେ  ଆସନ୍ତାକାଲି ବ୍ୟାପକ ଆନ୍ଦୋଳନ ହେବ ।