କଟକ,୨୨/୦୨: ଗୋଟିଏ ହାତର ପାପୁଲି ହରାଇଛନ୍ତି । ଅନ୍ୟ ହାତଟିରେ ସୁନାରୁପା ଅଳଙ୍କାର ହେଉ କି ଘରକରଣା ସାମଗ୍ରୀ, ସବୁକିଛି ଅତି ନିଖୁଣତାର ସହ ତିଆରି କରୁଛନ୍ତି । ଏକ କାରିଗର ପରିବାରରୁ ଆସି ନିଜର ଦକ୍ଷତା ମାଧ୍ୟମରେ କଟକର ତାରକସିକୁ ଅନ୍ତର୍ଜାତୀୟ ସ୍ତରରେ ଚମକାଇଛନ୍ତି କଟକର ପଙ୍କଜ କୁମାର ସାହୁ(୫୩) । ପୂର୍ବରୁ ନିଜ କଳା ପାଇଁ ରାଷ୍ଟ୍ରପତି ପୁରସ୍କାର ପାଇଥିବା ପଙ୍କଜ ଫରିଦାବାଦର ସୁରଜକୁଣ୍ଡରେ ଆୟୋଜିତ ୩୭ ତମ ଅନ୍ତର୍ଜାତୀୟ କ୍ରାଫ୍ଟ ମେଳାରେ ‘କଳା ରତ୍ନ’ ସମ୍ମାନରେ ସମ୍ମାନିତ ହୋଇଛନ୍ତି ଯାହା ଏବେ କଟକ ସମେତ ରାଜ୍ୟ ପାଇଁ ଗୌରବର ବିଷୟ ପାଲଟିଛି ।
କଟକ ଷ୍ଟୋନୀ ରୋଡ୍ର ବାସିନ୍ଦା ପଙ୍କଜ । ତାଙ୍କ ପରିବାର ପିଢି ପରେ ପିଢି ଏହି ତାରକସି କାମ କରିଆସୁଛନ୍ତି । ଏବେ ସେ ନିଜେ ମାଷ୍ଟର୍ କ୍ରାଫ୍ଟ ମ୍ୟାନ୍ ଭାବେ ପରିଚିତ । ସେ ତାଙ୍କ ବାପା ସ୍ୱର୍ଗତଃ ଶ୍ୟାମସୁନ୍ଦର ସାହୁଙ୍କ ଠାରୁ କାମ ଶିଖି ଏବେ ନିଜେ ପିଲାଙ୍କୁ କାମ ଶିଖାଉଛନ୍ତି । ସେ ଏହି କାରିଗରୀ ପାଇଁ ୧୯୯୪ ମସିହାରେ ରାଷ୍ଟ୍ରପତିଙ୍କ ଠାରୁ ପୁରସ୍କୃତ ହୋଇଥିଲେ । ତେବେ ୨୦୦୦ ମସିହାରେ ଏକ ଦୁର୍ଘଟଣାରେ ସେ ବାମ ହାତର ପାପୁଲି ହରାଇଥିଲେ । ଏହାସତ୍ତେ୍ୱ ସେ ତାରକସିରୁ ନିଜକୁ ଦୂରେଇ ଦେଇ ନ ଥିଲେ । ଗୋଟିଏ ହାତରେ ସୁନ୍ଦର ତାରକସି ଅଳଙ୍କାର ତିଆରି କରିଥିଲେ ।
ଏହି କ୍ରମରେ କେନ୍ଦ୍ର ସରକାରଙ୍କ ବୟନ ଶିଳ୍ପ ମନ୍ତ୍ରଣାଳୟ ତତ୍ତ୍ୱାବଧାନରେ ହରିୟାନା ଫରିଦାବାଦର ସୁରଜକୁଣ୍ଡଠାରେ ଆୟୋଜିତ ଆର୍ନ୍ତଜାତୀକ କ୍ରାଫ୍ଟ ମେଳାରେ ପଙ୍କଜ ଅଂଶଗ୍ରହଣ କରିଥିଲେ । ସେଠାକୁ ସେ ରୂପା ତାରକସିର ଛତା ଆକୃତିର ପୂଜା ସାମଗ୍ରୀ କରି ନେଇଥିଲେ ଯାହା ମେଳାରେ ବେଶ ଆଦୃତ ହୋଇଥିଲା । ଯାହାଫଳରେ ହରିୟାନା ସରକାରଙ୍କ ପକ୍ଷରୁ ତାଙ୍କୁ କଳା ସମ୍ମାନରେ ସମ୍ମାନିତ କରାଯାଇଛି । ପଙ୍କଜ କହନ୍ତି, ‘ମୋତେ କାମରେ ମୋ ପୁଅ ମୋତି ରଞ୍ଜନ ସାହୁଙ୍କ ସମେତ କେତେକ କର୍ମଚାରୀ ସାହାଯ୍ୟ କରନ୍ତି । ସେମାନଙ୍କ ସହଯୋଗ ମୋର ଗୌରବ ବଢାଇଛି ।
