କୋଣାର୍କ, ୪।୯ : ଜଳବାୟୁ ପରିବର୍ତ୍ତନ ଯୋଗୁଁ ସାମୁଦ୍ରିକ ପ୍ରାଣୀ ଏବେ ସଙ୍କଟରେ। ସୋମବାର ଚନ୍ଦ୍ରଭାଗା ବେଳାଭୂମିରୁ ଏକ ବିରଳ ମୃତ ଡଲଫିନ ଉଦ୍ଧାର ହୋଇଛି। ଏହି ଡଲଫିନଟି ସମୁଦ୍ର ଲହଡୀରେ ଭାସିଆସି କୂଳରେ ଲାଗିଥିଲା। ସେତେବେଳକୁ ଏହି ଡଲଫିନର ମୃତ୍ୟୁ ହୋଇଯାଇଥିଲା।
ଖବର ପାଇ କୋଣାର୍କ ବନ୍ୟପ୍ରାଣୀ ବନାଞ୍ଚଳ କର୍ମଚାରୀ ଘଟଣାସ୍ଥଳରେ ପହଞ୍ଚି ଡଲଫିନକୁ ଜବତ କରି କୋଣାର୍କ ବନ୍ୟପ୍ରାଣୀ କାର୍ଯ୍ୟାଳୟକୁ ଆଣିଥିଲେ। ଡଲଫିନର ବ୍ୟବଚ୍ଛେଦ ପରେ କାର୍ଯ୍ୟାଳୟ ପରିସରରେ ପୋତି ଦିଆଯିବ ବୋଲି ବାଲୁଖଣ୍ଡ ବନାଞ୍ଚଳ କର୍ମଚାରୀ ସୂଚନା ଦେଇଛନ୍ତି। ଟ୍ରଲର ମାଡ଼ରେ ଡଲଫିନର ମୃତ୍ୟୁ ହୋଇଥିବା ଅନୁମାନ କରାଯାଉଛି। ସମୁଦ୍ରରେ ବେଆଇନ ଟ୍ରଲର ଚଳାଚଳ ଏମାନଙ୍କ ପାଇଁ କାଳ ସାଜିଛି।