ନୂଆଦିଲ୍ଲୀ,୧୨।୯: ଦେଶର ନୂତନ ସଂସଦ ଭବନ ତିଆରି ହୋଇଯାଇଛି। ଏବେ ନୂଆ ଭାରତର ଏହା ପ୍ରତୀକ ବୋଲି କୁହାଯାଉଛି। ଏହା ସହିତ ନିଷ୍ପତ୍ତି ମଧ୍ୟ ନିଆଯାଇଛି ଯେ, ନୂତନ ସଂସଦଭବନରେ ପ୍ରବେଶ ସହିତ ସେଠାରେ କାମ କରୁଥିବା କର୍ମଚାରୀଙ୍କ ଡ୍ରେସ ମଧ୍ୟ ବଦଳି ଯିବ। ନୂଆ ଡ୍ରେସ୍ ସମ୍ପୂର୍ଣ୍ଣ ଭାବରେ ଭାରତୀୟ ପାରମ୍ପରା ଅନୁସାରେ ହେବ। ମହିଳା କର୍ମଚାରୀଙ୍କୁ ନୂଆ ଡିଜାଇନ୍ ଶାଢୀ ପିନ୍ଧିବାକୁ ଦିଆଯିବ, ସେଭଳି ପୁରୁଷ କର୍ମଚାରୀଙ୍କ ପାଇଁ ମଧ୍ୟ ନୂଆ ଡ୍ରେସ୍ କୋଡ ଧାର୍ଯ୍ୟ କରାଯାଇଛି।
ସୁତ୍ରରୁ ମିଳିଥିବା ସୂଚନା ଅନୁସାରେ, ନୂଆ ସଂସଦ ଭବନରେ ମାର୍ଶଲ ସଫାରୀ ସୁଟ୍ ସ୍ଥାନରେ କ୍ରୀମ୍ ରଙ୍ଗର କୁର୍ତ୍ତା ଓ ପାଇଜାମା ପିନ୍ଧିବେ। ଅଧିକାରୀଙ୍କୁ କ୍ରୀମ୍ ରଙ୍ଗର ସାର୍ଟ ପିନ୍ଧିବାକୁ ହେବ, ଯାହା ଉପରେ ଗୋଲାପୀ ପଦ୍ମ ପୁଲର ପ୍ରିଣ୍ଟ ରହିବ। ଏହି କର୍ମଚାରୀଙ୍କ ସାର୍ଟ ଉପରେ ମେରୁନ୍ ସ୍ଲିଭଲେସ୍ ଜ୍ୟାକେଟ୍ ମଧ୍ୟ ପିନ୍ଧିବକୁ ହେବ। ତଳେ ଖାକି ରଙ୍ଗର ପତଲୁନ ରହିବ।
କର୍ମଚାରୀଙ୍କ ପରିଧାନ ଉପରେ ପଦ୍ମ ଫୁଲ ପ୍ରିଣ୍ଟକୁ ନେଇ ବିବାଦ ହୋଇପାରେ। କାରଣ ଏହା ଶାସକ ଭାରତୀୟ ଜନତା ପାର୍ଟିର ନିର୍ବାଚନ ଚିହ୍ନ। ତେବେ ବିକଳ୍ପ ଭାବରେ ଏହାକୁ ଭାରତୀୟ ପରମ୍ପରାର ପ୍ରତୀକ ବୋଲି କୁହାଯାଉଛି। ଏହି ଆଧାରରେ ଏହାକୁ ଜି-୨୦ର ଲୋଗୋରେ ମଧ୍ୟ ସାମିଲ କରାଯାଇଥିଲା। ତେବେ ସଂସଦର ସୁରକ୍ଷାରେ ମୁତୟନ ହେବାକୁ ଥିବା ଡ୍ୟୁଟି ଗାର୍ଡ(ପିଡିଜି) ନିଜ ୟୁନିଫର୍ମରେ ରହିବେ।
ଉଲ୍ଲେଖନୀୟ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୮ ମଇରେ ନୂତନ ସଂସଦ ଭବନର ଉଦଘାଟନ କରିଥିଲେ। ଏହି ସମୟରେ ନୂଆ ପରିଧାନ ପିନ୍ଧା ଯିବାର ଥିଲା,କିନ୍ତୁ କିଛି କାରଣ ପାଇଁ ଏଥିରେ ବିଳମ୍ବ ହୋଇଥିଲା।୧୮ ସେପ୍ଟେମ୍ବରରେ ସଂସଦର ବିଶେଷ ଅଧିବେଶନ ଡକାଯାଇଥିଲ। ଅଧିବେଶନ ପୁରୁଣା ଭବନରେ ଆରମ୍ଭ ହେବ, କିନ୍ତୁ ତା’ର ଆଗାମୀ ଦିନରୁ ସଂସଦୀୟ କାର୍ଯ୍ୟ ନୂତନ ସଂସଦ ଭବନରେ ଚାଲିବ।
