ଲକ୍ଷ୍ନୌ, ୦୮/୧୨: ବକେୟା ବିଦ୍ୟୁତ୍ ବିଲ୍ ଆଦାୟ ପାଇଁ ଯାଇଥିଲେ, ପୋଷା କୁକୁର ଗୋଡ଼େଇ ଗୋଡ଼େଇ କାମୁଡ଼ିଲା । ଏଭଳି ଘଟଣା ଦେଖିବାକୁ ମିଳିଛି ଉତ୍ତରପ୍ରଦେଶର ବୁଲନ୍ଦସହରରେ । ବିଦ୍ୟୁତ୍ ବିଲ୍ ମାଗିବାକୁ ଆସିଥିବା କର୍ମଚାରୀଙ୍କ ପଛରେ ମାଲିକ ପୋଷା କୁକୁରକୁ ଛାଡ଼ି ଦେଇଥିଲେ ।
କୁକୁର କାମୁଡ଼ାରେ ବିଦ୍ୟୁତ୍ ଜେଇଙ୍କ ସହ ଜଣେ କର୍ମଚାରୀ ଆହତ ହୋଇଛନ୍ତି । ଜେଇଙ୍କ ହାତ ଓ ଅନ୍ୟ କର୍ମଚାରୀଙ୍କ ଗୋଡ଼କୁ କାମୁଡ଼ି ଦେଇଛି କୁକୁର । ବିଦ୍ୟୁତ୍ ବିଭାଗ କର୍ମଚାରୀଙ୍କୁ ମାଲିକଙ୍କ ପୋଷା କୁକୁର କାମୁଡ଼ିଥିବା ବେଳେ ସେ କର୍ମଚାରୀଙ୍କ ସହ ମାଡ଼ପିଟ୍ କରିଥିବା ଜଣାପଡ଼ିଛି ।
ଘଟଣାରେ ବିଦ୍ୟୁତ୍ ବିଭାଗ ଜେଇ ଅଭିଯୁକ୍ତ ଘର ମାଲିକ, ତାଙ୍କ ପୁଅଙ୍କ ସହ ଅନ୍ୟ ଜଣେ ଅଜଣା ବ୍ୟକ୍ତିଙ୍କ ବିରୋଧରେ ଏତଲା ଦେଇଛନ୍ତି । ଆହତ ବିଦ୍ୟୁତ୍ କର୍ମଚାରୀଙ୍କୁ ମେଡିକାଲରେ ଚିକିତ୍ସା ଲାଗି ଭର୍ତ୍ତି କରାଯାଇଥିବା ସୂଚନା ଦେଇଛି ପୋଲିସ ।
ବୁଲନ୍ଦସହରର ଅମ୍ବା କଲୋନୀରେ ଏହି ଘଟଣା ଘଟିଛି । ଗୁରୁବାର ଜଣେ ଉପଭୋକ୍ତାଙ୍କ ଠାରୁ ବିଦ୍ୟୁତ୍ ଚୋରି ପାଇଁ ଜରିମାନା ଆଦାୟ କରିବାକୁ ଯାଇଥିଲେ ବିଭାଗର କର୍ମଚାରୀ । ଉପଭୋକ୍ତାଙ୍କ ଉପରେ ୩ ଲକ୍ଷ ୫୭ ହଜାର ଟଙ୍କା ବିଦ୍ୟୁତ୍ ବକେୟା ରହିଛି । ବିଦ୍ୟୁତ୍ କର୍ମଚାରୀ ବକେୟା ମାଗିବାରୁ ସେ ଦେବାକୁ ମନା କରିଥିଲେ । ଯାହାକୁ ନେଇ କଥା କଟାକଟି ହେବାରୁ ମାଲିକ କୁକୁର ଛାଡ଼ି ଦେଇଥିଲେ ।