ଏଲନ୍ ମସ୍କଙ୍କ ଟେସ୍ଲାର ବଡ଼ ନିଷ୍ପତ୍ତି, ସମଗ୍ର ବିଶ୍ବରେ ଚାକିରି ହରାଇବେ ୧୪ ହଜାର କାର୍ମଚାରୀ
![](https://odia.prameya.com/prameya/document/post/2/2_153_1713200511816.webp)
ଓ୍ବାଶିଂଟନ ଡିସି: ଲୋକପ୍ରିୟ ଇଲେକ୍ଟ୍ରିକ୍ ଭେଇକିଲ ନିର୍ମାତା କମ୍ପାନି ଟେସଲା ଛଟେଇ କରିବାକୁ ଯାଉଛି । ଟେସଲା ସିଇଓ ଏଲନ ମସ୍କ ଟେସ୍ଲାର ୧୦ ପ୍ରତିଶତ କର୍ମଚାରୀଙ୍କୁ ଛଟେଇ କରିବାକୁ ଘୋଷଣା କରିଛନ୍ତି । ଇଲେକ୍ଟ୍ରିକ୍ କାରର ଡିମାଣ୍ଡ କମୁଥିବା ନେଇ କାରଣ ଦର୍ଶାଇ କମ୍ପାନି ଏଭଳି ବଡ଼ ନିଷ୍ପତ୍ତି ଗ୍ରହଣ କରିଛି । ଚାକିରି ହରାଇବାକୁ ଥିବା କର୍ମଚାରୀଙ୍କୁ ଏଲନ ମସ୍କ ଇମେଲ୍ କରିଛନ୍ତି । ଗୋଟିଏ ଗୋଟିଏ ବିଭାଗରେ ଏକାଧିକ କର୍ମଚାରୀ କାର୍ଯ୍ୟ କରୁଛନ୍ତି । ସେହିଭଳି କେତେକ ସ୍ଥାନରେ କାର୍ଯ୍ୟ କରିବାର ଶୈଳୀରେ ପରିବର୍ତ୍ତନ ହେବାର ଆବଶ୍ୟକତା ରହିଛି ।
ଏଲନ ମସ୍କ କହିଛନ୍ତି ଯେ, ସମଗ୍ର ବିଶ୍ବରୁ ଟେସଲାର ୧୦ ପ୍ରତିଶତ କର୍ମଚାରୀଙ୍କୁ ଛଟେଇ କରିବାକୁ ନିଷ୍ପତ୍ତି ନେଇଛୁ । ସେ ଆହୁରି କହିଛନ୍ତି ଯେ,ଟେସଲା ନିଜର ସଫଳତା ଲାଗି ଆଗାମୀ ଫେଜରେ ପ୍ରବେଶ କରିବାକୁ ଯାଉଛି । ତେଣୁ କମ୍ପାନିର ଖର୍ଚ୍ଚ କାଟ କରିବା ସହ ଉତ୍ପାଦନ ବୃଦ୍ଧି କରିବା ଦରକାର । ବିଶ୍ଳେଷଣ କଲା ପରେ ଆମେ ଜାଣିବାକୁ ପାଇଲୁ କମ୍ପାନିର ୧୦ ପ୍ରତିଶତ କର୍ମଚାରୀଙ୍କୁ ଛଟେଇ କରିବାର ଆବଶ୍ୟକତା ରହିଛି । ଏମିତି ନିଷ୍ପତ୍ତି ନେବା ଲାଗି କଷ୍ଟ ହେଉଥିଲେ ବି ଏହା ଜରୁରି ବୋଲି ଏଲନ ମସ୍କ କହିଛନ୍ତି ।
ଗତବର୍ଷ ପର୍ଯ୍ୟନ୍ତ ଟେସଲାରେ ୧, ୪୦, ୪୭୩ କର୍ମଚାରୀ ଥିଲେ । ଆଉ ଏବେ ପ୍ରାୟ ୧୪ ହଜାର କର୍ମଚାରୀଙ୍କୁ ଛଟେଇ କରିବାକୁ ନିଷ୍ପତ୍ତି ନେଇସାରିଛି ଏଲନ ମସ୍କଙ୍କ ଟେସ୍ଲା । ସେପଟେ ଟେସଲା କାର ବିକ୍ରି କ୍ଷେତ୍ରରେ ବଡ଼ ହ୍ରାସ ପରିଲକ୍ଷିତ ହୋଇଛି । ୪ ବର୍ଷ ମଧ୍ୟରେ କୌଣସି ଏକ ତ୍ରୈମାସିକରେ ଟେସଲା କାର ବିକ୍ରି ଆଶାତୀତ ହ୍ରାସ ପାଇଛି । ଆଗକୁ ଆହୁରି କାର ବିକ୍ରି କମିବ ବୋଲି ଆଶଙ୍କା ପ୍ରକାଶ ପାଇଛି ।
ଗତ ଜାନୁଆରି ମାସରେ କମ୍ପାନିର ମୁଖ୍ୟ ଫାଇନାନ୍ସିଆଲ ଅଫିସର ବୈଭବ ତନେଜା କହିଥିଲେ ଯେ, ଆମକୁ ଗୋଟିଏ ଗୋଟିଏ ପଇସା ବଞ୍ଚାଇବା ଦରକାର । ଆମ ପାଖରେ ମଜଭୁତ ଟିମ୍ ରହିଛି, ଯିଏ ଏହି ଦିଗରେ କାର୍ଯ୍ୟ କରୁଛି । ବ୍ଲୁମବର୍ଗ ରିପୋର୍ଟ ଅନୁସାରେ, ଟେସଲା ୨୦୨୨ରେ ୧୦ ପ୍ରତିଶତ କର୍ମଚାରୀଙ୍କୁ ଛଟେଇ କରିଥିଲା ।