କଟକ,୦୯/୦୯: ଢୋଲ ଓ ଝୁମକା, ତା ସହିତ ଆକର୍ଷଣୀୟ ବାଜା । ଗୋଟିଏ ପରେ ଗୋଟିଏ ରିଦିମ୍ । ବାଜା ସାଙ୍ଗକୁ ଅନେକ କଳା କୌଶଳ । ସେହିଭଳି ତେଲୁଗୁ ଡ୍ୟାନ୍ସ ଗୀତ ସହ ଏକାଧିକ ଭାଷାର ଗୀତ । ମ୍ୟୁଜିକାଲ୍ ବ୍ୟାଣ୍ଡ୍ର ନିଆରା ଅନ୍ଦାଜ । ଏଭଳି କିଛି ଗୀତ ଓ ବାଜାରେ ଦୁଲୁକିବ ସହର । ସମସ୍ତେ ନାଚିବେ ଓ ଭରପୂର୍ ମନୋରଞ୍ଜନ କରିବେ । ଚଳିତ ବର୍ଷ କଟକ ସହରରେ ଗଣେଶ ପୂଜା ଭସାଣିରେ ସମସ୍ତଙ୍କୁ ଝୁମାଇବାକୁ ଆସୁଛି କେରଳର ଥାମ୍ବୋଲାମ୍ ଓ ଆନ୍ଧ୍ରାର ପ୍ରସିଦ୍ଧ ନାଇଡୁ ବ୍ୟାଣ୍ଡ୍ । ଯାହାକୁ କଟକର ଦୁଇଟି କ୍ଲବ୍ ପକ୍ଷରୁ ଅଣାଯାଉଥିଲାବେଳେ ଏହାର ଭରପୂର ମଜା ଉଠାଇବେ ସହରବାସୀ ।
ପୂଜା ପାର୍ବଣକୁ ବେଶ୍ ଜାକଜମକରେ ପାଳନ କରିବା ହେଉଛି କଟକିଆଙ୍କ ସୌକ । ଏଥିପାଇଁ ରାଜ୍ୟର କୋଣଅନୁକୋଣରେ କିଛି ପ୍ରସିଦ୍ଧ ବ୍ୟାଣ୍ଡ୍ କିମ୍ବା ସୋ ଆସିବା ମାତ୍ରେ ତାହା ପ୍ରଥମେ କଟକରେ ଦେଖିବାକୁ ମିଳିଥାଏ । ଏହିକ୍ରମରେ ତୁଳସୀପୁର ମଠ ସାହି ଅଞ୍ଚଳରେ ରହିଥିବା ଶ୍ରୀ ରାମ କ୍ଲବର ୨୫ ବର୍ଷ ପୂର୍ତ୍ତି ଉତ୍ସବ ପାଳନ କରାଯିବ । କ୍ଲବ ସଦସ୍ୟ ସଂଖ୍ୟା ୩୨ । ଚଳିତ ବର୍ଷ ପୂଜା ପାଇଁ ପାଖାପାଖି ୫ଲକ୍ଷ ୭୮ହଜାର ଖର୍ଚ୍ଚ କରିବାକୁ ଯୋଜନା ରହିଛି । ଏହାସହ କ୍ଲବ ପକ୍ଷରୁ ଚଳିତ ବର୍ଷ ମୁମ୍ବାଇ ଢାଞ୍ଚାରେ ମୂର୍ତ୍ତି ନିର୍ମାଣ କରୁଛନ୍ତି କାଠଗଡା ସାହି (କୁମ୍ଭାର ସାହି)ର ଉଦୀୟମାନ ଯୁବ କାରିଗର ସୁରଜ୍ ମୁଦୁଲି ।
ଏଥର ଭସାଣି ପାଇଁ ଓଡ଼ିଶାକୁ ପ୍ରଥମ ଥର ପାଇଁ କ୍ଲବ ପକ୍ଷରୁ କେରଳର ସୁପ୍ରସିଦ୍ଧ ଥାମ୍ବୋଲାମ ବାଦ୍ୟ ଏବଂ ଯାଜପୁରର ମା’ ମ୍ୟୁଜିକାଲ୍, ପୁରୀର ନାଗା ନାଚ, ପିପିଲି ଘୋଡ଼ା ନାଚ, ସମ୍ବଲପୁର ପ୍ରସିଦ୍ଧ ଘଣ୍ଟବାଦ୍ୟ, ପାଞ୍ଚା ସୁପରଷ୍ଟାର ସହ ଅନ୍ୟାନ୍ୟ ଆୟୋଜନ ହେବ । କ୍ଲବ ପକ୍ଷରୁ ମେଲଣରେ ସମସ୍ତଙ୍କୁ ଆକର୍ଷିତ କରିବ ବୋଲି ସଭାପତି ସଞ୍ଜୀବ ସାହୁ, ସମ୍ପାଦକ ସପନ ସାହୁ, କୋଷାଧ୍ୟାକ୍ଷ ଦୀପକ ସାହୁ ଓ ସଦସ୍ୟମାନେ କହିଛନ୍ତି ।
ସେହିଭଳି କଟକ ଅଲିଶାବଜାର ଗୋପାଳ ସାହି ସ୍ଥିତ ମା’ ସିଦ୍ଧବାସେଳି କ୍ଲବ୍ ପକ୍ଷରୁ ବେଶ ଜାକଜମକରେ ମଧ୍ୟ ଗଣେଶ ପୂଜା ପାଳନ କରାଯିବ । ଏଥର କ୍ଲବ ପକ୍ଷରୁ ଆନ୍ଧ୍ରପ୍ରଦେଶର ଲୋକପ୍ରିୟ ନାୟଡୁ ବ୍ୟାଣ୍ଡ୍ ଅଣାଯିବ । କେବଳ ବ୍ୟାଣ୍ଡ୍ ପାର୍ଟିଂ ପାଇଁ ଏକ ଲକ୍ଷ ୨୦ହଜାର ଟଙ୍କା ଖର୍ଚ୍ଚ କରାଯିବ । ଏହି ବ୍ୟାଣ୍ଡ୍ ଭସାଣିରେ ସମସ୍ତଙ୍କୁ ଭରପୂର ମନୋରଞ୍ଜନ କରିବ ବୋଲି ସଭାପତି ସୁବ୍ରତ କୁମାର ପରିଡା ଓ ସଂପାଦକ ପ୍ରଦ୍ୟୁମ୍ନ କୁମାର ବେହେରା ସୂଚନା ଦେଇଛନ୍ତି ।
