ନୂଆଦିଲ୍ଲୀ, ୦୨/୦୨: ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ପିଟିସନକୁ ଖାରଜ କରି ଦେଇଛନ୍ତି ସୁପ୍ରିମକୋର୍ଟ । ପ୍ରବର୍ତ୍ତନ ନିର୍ଦ୍ଦେଶାଳୟର ଗିରଫଦାରୀକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟଙ୍କ ହସ୍ତକ୍ଷେପ ପାଇଁ ଆବେଦନ କରିଥିଲେ ହେମନ୍ତ ସୋରେନ । ତେବେ ସର୍ବୋଚ୍ଚ ଅଦାଲତ ସୋରେନଙ୍କ ଆବେଦନକୁ ଖାରଜ କରି ଦେଇଛନ୍ତି ।
ଜମି ଦୁର୍ନୀତି ସହ ଜଡ଼ିତ ମନି ଲଣ୍ଡରିଂ ମାମଲାରେ ଗିରଫ ସୋରେନଙ୍କୁ ଶୁକ୍ରବାର ୫ ଦିନ ଲାଗି ହେପାଜତକୁ ନେଇଛି ଇଡି । ବୁଧବାର ବିଳମ୍ବିତ ରାତିରେ ଇଡି, ହେମନ୍ତ ସୋରେନଙ୍କୁ ଗିରଫ କରିଥିଲା । ଗୁରୁବାର ରାଞ୍ଚିର ପିଏମ୍ଏଲ୍ଏ କୋର୍ଟ ହେମନ୍ତ ସୋରେନଙ୍କୁ ଦିନକ ଲାଗି ବିଚାର ବିଭାଗୀୟ ହାଜତକୁ ପଠାଇଥିଲେ ।
ପ୍ରବର୍ତ୍ତନ ନିର୍ଦ୍ଦେଶାଳୟର ଅଭିଯୋଗ ଅନୁସାରେ, ୬୦୦ କୋଟିର ଜମି ଦୁର୍ନୀତି ଓ ମନି ଲଣ୍ଡରିଂ ମାମଲାରେ ହେମନ୍ତ ସୋରେନଙ୍କ ସମ୍ପୃକ୍ତି ରହିଛି । ମାମଲାରେ ଇଡି ସୋରେନଙ୍କୁ ୧୦ଥର ସମନ ଜାରି କରିଥିବା ବେଳେ ବୁଧବାର ୭ ଘଣ୍ଟାରୁ ଅଧିକ ସମୟ ଧରି ରାଞ୍ଚିସ୍ଥିତ ବାସଭବନରେ ଜେରା କରିଥିଲା । ବୁଧବାର ରାତିରେ ସୋରେନ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ସହ ଗିରଫ କରିଥିଲା ଇଡି ।
ଗିରଫଦାରୀ ପୂର୍ବରୁ ଜେଏମ୍ଏମ୍ ସଭାପତି ହେମନ୍ତ ସୋରେନ ଦଳର ନେତା ଚମ୍ପାଇ ସୋରେନଙ୍କୁ ଦଳର ବିଧାୟକ ନେତା ଭାବେ ଚୟନ କରିଥିଲେ । ଶୁକ୍ରବାର ଚମ୍ପାଇ ସୋରେନ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି ।