ଦୁବାଇ,୨୬/୦୧: ୨୦୨୩ ସିଜନ ପାଇଁ ଆଇସିସି ପୁରସ୍କାର ତାଲିକା ଘୋଷଣା ହୋଇଛି । ଟିମ୍ ଇଣ୍ଡିଆର ଷ୍ଟାର୍ ବ୍ୟାଟର ବିରାଟ କୋହଲି ଚତୁର୍ଥ ଥର ଆଇସିସିର ଶ୍ରେଷ୍ଠ ଦିନିକିଆ ଖେଳାଳି ଏବଂ ସୂର୍ଯ୍ୟକୁମାର ଯାଦବ ଶ୍ରେଷ୍ଠ ଟି-ଟ୍ୱେଣ୍ଟି ଖେଳାଳି ପୁରସ୍କାର ପାଇଛନ୍ତି । ପୂର୍ବରୁ କୋହଲି ୨୦୧୨, ୨୦୧୭, ୨୦୧୮ରେ ଏହି ପୁରସ୍କାର ପାଇଥିଲେ। ଅଷ୍ଟ୍ରେଲିଆ ଅଧିନାୟକ ପ୍ୟାଟ୍ କମିନ୍ସ ଶ୍ରେଷ୍ଠ ପୁରୁଷ ଏବଂ ଇଂଲଣ୍ଡର ନାଟ୍ ସ୍କିଭର-ବ୍ରଣ୍ଟ୍ ଶ୍ରେଷ୍ଠ ମହିଳା ଖେଳାଳି ପୁରସ୍କାର ପାଇଛନ୍ତି । ସେହିପରି ଆଇସିସି ଦିନିକିଆ ଏକାଦଶରେ ୬ଜଣ ଭାରତୀୟ ସ୍ଥାନ ପାଇଥିବାବେଳେ ରୋହିତ ଶର୍ମା ଅଧିନାୟକ ମନୋନୀତ ହୋଇଛନ୍ତି । ଟେଷ୍ଟ ଏକାଦଶରେ ରବୀନ୍ଦ୍ର ଜାଡ଼େଜା ଓ ରବିଚନ୍ଦ୍ରନ ଅଶ୍ୱିନଙ୍କୁ ସ୍ଥାନ ମିଳିଛି ।
କମିନ୍ସ ସାଥୀ ଖେଳାଳି ଟ୍ରେଭିସ୍ ହେଡ୍ଙ୍କ ସମେତ କୋହଲି ଓ ଜାଡ଼େଜାଙ୍କୁ ପଛରେ ପକାଇ ଶ୍ରେଷ୍ଠ ପୁରୁଷ ଖେଳାଳି ଭାବେ ସାର୍ ଗାରଫିଲ୍ଡ ସୋବର୍ସ ଟ୍ରଫି ହାତେଇବାରେ ସଫଳ ହୋଇଛନ୍ତି । ସେ ଅଷ୍ଟ୍ରେଲିଆକୁ ଡବ୍ଲ୍ୟୁଟିସି, ଦିନିକିଆ ବିଶ୍ୱକପ୍ ଚାମ୍ପିଅନ୍ କରାଇବାରେ ଅନ୍ୟତମ ଭୂମିକା ଗ୍ରହଣ କରିଥିଲେ ।
୨୦୨୩ ସିଜନରେ କୋହଲି ଦିନିକିଆରେ ମୋଟ ୧୩୭୭ ରନ୍ ସଂଗ୍ରହ କରିଥିଲେ । ଦିନିକିଆ ବିଶ୍ୱକପ୍ରେ ୭୬୫ ରନ୍ କରିବା ସହ ପ୍ଲେୟାର ଅଫ୍ ଦ ଟୁର୍ଣ୍ଣାମେଣ୍ଟ ବିବେଚିତ ହୋଇଥିଲେ । ଏହାଛଡ଼ା ବିଶ୍ୱର ପ୍ରଥମ ବ୍ୟାଟର ଭାବେ ଦିନିକିଆରେ ୫୦ ଶତକ ପୂରଣ କରିବାର ରେକର୍ଡ଼ ସ୍ଥାପନ କରିଥିଲେ ।
କୋହଲିଙ୍କର ଏହା ସପ୍ତମ ବ୍ୟକ୍ତିଗତ ଆଇସିସି ପୁରସ୍କାର ରହିଥିଲା । ପୂର୍ବରୁ ସେ ୨୦୧୭, ୨୦୧୮ରେ ଶ୍ରେଷ୍ଠ ଖେଳାଳି ଏବଂ ୨୦୧୮ରେ ଶ୍ରେଷ୍ଠ ଟେଷ୍ଟ ଖେଳାଳି ପୁରସ୍କାର ପାଇଥିଲେ । ସୂର୍ଯ୍ୟକୁମାର କ୍ରମାନ୍ୱୟରେ ଦ୍ୱିତୀୟ ଥର ଶ୍ରେଷ୍ଠ ଟି-ଟ୍ୱେଣ୍ଟି ଖେଳାଳି ପୁରସ୍କାର ଜିତିଛନ୍ତି । ୨୦୨୩ ସିଜନରେ ସେ ୧୭ଟି ମ୍ୟାଚ୍ ଖେଳି ୧୫୫.୯୫ ଆଭରେଜରେ ମୋଟ ୭୩୩ ରନ୍ ସଂଗ୍ରହ କରିଥିଲେ।