ନୂଆଦିଲ୍ଲୀ,୦୯/୧୨: ଟିମ୍ ଇଣ୍ଡିଆର ପୂର୍ବତନ ବ୍ୟାଟିଂ କୋଚ୍ ସଞ୍ଜୟ ବାଙ୍ଗର ଆଇପିଏଲ୍ ଦଳ ପଞ୍ଜାବ କିଙ୍ଗ୍ସର କ୍ରିକେଟ ବିକାଶ ମୁଖ୍ୟ ନିଯୁକ୍ତ ହୋଇଛନ୍ତି । ସେ ଦୀର୍ଘ ୭ ବର୍ଷ ପରେ ପଞ୍ଜାବ କିଙ୍ଗ୍ସକୁ ଫେରିଛନ୍ତି । ପୂର୍ବରୁ ବାଙ୍ଗର ୨୦୧୪ରୁ ୨୦୧୬ ପର୍ଯ୍ୟନ୍ତ ମୁଖ୍ୟ କୋଚ୍ ଦାୟିତ୍ୱ ସମ୍ଭାଳିଥିଲେ । ସେତେବେଳେ ଦଳର ନାମ କିଙ୍ଗ୍ସ ଏକାଦଶ ପଞ୍ଜାବ ଥିଲା । ତାଙ୍କ କାର୍ଯ୍ୟକାଳ ସମୟରେ ପଞ୍ଜାବ ୨୦୧୪ରେ ପ୍ରଥମ ଥର ଆଇପିଏଲ୍ ଫାଇନାଲରେ ପ୍ରବେଶ କରିଥିଲା ।
ଆସନ୍ତା୧୯ ତାରିଖରେ ଆଇପିଏଲ୍-୧୭ ପାଇଁ ଖେଳାଳି ନିଲାମୀ ଅନୁଷ୍ଠିତ ହେବ । ବାଙ୍ଗର ମୁଖ୍ୟ କୋଚ୍ ଟ୍ରେଭର ବେଲିସ୍ ଏବଂ ଫ୍ରାଞ୍ଚାଇଜ ମାଲିକଙ୍କ ସହ ମିଶି ଖେଳାଳି କ୍ରୟ କରିବେ । ସେ ଆଇପିଏଲ୍ର ଶେଷ ୩ଟି ସଂସ୍କରଣରେ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋରର ମୁଖ୍ୟ କୋଚ୍ ଦାୟିତ୍ୱରେ ରହିଥିଲେ। ତାଙ୍କ ଅଧିନରେ ରୟାଲ୍ ଚ୍ୟାଲେଞ୍ଜର୍ସ ୨୦୨୧ ଓ ୨୦୨୨ ସଂସ୍କରଣରେ ପ୍ଲେ-ଅଫ୍ରେ ପ୍ରବେଶ କରିଥିଲା ।
ସୂଚନାଯୋଗ୍ୟ, ବାଙ୍ଗର ୧୨ଟି ଟେଷ୍ଟ, ୫ଟି ଦିନିକିଆ ଖେଳିଥିବାବେଳେ ୧୬୫ଟି ପ୍ରଥମ ଶ୍ରେଣୀ ମ୍ୟାଚ୍ ଖେଳି ୮,୩୪୯ରନ୍ ଏବଂ ୩୦୦ ୱିକେଟ୍ ଅକ୍ତିଆର କରିଥିଲେ ।
