ଅହମଦାବାଦ, ୧୯/୧୧: ବିଶ୍ୱକପ୍ ଫାଇନାଲକୁ ନେଇ ଅନେକ ଭବିଷ୍ୟବାଣୀ କରୁଛନ୍ତି । ବିଶ୍ୱବ୍ୟାପୀ କ୍ରିକେଟ୍ ପ୍ରେମୀ ବିଶ୍ୱକପ୍ ୨୦୨୩କୁ ନେଇ କରୁଛନ୍ତି ପୂର୍ବାନୁମାନ । କିଏ ଜିତିବ ତାକୁ ନେଇ ବି ଆକଳନ କରୁଛନ୍ତି । ପାକିସ୍ତାନର ପୂର୍ବତନ କ୍ରିକେଟର୍ସ ମଧ୍ୟ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଆଜି ଖେଳାଯିବାକୁ ଥିବା ଫାଇନାଲ୍ ମୁକାବିଲାକୁ ନେଇ ଭବିଷ୍ୟବାଣୀ କରିଛନ୍ତି ।
ପାକିସ୍ତାନ ଟିମର ପୂର୍ବତନ ଖେଳାଳି ସ୍ପିନର୍ ସକଲୈନ୍ ମୁସ୍ତାକ, ଅଲରାଉଣ୍ଡର ସାହିଦ୍ ଆଫ୍ରିଦି ଓ ବ୍ୟାଟର ମୋହମ୍ମଦ ୟୁସୁଫ୍ ଫାଇନାଲ୍ ମୁକାବିଲାକୁ ନେଇ ନିଜ ନିଜ ମତ ରଖିଛନ୍ତି । ପାକିସ୍ତାନ ଟିଭି ଚ୍ୟାନେଲରେ ଏହି ୩ ପୂର୍ବତନ କ୍ରିକେଟର ସେମାନଙ୍କ ଆକଳନ କରିଛନ୍ତି ।
ବିଶ୍ୱକପ୍ ଫାଇନାଲ୍ ମ୍ୟାଚ୍କୁ ନେଇ ବେଟିଂ ଇଣ୍ଡଷ୍ଟ୍ରୀ ଚଳଚଞ୍ଚଳ, ଲାଗିଛି ୭୦,୦୦୦ କୋଟିର ବେଟିଂ
ପ୍ରଥମେ ମୋହମ୍ମଦ ୟୁସୁଫ୍ ଭାରତ ବିଶ୍ୱ ବିଜେତା ହେବ ବୋଲି କହିଛନ୍ତି । ଏହାପରେ ସକଲୈନ୍ ମୁସ୍ତାକ ଓ ସାହିଦ୍ ଆଫ୍ରିଦି ଅଷ୍ଟ୍ରିଲିଆ ବିଜୟୀ ହୋଇପାରେ ବୋଲି କହିଛନ୍ତି । ମୋହମ୍ମଦ ୟୁସୁଫ୍ କହିଛନ୍ତି, ଭାରତ ଯେଭଳି ଭାବେ ଖେଳୁଛି, ପ୍ରଥମରୁ ହିଁ ଚାମ୍ପିଅନ୍ ଲାଗୁଛି ।
ଭାରତ-ଅଷ୍ଟ୍ରେଲିଆ ମଧ୍ୟରେ ବିଶ୍ୱକପର ଫାଇନାଲ୍ ମ୍ୟାଚ୍ ଲକ୍ଷେ ୩୦ ହଜାର ଦର୍ଶକ କ୍ଷମତାବିଶିଷ୍ଟ ଅହମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଖେଳାଯିବ । ଦିନ ୨ଟାରୁ ଆରମ୍ଭ ହେବ ମ୍ୟାଚ୍ । ଦିନ ଗୋଟାଏ ୩୦ରେ ପଡ଼ିବ ଟସ୍ ।
ସୁପର ସଣ୍ଡେରେ ଫାଇନାଲ୍ ଫାଇଟ୍, ଅହମ୍ମଦାବାଦରେ ବିଶ୍ୱକପ୍ ଟ୍ରଫି ପାଇଁ ମୁହାଁମୁହିଁ ହେବେ ଭାରତ-ଅଷ୍ଟ୍ରେଲିଆ
ଟୁର୍ଣ୍ଣାମେଣ୍ଟ ଆରମ୍ଭରୁ ଏଯାବତ୍ ଭାରତ ଗୋଟିଏ ବି ମ୍ୟାଚ୍ ନ ହାରି ଫାଇନାଲରେ ପହଞ୍ଚିଛି । ଅନ୍ୟପଟେ ଅଷ୍ଟ୍ରେଲିଆ ୮ଟି ମ୍ୟାଚରେ ହାରି ନାହିଁ । ଯେତେବେଳେ କି ଭାରତ ୧୦ରୁ ୧୦ ମ୍ୟାଚ୍ ଜିତିଛି । ରୋହିତ ଶର୍ମାଙ୍କ ନେତୃତ୍ୱାଧିନ ଭାରତୀୟ ଦଳ ସେମି ଫାଇନାଲରେ ନ୍ୟୁଜିଲାଣ୍ଡକୁ ୭୦ ରନରେ ହରାଇଥିଲା । ଯେତେବେଳେ କି ଦକ୍ଷିଣ ଆଫ୍ରିକାକୁ ଅଷ୍ଟ୍ରେଲିଆ ୩ ୱିକେଟରେ ହରାଇ ଥିଲା ।
