ନୂଆଦିଲ୍ଲୀ: ଭାରତ ଏବଂ ଇଂଲଣ୍ଡ ମଧ୍ୟରେ ତୃତୀୟ ଟେଷ୍ଟ ମ୍ୟାଚ୍ ଫେବୃଆରୀ ୧୫ରୁ ଆରମ୍ଭ ହେବ । ରାଜକୋଟରେ ଦୁଇ ଟିମ୍ଙ୍କ ମଧ୍ୟରେ ଲଢ଼େଇ ଦେଖିବେ ଖେଳପ୍ରେମୀ । କିନ୍ତୁ ତୃତୀୟ ଟେଷ୍ଟ ପୂର୍ବରୁ ଭାରତୀୟ ଦଳକୁ ବଡ଼ ଝଟକା ଲାଗିଛି । ଟିମ୍ ଇଣ୍ଡିଆର ଓ୍ବିକେଟ କିପର ଏବଂ ବ୍ୟାଟର କେଏଲ ରାହୁଲ ତୃତୀୟ ଟେଷ୍ଟ ଖେଳିପାରିବ ନାହିଁ । ଏହା ପୂର୍ବରୁ ରାହୁଲ ଏବଂ ଜାଡେଜାଙ୍କ ଖେଳିବେ କି ନାହିଁ ସେମାନଙ୍କ ଫିଟନେସ ଉପରେ ନିର୍ଭର କରୁଛି ବୋଲି କୁହାଯାଇଥିଲା । ଆଉ ଏବେ ସ୍ପଷ୍ଟ ହୋଇଯାଇଛି ଯେ, କେଏଲ ରାହୁଲ ଖେଳିପାରିବେ ନାହିଁ ।
ଅନ୍ୟପଟେ ରବୀନ୍ଦ୍ର ଝାଡ଼େଜା ଫିଟ୍ ହୋଇଛନ୍ତି । ତାଙ୍କର ତୃତୀୟ ଟେଷ୍ଟ ଖେଳିବା ପ୍ରାୟତଃ ସ୍ପଷ୍ଟ। ବର୍ତ୍ତମାନ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ଶୃଙ୍ଖଳା ୧-୧ରେ ବରାବର ରହିଛି। ପ୍ରଥମ ମ୍ୟାଚକୁ ଇଂଲଣ୍ଡ ୨୮ ରନରେ ଜିତିଥିବା ବେଳେ ଦ୍ଵିତୀୟ ଟେଷ୍ଟରେ ଭାରତ ୧୦୬ ରନରେ ବିଜୟ ଲାଭ କରିଥିଲା। ଏବେ ତୃତୀୟ ଟେଷ୍ଟ ଦୁଇ ଦଳ ପାଇଁ ବେଶ ଗୁରୁତ୍ଵପୂର୍ଣ୍ଣ ହୋଇ ପଡ଼ିଛି।
ଗଣମାଧ୍ୟମ ରିପୋର୍ଟ ଅନୁଯାୟୀ, ତୃତୀୟ ଟେଷ୍ଟରେ କେଏଲ ରାହୁଲଙ୍କ ସ୍ଥାନରେ କର୍ଣ୍ଣାଟକର ବ୍ୟାଟର ଦେବଦତ୍ତ ପାଡିକଲଙ୍କ ଖେଳିବା ନିଶ୍ଚିତ ବୋଲି କୁହାଯାଉଛି । ଘରୋଇ କ୍ରିକେଟରେ ପାଡିକଲ ଚମତ୍କାର ଫର୍ମରେ ଅଛନ୍ତି । ତେଣୁ ରାଜକୋଟ ଟେଷ୍ଟରେ ତାଙ୍କୁ ଚୂଡ଼ାନ୍ତ ଏକାଦଶରେ ସୁଯୋଗ ମିଳିପାରେ ବୋଲି ଚର୍ଚ୍ଚା ହେଉଛି ।
