ଭୁବନେଶ୍ୱର,୧୮/୧୧: କ୍ରୀଡ଼ାର ଉନ୍ନତି ଦିଗରେ ରାଜ୍ୟ ସରକାର ମୁକ୍ତ ହସ୍ତରେ ପୁଞ୍ଜି ନିବେଶ କରି ଚାଲିଛନ୍ତି । ଫଳରେ ରାଜ୍ୟରେ ଗଢ଼ି ଉଠିଛି ଏକାଧିକ କ୍ରୀଡ଼ାରେ ଅତ୍ୟାଧୁନିକ କ୍ରୀଡ଼ା ଭିତ୍ତିଭୂମି, କ୍ରୀଡ଼ାବିତଙ୍କ ଉନ୍ନତି ପାଇଁ ଉଚ୍ଚ ପ୍ରଦର୍ଶନ କେନ୍ଦ୍ର ଏବଂ କ୍ରୀଡ଼ା ବିଜ୍ଞାନ କେନ୍ଦ୍ର । ଦେଶର ପ୍ରଥମ ଇନ୍ଡୋର ଆଥଲେଟିକ୍ସ ଷ୍ଟାଡିୟମ କଳିଙ୍ଗ ଷ୍ଟାଡିୟମରେ ନିର୍ମାଣ ଚାଲିଛି ଏବଂ ଏହାର କାର୍ଯ୍ୟ ଆସନ୍ତା ଡିସେମ୍ବର ମାସରେ ସଂପୂର୍ଣ୍ଣ ହୋଇ ଉଦ୍ଘାଟନ କରାଯିବାର କାର୍ଯ୍ୟକ୍ରମ ରହିଛି ବୋଲି ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ ପକ୍ଷରୁ ସୂଚନା ଦିଆଯାଇଛି ।
ପୂର୍ବରୁ ବିର୍ସା ମୁଣ୍ଡା ହକି ଷ୍ଟାଡିୟମ ଏବଂ କଳିଙ୍ଗ ସ୍ପୋର୍ଟ୍ସ କମ୍ପେ୍ଲକ୍ସ ବିଶ୍ୱ କ୍ରୀଡ଼ା ମାନଚିତ୍ରରେ ସ୍ୱତନ୍ତ୍ର ପରିଚିତି ଲାଭ କରିଛି । ଖୁବ ଶୀଘ୍ର କଳିଙ୍ଗ ଇନ୍ଡୋର ଆଥଲେଟିକ୍ସ ଷ୍ଟାଡିୟମ ମଧ୍ୟ ବିଶ୍ୱ କ୍ରୀଡ଼ା ମାନଚିତ୍ରରେ ଯୋଡ଼ି ହେବାକୁ ଯାଉଛି । ଦକ୍ଷିଣ ଏସିଆରେ ମଧ୍ୟ ଏହା ପ୍ରଥମ ଇନ୍ଡୋର ଷ୍ଟାଡିୟମ ହେବାକୁ ଯାଉଛି ।
ଷ୍ଟାଡିୟମ ୧୨୦ ମିଟର *୬୦ ମିଟର ପରିମିତ କ୍ଷେତ୍ରରେ ନିର୍ମାଣ ହୋଇଛି । ଇଟାଲୀର ମଣ୍ଡୋ ଏସ୍.ପି.ଏ କମ୍ପାନୀ ୧୦,୦୦୦ ସ୍କୟାର ମିଟରରେ ମଣ୍ଡୋ ଟ୍ରାକ୍ ବିଛାଇଛି । ଏହା ଦେଶର ପ୍ରଥମ ମଣ୍ଡୋ ଟ୍ରାକ୍ ବୋଲି କୁହାଯାଉଛି । ଷ୍ଟାଡିୟମର କାର୍ଯ୍ୟ ଏକ ପ୍ରକାର ଶେଷ ହୋଇଯାଇଛି । ନଭେମ୍ବର ଶେଷ ସପ୍ତାହରେ ମଣ୍ଡୋ ଏସ୍.ପି.ଏ କମ୍ପାନୀର ଅଫିସିଆଲମାନେ ଆସି ଟ୍ରାକ୍ ଉପରେ ମାର୍କିଂ କରିବା ଏବଂ ଡିସେମ୍ବର ପ୍ରଥମ ସପ୍ତାହରେ ବିଶ୍ୱ ଆଥଲେଟିକ୍ସ ମହାସଂଘର ଅଧିକାରୀମାନେ ଷ୍ଟାଡିୟମ ପରିଦର୍ଶନ କରିବାର କାର୍ଯ୍ୟକ୍ରମ ରହିଛି ।
ରାଜ୍ୟ କ୍ରୀଡ଼ା ବିଭାଗର ସଚିବ ଆର. ଭିନିଲ କ୍ରିଷ୍ଣା କହିଛନ୍ତି, ‘ଏହା ଦେଶର ପ୍ରଥମ ଇନ୍ଡୋର ଆଥଲେଟିକ୍ସ ଷ୍ଟାଡିୟମ । କାର୍ଯ୍ୟ ସଂପୂର୍ଣ୍ଣ ହୋଇଛି । ଅଳ୍ପ କିଛି କାମ ଚଳିତ ମାସ ଶେଷ ସୁଦ୍ଧା ଶେଷ ହୋଇଯିବ ।’ ଏହି ଷ୍ଟାଡିୟମ ସଂପୂର୍ଣ୍ଣ ଶୀତତାପ ନିୟନ୍ତ୍ରିତ । ୧୦୦ ମି, ୨୦୦ ମିଟର ଟ୍ରାକ୍ ସାଙ୍ଗକୁ ଲଙ୍ଗ ଜମ୍ପ, ଟ୍ରିପଲ ଜମ୍ପ, ପୋଲ ଭଲ୍ଟ ଓ ସଟ୍ ପୁଟ୍ ପାଇଁ ସୁବିଧା ରହିଛି । ମୁଖ୍ୟ ଟ୍ରାକ୍ ସହ ୧୧୦ ମିଟର ଅଭ୍ୟାସ ଟ୍ରାକ୍ ମଧ୍ୟ ନିର୍ମାଣ କରାଯାଇଛି । ଷ୍ଟାଡିୟମ ମଧ୍ୟରେ ରହିଛି ୬୦ଟି କୋଠରୀ । ପ୍ରତି କୋଠରୀରେ ୨ ଜଣ ଖେଳାଳି ରହିପାରିବେ । ଏଥିସହିତ ଜିମ୍ ଏବଂ ଅନ୍ୟାନ୍ୟ ବ୍ୟବସ୍ଥା ରଖାଯାଇଛି । ବର୍ଷ ସାରା ଏଠାରେ ଖେଳାଳିମାନେ ଅଭ୍ୟାସ କରିପାରିବେ । ୧୦୦ ଜଣ ଆଥଲେଟଙ୍କୁ ସେଠାରେ ରଖା ଯାଇ ପ୍ରବୀଣ ଓ ଦକ୍ଷ କୋଚଙ୍କ ଦ୍ୱାରା ପ୍ରଶିକ୍ଷଣ ପ୍ରଦାନ କରାଯିବାର ଯୋଜନା ରଖାଯାଇଛି ।
୧୨୦ କୋଟି ଟଙ୍କାରେ ଷ୍ଟାଡିୟମର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା । ୨୦୦୦ ଦର୍ଶକ ବସିଲା ଭଳି ଗ୍ୟାଲେରୀ ପ୍ରସ୍ତୁତ ହୋଇଛି । ପ୍ରେସ ବକ୍ସ ସାଙ୍ଗକୁ ପ୍ରସାରଣ ପାଇଁ ବିଶେଷ ସୁବିଧା କରାଯାଇଛି । କଳିଙ୍ଗ ଷ୍ଟାଡିୟମ ମଧ୍ୟରେ ଆଉ ଏକ ଗୁରୁତ୍ୱପୂର୍ଣ୍ଣ କେନ୍ଦ୍ର ହେଉଛି କ୍ରୀଡ଼ା ବିଜ୍ଞାନ କେନ୍ଦ୍ର । କ୍ରୀଡ଼ାବିତଙ୍କ ପ୍ରଦର୍ଶନରେ ଉନ୍ନତି ଓ ବିକାଶ ପାଇଁ ସବୁ ପ୍ରକାର ଅତ୍ୟାଧୁନିକ ଜ୍ଞାନକୌଶଳ ଯୁକ୍ତ ବୈଜ୍ଞାନିକ ଯନ୍ତ୍ରପାତି ଏହି କେନ୍ଦ୍ରରେ ରଖାଯାଇଛି । ଉଭୟ ପାରା ଓ ସାଧାରଣ କ୍ରୀଡ଼ାବିତଙ୍କ ପାଇଁ ସମସ୍ତ ସୁବିଧା ରହିଛି । ୟୁରୋପୀୟ ମାନର ସମସ୍ତ ସୁବିଧା ସୁଯୋଗ ଦେଶର ଗୋଟିଏ ସ୍ଥାନରେ କ୍ରୀଡ଼ାବିତଙ୍କୁ ମିଳିବା ହୁଏତ କଷ୍ଟକର । କିନ୍ତୁ ଓଡ଼ିଶା ସରକାର ଏ ବ୍ୟବସ୍ଥା ଆମ କ୍ରୀଡ଼ାବିତଙ୍କ ପାଇଁ ଯୋଗାଇ ଦେଇଛନ୍ତି ।
