ନୂଆଦିଲ୍ଲୀ, ୦୪/୦୧: ଇଟାଲିର କୁଖ୍ୟାତ ମାଫିଆ ବସ୍ ଫ୍ରାନ୍ସରୁ ଧରା ପଡ଼ିଛି । ଗତବର୍ଷ ଏହି ମୋଷ୍ଟ ୱାଣ୍ଟେଡ୍ ମାଫିଆ ଜେଲର ସବୁ ସୁରକ୍ଷା ଭେଦ କରି ବେଡ୍ ସିଟ୍ ସାହାଯ୍ୟରେ ଫେରାର୍ ହୋଇ ଯାଇଥିଲେ । ଏବେ ଫ୍ରାନ୍ସରୁ ଧରା ପଡ଼ିଛନ୍ତି । ଫ୍ରାନ୍ସ ଓ ଇଟାଲୀର ଅଧ୍ୟକ୍ଷ ଏକଥା ସ୍ପଷ୍ଟ କରିଛନ୍ତି ।

ରିପୋର୍ଟ ଅନୁସାରେ, ଇଟାଲିର କୁଖ୍ୟାତ ମାଫିଆ ମାର୍କୋ ରାଡୁନୋକୁ ଫେବ୍ରୁଆରୀ ୧ ସନ୍ଧ୍ୟାରେ ଗିରଫ କରାଯାଇଛି । ଏକ ରେଷ୍ଟୁରାଣ୍ଟରେ ମାଫିଆ ମାର୍କୋ ଜଣେ ମହିଳାଙ୍କ ସହ ସମୟ ବିତାଉଥିବା ବେଳେ ଧରାପଡ଼ିଛନ୍ତି ।

ଗତବର୍ଷ ମାଫିଆ ମାର୍କୋ ରାଡୁନୋ ନୁରୋ ସ୍ଥିତ ଜେଲରୁ ଖସି ପଳାଇଥିଲା । ଯାହାର ଭିଡିଓ ଏବେ ଭାଇରାଲ୍ ହେଉଛି । ଜେଲରୁ ଖସିଯିବା ଲାଗି ଏକ ବେଡ୍ ସିଟର ବ୍ୟବହାର କରିଥିଲା ମାର୍କୋ । ଛାତରୁ ବେଡ୍ ସିଟକୁ ତଳକୁ ପକାଇବା ପରେ ସେଥିରେ ତଳକୁ ଲମ୍ଫ ମାରିଥିଲା । ଆଉ ଏ ଦୃଶ୍ୟ ସିସିଟିଭି କ୍ୟାମେରାରେ ରେକର୍ଡ ହୋଇଥିଲା ।

କେବଳ ଇଟାଲି କାହିଁକି ୟୁରୋପର ମୋଷ୍ଟ ୱାଣ୍ଟେଡ୍ ଅପରାଧୀ ହେଉଛି ମାର୍କୋ । ଫଗିଆର ଗାର୍ଗନୋ ଗ୍ୟାଙ୍ଗର ମୁଖ୍ୟ ସେ । ମାର୍କୋକୁ ୨୪ ବର୍ଷ ଜେଲ୍ ଦଣ୍ଡାଦେଶ ହୋଇଛି । ମାର୍କୋର ଅନ୍ୟତମ ସହଯୋଗୀ ଗିଆନଲୁଇଗୁକୁ ଦକ୍ଷିଣ ସ୍ପେନରୁ ଗିରଫ କରାଯାଇଛି । ଏମାନେ ବେଆଇନ୍ ଅସ୍ତ୍ରଶସ୍ତ୍ର ରଖିବା ସହ ନିଶା କାରବାର ଏବଂ ଅନ୍ୟ ଅପରାଧରେ ସଂଶ୍ଲିଷ୍ଟ ।