ନୂଆଦିଲ୍ଲୀ ୨୨/୦୨: କେବଳ ଖାଦ୍ୟପେୟ ଓ ଫିଟ୍ନେସ୍ ଉପରେ ଧ୍ୟାନ ଦେଲେ, ଆମେ ଦୀର୍ଘାୟୁ ହୋଇପାରିବା ନାହିଁ । ଅଷ୍ଟ୍ରେଲିଆରେ ହୋଇଥିବା ଏକ ଅଧ୍ୟୟନ ଅନୁସାରେ, ଦୀର୍ଘାୟୁ ହେବା ପାଇଁ ଉପରୋକ୍ତ ଉପାୟ ପର୍ଯ୍ୟାପ୍ତ ନୁହେଁ । ୩ ଲକ୍ଷ ଲୋକଙ୍କ ଉପରେ ହୋଇଥିବା ଏକ ଚିକିତ୍ସକୀୟ ସମୀକ୍ଷାରୁ ଜଣାପଡ଼ିଛି, ଏକ ମଜଭୁତ ସାମାଜିକ ବନ୍ଧନରୁ ଦୀର୍ଘ ଜୀବନର ସମ୍ଭାବନା ୫୦ ପ୍ରତିଶତ ପର୍ଯ୍ୟନ୍ତ ବଢ଼ିଥାଏ । ଅଧିକ ସାଙ୍ଗସାଥୀ କରୁଥିବା ଲୋକଙ୍କ ବୟସ କମ୍ ସାଙ୍ଗ ଥିବା ଲୋକଙ୍କ ତୁଳନାରେ ହାରାହାରି ୭ ବର୍ଷ ଅଧିକ ଜଣାପଡ଼ିଛି ।
ଇପିଏସ୍ ପତ୍ରିକାରେ ପ୍ରକାଶିତ ଏକ ଅଧ୍ୟୟନ ଅନୁସାରେ, ନିବିଡ଼ ବନ୍ଧୁତା ସ୍ୱାସ୍ଥ୍ୟ ଉପରେ ୩୫ ଭିନ୍ନ ଭିନ୍ନ ଉପାୟରେ ସକାରାତ୍ମକ ପ୍ରଭାବ ପକାଏ । ମୋଟାମୋଟି କହିଲେ, ବନ୍ଧୁ ଥିଲେ ଦୀର୍ଘ ଜୀବନର ସମ୍ଭାବନା ବଢ଼ିବ । କିନ୍ତୁ ଯଦି ଆପଣଙ୍କ ପାଖରେ ସାଙ୍ଗ ନାହାନ୍ତି, ତେବେ ଶାରୀରିକ ଓ ମାନସିକ ସ୍ତରରେ ଆପଣଙ୍କର ବଡ଼ କ୍ଷତି ହୋଇଥାଏ । ଏହି କ୍ଷତି ଦିନକୁ ୧୫ ସିଗାରେଟ୍ ଟାଣିବା ସହ ସମାନ । ଅର୍ଥାତ୍ ଆପଣଙ୍କ ପାଖରେ ଯଦି ବନ୍ଧୁ ନାହାନ୍ତି, ତେବେ ଅଜାଣତରେ ଆପଣ ଚେନ୍ ସ୍ମୋକିଙ୍ଗ୍ କରୁଛନ୍ତି । ଅନ୍ୟପକ୍ଷେ, ଯେଉଁ ବ୍ୟକ୍ତିଙ୍କ ପାଖରେ ଏକାଧିକ ଘନିଷ୍ଠ ବନ୍ଧୁ ଅଛନ୍ତି, ସେ ଘରେ ବସି କିମ୍ବା କଥା ହୋଇ ୨-୪ କିମି ଚାଲିବାର ସୁଫଳ ପାଇଥାନ୍ତି ।
୭୦ ବର୍ଷ ବୟସର ୧୫୦୦ ଲୋକଙ୍କ ଉପରେ ୧୦ ବର୍ଷ ପର୍ଯ୍ୟନ୍ତ ଏହି ଅଧ୍ୟୟନ କରାଯାଇଥିଲା । ଏହି ସମୟରେ ସେମାନଙ୍କ ସ୍ୱାସ୍ଥ୍ୟ, ବନ୍ଧୁଙ୍କ ସଂଖ୍ୟା ଓ ସେମାନଙ୍କ ସହ ମିଶିବାର ସମୟ, ପରିବାର ସ୍ଥିତି ସମ୍ପର୍କିତ ତଥ୍ୟ ସଂଗ୍ରହ କରାଯାଇଥିଲା । ଏଥିରୁ ଜଣାପଡ଼ିଲା, ଯଦି ବ୍ୟକ୍ତିଙ୍କ ପାଖରେ ମନ କଥା ବୁଝିପାରୁଥିବା ଜଣେ ଭଲ ବନ୍ଧୁ ଅଛନ୍ତି, ତେବେ ରୋଗ, କମ୍ ଅର୍ଥ, ପାରିବାରିକ ସମସ୍ୟା ଥାଇ ବି ତାଙ୍କ ଜୀବନକାଳ ବଢ଼େ । ଘରେ ଅଧିକ ସଦସ୍ୟ ଥିଲେ ଦୀର୍ଘାୟୁ ହେବାର ସମ୍ଭାବନା ବଢ଼େ । କିନ୍ତୁ ବନ୍ଧୁଙ୍କ ଭଳି ଏହା ସେତିକି ପ୍ରଭାବଶାଳୀ ନୁହେଁ ବୋଲି ଅଧ୍ୟୟନରୁ ଜଣାପଡ଼ିଲା । କିନ୍ତୁ ଅଧ୍ୟୟନର ଫଳାଫଳକୁ ଜାଣି ଆପଣ ବନ୍ଧୁ ତାଲିକାରେ ସୋସିଆଲ ମିଡିଆ ଫ୍ରେଣ୍ଡ୍ଙ୍କୁ ସାମିଲ କରନ୍ତୁ ନାହିଁ । କାରଣ ଏ ପ୍ରକାର ବନ୍ଧୁ ବୟସ ବଢ଼ାଇବାରେ କୌଣସି ସାହାଯ୍ୟ କରିପାରିବେ ନାହିଁ । ଏଥିପାଇଁ ଘନିଷ୍ଠ ବନ୍ଧୁ ଆବଶ୍ୟକ ବୋଲି ଅଧ୍ୟୟନକର୍ତ୍ତା କହିଛନ୍ତି ।
