କୋଲକାତା: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ବେଙ୍ଗଲର ନୂଆ ବ୍ରାଣ୍ଡ ଆମ୍ବାସଡର ଭାବେ ସୌରଭ ଗଙ୍ଗୋପାଧ୍ୟାୟ ଓରଫ ସୌରଭ ଗାଙ୍ଗୁଲିଙ୍କ ନାମ ଘୋଷଣା କରିଛନ୍ତି । ପଶ୍ଚିମବଙ୍ଗରେ ଆୟୋଜିତ ବେଙ୍ଗଲ ଗ୍ଲୋବାଲ ବିଜନେସ୍‌ ସମିଟ-୨୦୨୩ରେ ପୂର୍ବତନ କ୍ରିକେଟର ଏବଂ ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲିଙ୍କୁ ରାଜ୍ୟର ବ୍ରାଣ୍ଡ ଆମ୍ବାସଡର ବୋଲି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମମତା । 

ନ୍ୟୁଜ ଏଜେନ୍ସି ଏଏନଆଇରେ ସେୟାର ହୋଇଥିବା ଏକ ଭିଡିଓ ଅନୁସାରେ, ରାଜ୍ୟର ବ୍ରାଣ୍ଡ ଆମ୍ବାସଡର ଭାବେ ଗାଙ୍ଗୁଲିଙ୍କ ନାଁ ଘୋଷଣା କରିବା ସହ ତାଙ୍କ ଲୋକପ୍ରିୟତା ବଖାଣିଥିଲେ ମମତା । ଏହା ସହ ଗାଙ୍ଗୁଲି ଯୁବପିଢ଼ିଙ୍କ ପ୍ରେରଣା ବୋଲି କହିଥିଲେ । ବେଙ୍ଗଲ ଗ୍ଲୋବାଲ ବିଜନେସ୍‌ ସମିଟ୍‌ ଏକ ବାର୍ଷିକ କାର୍ଯ୍ୟକ୍ରମ ହୋଇଥିବା ବେଳେ ପ୍ରାୟ ୧୭ଟି ଦେଶରୁ ଶତାଧିକ କମ୍ପାନି ଯୋଗ ଦେଇଥାନ୍ତି । ବ୍ରିଟେନ, ଆମେରିକା, ଅଷ୍ଟ୍ରେଲିଆ, ଜାପାନ, କୋରିଆ, ଜର୍ମାନୀ ଏବଂ ଫ୍ରାନ୍ସ ଭଳି ଦେଶରୁ ବହୁ କମ୍ପାନି ଏହି ଦୁଇ ଦିବସୀୟ ସମ୍ମିଳନୀରେ ଯୋଗ ଦେଇଥାନ୍ତି । 

ଗ୍ଲୋବାଲ ବିଜନେସ ସମିଟ୍‌-୨୦୨୩ ର ଉଦଘାଟନ ସହ ମମତା ବାନାର୍ଜୀ ରାଜ୍ୟର ବିଭିନ୍ନ ବିକାଶ ମଡେଲର ପେଡି ଖୋଲିଥିଲେ । ଏହା ଦ୍ବାରା ରାଜ୍ୟର ରପ୍ତାନୀ ବୃଦ୍ଧି କରାଇବା ସହ ନିର୍ମାଣ କ୍ଷେତ୍ରରେ ବେଙ୍ଗଲ କିଭଳି ଅଗ୍ରଗତି କରିପାରିବ ସେନେଇ ବୁଝାଇବାକୁ ଚେଷ୍ଟା କରିଥିଲେ ସିଏମ ମମତା । ଏହା ବ୍ୟତୀତ ବାୟୋ-ଫୁଏଲ ଦିଗରେ ଆଗକୁ ବଢ଼ିବା ସହ ଦିଘାରୁ ପୂର୍ବ ଭାରତ ପର୍ଯ୍ୟନ୍ତ ସମୁଦ୍ର ତଳେ କେବୁଲ ବିଛାଇ ଇଣ୍ଟରନେଟ ସଂଯୋଗୀକରଣ ଉପରେ ଗରୁତ୍ବାରୋପ କରିଥିଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ।