ଭୁବନେଶ୍ବର, ୨୯/୧ : ଓଡ଼ିଶା କଳାକାର ମହାସଂଘର କଳାକାରମାନେ ସୋମବାର ବହୁ ସଂଖ୍ୟାରେ ଅନୁଷ୍ଠାନିକ ଭାବେ ବିଜେଡିରେ ଯୋଗ ଦେଇଛନ୍ତି । ଦୈତାରୀ ପଣ୍ଡା, ସମରେନ୍ଦ୍ର ବା ବାପି ପଣ୍ଡା, ଚୈତନ୍ୟ ପାଇକ, ରମେଶ ନାୟକ, ସୁବାସ ବେହେରା, ଶିବରାମ ପ୍ରଧାନ ପ୍ରମୁଖ କଳାକାରମାନେ ବିଜେଡିରେ ଯୋଗଦେଇଛନ୍ତି । ପ୍ରାୟ ୨୯ବିଶିଷ୍ଟ କଳାକାର ଆଜି ବିଦ୍ଧିବଦ୍ଧ ଭାବେ ଯୋଗ ଦେଇଛନ୍ତି । 

ସେମାନେ ୩୦ଜିଲ୍ଲାରୁ ଆସି ଯୋଗଦେଇଛନ୍ତି । ସେମାନଙ୍କ ସହ ୩୦୦ରୁ ଅଧିକ କଳାକାର ମିଶିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିକାଶ ଧାରାରେ ଆକୃଷ୍ଟ ହୋଇ ବିଜେଡିରେ ଯୋଗ ଦେବାକୁ ସେମାନେ ଆବେଦନ କରିଥିଲେ । ଆଜି ମୁଖ୍ୟମନ୍ତ୍ରୀ ଏହାକୁ ଅନୁମୋଦନ ଦେଇଛନ୍ତି । ବିଜେଡିରେ ଯୋଗଦେବା ପରେ ଦୈତାରୀ ପଣ୍ଡା ପ୍ରତିକ୍ରିୟା ରଖି କହିଛନ୍ତି କି, ଏହା ଆମ ପାଇଁ ନୂଆ ପର୍ବ, ନୂଆ ଅଭିନୟ । ଜଗନ୍ନାଥ ଲୀଳାଙ୍କ ପରି ଏହା ଓଡ଼ିଶାରେ ମୁଖ୍ୟମନ୍ତ୍ରୀଙ୍କ ଲୀଳା । ସ୍କୁଲ କଲେଜ ସବୁଠି କଳାର ମାଟି ଓଡ଼ିଶା । ସମସ୍ତଙ୍କୁ ଉଚ୍ଚସ୍ତରକୁ ନେବାକୁ ନବୀନ ପଟ୍ଟନାୟକ ପ୍ରୟାସ କରିଛନ୍ତି । 

ସୂଚନାଯୋଗ୍ୟ ଯେ, ଆଗକୁ ସାଧାରଣ ନିର୍ବାଚନ । ଏହା ପୂର୍ବରୁ ସବୁ ରାଜନୈତିକ ଦଳ ନିଜ ନିଜର ବ୍ଲୁ ପ୍ରିଣ୍ଟ ପ୍ରସ୍ତୁତ କରୁଛନ୍ତି । ଏହିକ୍ରମରେ ଭୋଟରଙ୍କୁ ଆକୃଷ୍ଟ କରିବାକୁ ସବୁ ଦଳ ନିଜ ନିଜ ପ୍ରୟାସ ଆରମ୍ଭ କରି ଦେଇଛନ୍ତି । ଯାତ୍ରା ଜଗତରେ ଦୈତାରୀ ପଣ୍ଡାଙ୍କ ବେଶ ପ୍ରଭାବ ରହିଛି । ମଞ୍ଚ ଉପରେ ତାଙ୍କର ଡାଇଲଗ୍ ଡେଲିଭରିକୁ ଲୋକେ ପସନ୍ଦ କରିଥାନ୍ତି । ଛୋଟଠାରୁ ବଡ଼ ତାଙ୍କର ନିଆରା ଅଭିନୟ ପାଇଁ ତାଙ୍କୁ ପସନ୍ଦ କରିଥାନ୍ତି । କୁହାଯାଉଛି କି ତାଙ୍କର ବିଜେଡିରେ ଯୋଗଦେବା ଏକ ପ୍ରକାର ଭୋଟରଙ୍କୁ ଆକୃଷ୍ଟ କରିବ ନିଶ୍ଚିତ ।