ନୂଆଦିଲ୍ଲୀ: ଭାରତୀୟ କ୍ରିକେଟର ଏବଂ କର୍ଣ୍ଣାଟକ ରଣଜୀ ଟିମ୍ର ଅଧିନାୟକ ମୟଙ୍କ ଅଗ୍ରଓ୍ବାଲଙ୍କ ସ୍ବାସ୍ଥ୍ୟବସ୍ଥା ଗୁରୁତର । ତାଙ୍କୁ ହସ୍ପିଟାଲର ଇଣ୍ଟେସିଭ୍ କେୟାର ୟୁନିଟ୍ (ଆଇସିୟୁ)ରେ ଭର୍ତ୍ତି କରାଯାଇଛି । ବିମାନରେ ଥିବା ବେଳେ ମୟଙ୍କଙ୍କ ସ୍ବାସ୍ଥ୍ୟବସ୍ଥା ବିଗିଡ଼ିଥିଲା । ତାଙ୍କୁ ତୁରନ୍ତ ଅଗରତାଲାର ଆଇଏଲଏସ୍ ହସ୍ପିଟାଲରେ ଭର୍ତ୍ତି କରାଯାଇଥିଲା । ଏବେ ସେ ଆଇସିୟୁରେ ଅଛନ୍ତି । ସୁରଟରୁ ଅଗରତାଲା ଅଭିମୁଖେ ଉଡ଼ାଣ ଭରିବାକୁ ଥିବା ବିମାନରେ ମୟଙ୍କ ଅସୁସ୍ଥ ହୋଇପଡ଼ିଥିଲେ । ବିମାନରେ ମୟଙ୍କ ମୁହଁ ଏବଂ ଗଳାରେ ଜ୍ବଳନ ଅନୁଭବ କରିବା ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ବୋଲି କର୍ଣ୍ଣାଟକ କ୍ରିକେଟ ଆସୋସିଏସନ ପକ୍ଷରୁ ସୂଚନା ଦିଆଯାଇଛି ।
କର୍ଣ୍ଣାଟକ ଟିମ୍ର ଅଧିନାୟକ ମୟଙ୍କ ଅଗ୍ରଓ୍ବାଲ ରଣଜୀ ଟ୍ରଫିରେ ଦମଦାର ପ୍ରଦର୍ଶନ କରିଛନ୍ତି । ଗୁଜରାଟ ବିପକ୍ଷରେ ଖେଳାଯାଇଥିବା ମ୍ୟାଚ୍ରେ ମୟଙ୍କ ୧୦୯୦ ରନ୍ ପାଳି ଖେଳିଥିଲେ । ଗୋଆ ବିପକ୍ଷରେ ମୟଙ୍କ ଅଗ୍ରଓ୍ବାଲ ୧୧୪ ରନ୍ କରିଥିଲେ । ଏହା ପରେ ତ୍ରିପୁରା ଏବଂ କର୍ଣ୍ଣାଟକ ମୁକାବିଲାରେ ସେ ଅର୍ଦ୍ଧଶତକୀୟ ପାଳି ଖେଳିଥିଲେ । ସେହିଭଳି ଟିମ୍ ଇଣ୍ଡିଆ ଲାଗି ବିଶେଷ କରି ଟେଷ୍ଟ ମ୍ୟାଚ୍ ଖେଳୁଥିବା ମୟଙ୍କ ଏବେ ଦଳରେ ସାମିଲ ନାହାନ୍ତି ।
ସେ ଭାରତ ପାଇଁ ୨୦୨୨ ମାର୍ଚ୍ଚରେ ଶେଷ ଥର ପାଇଁ ଖେଳିଥିଲେ । ଏହା ପରଠାରୁ ସେ ଭାରତୀୟ ଟିମ୍ରେ ସ୍ଥାନ ପାଇନାହାନ୍ତି । ମୟଙ୍କ ଏବେ ସୁଦ୍ଧା ଭାରତ ପାଇଁ ୨୧ଟି ଟେଷ୍ଟ ଏବଂ ୫ଟି ଦିନିକିଆ ମୁକାବିଲା ଖେଳିସାରିଛନ୍ତି । ଟେଷ୍ଟରେ ୩୬ଟି ପାଳିରୁ ସେ ୪୧.୩୩ ହାରାହାରି ସହ ୧୪୮୮ ରନ୍ କରିଛନ୍ତି । ଏହି ସବୁ ମ୍ୟାଚ୍ରେ ସେ ୪ଟି ଶତକ ଏବଂ ୬ଟି ଅର୍ଦ୍ଧଶତକ କରିଛନ୍ତି । ମୟଙ୍କ ଟେଷ୍ଟ ମ୍ୟାଚ୍ରେ ସର୍ବାଧିକ ୨୪୩ ରନ୍ କରିଛନ୍ତି । ସେହିଭଳି ଦିନିକିଆରେ ମୟଙ୍କ ଅଗ୍ରଓ୍ବାଲ କେବଳ ୮୬ ରନ୍ କରିଛନ୍ତି । ତେବେ ମୟଙ୍କ ଅଗ୍ରଓ୍ବାଲ ୨୦୧୮ ଡିସେମ୍ବର ମାସରେ ଅନ୍ତର୍ଜାତୀୟ କ୍ରିକେଟରେ ଡେବ୍ୟୁ କରିଥିଲେ ।
Also Read :-
ନ୍ୟୁଜିଲାଣ୍ଡକୁ ୨୧୪ ରନ୍ରେ ହରାଇଲା ଭାରତ, ଦ୍ୱିତୀୟ ଶତକ ସହ ୨ ୱିକେଟ୍