ପ୍ରମୁଖ ଖବର
  • ଭୁବନେଶ୍ବର : ରାଜ୍ୟର ଉର୍ଦ୍ଦୁ ଶିକ୍ଷକଙ୍କ ମାସିକ ପାରିଶ୍ରମିକ ୭,୪୦୦ ରୁ ୧୫,୦୦୦ ଟଙ୍କାକୁ ବୃଦ୍ଧି
  • ||
  • ଭଦ୍ରକ : ସାଲାଇନ ନଦେବାରୁ ଫାର୍ମାସିଷ୍ଟଙ୍କୁ ନିସ୍ତୁକ ମାଡ଼, ଜଣେ ଅଟକ
  • ||
  • ବଲାଙ୍ଗୀର : ଭିଜିଲାନ୍ସ ଜାଲରେ ଆଗଲପୁର ଅମିନ, ଲାଞ୍ଚ ନେବା ବେଳେ ଧରାପଡ଼ିଲେ
  • ||
  • ଦ୍ୱାରାଶୁଣି ଘାଟିରେ ଖସିଲା ପିଆଜ ବୋଝଇ ଟ୍ରକ,ଅଳ୍ପକେ ବର୍ତ୍ତିଲେ ଡ୍ରାଇଭର
  • ||
  • କଟକ: ଶେଷ ହେଲା ଚଳିତ ବର୍ଷର ମାଟ୍ରିକ୍ ପରୀକ୍ଷା, ଏବେ ରେଜଲ୍ଟକୁ ଅପେକ୍ଷା
  • ||
  • ବିଜେପିରେ ମିଶିଲେ ପୂର୍ବତନ ବିଧାୟକ ନବୀନ, ଓ ଶତାଧିକ ବିଜେଡି ଓ କଂଗ୍ରେସ କର୍ମୀ
  • ||
  • କଟକ-ବାରବାଟୀ ନିର୍ବାଚନୀ ଅନିୟମିତତା ମାମଲା, ମହମ୍ମଦ ମୋକିମଙ୍କ ନିର୍ବାଚନକୁ ଅସିଦ୍ଧ ଘୋଷଣା କଲେ ହାଇକୋର୍ଟ
  • ||
  • ଯାନ୍ତ୍ରିକ ତ୍ରୁଟି ଯୋଗୁଁ ଚିଲିକାରେ ପୁଣି ଫସିଲା ଯାତ୍ରୀବାହୀ ଡଙ୍ଗା, ଦୀର୍ଘ ଏକଘଣ୍ଟା ପରେ ଉଦ୍ଧାର ହେଲେ ୩୦ ଯାତ୍ରୀ
  • ||
  • ମଙ୍ଗଳବାର ଓଡ଼ିଶା ଆସିବେ ପ୍ରଧାନମନ୍ତ୍ରୀ, ରାଜ୍ୟବାସୀଙ୍କୁ ଦେବେ ୧୯,୬୦୦ କୋଟିର ପ୍ରକଳ୍ପ ଭେଟି
  • ||
  • ପୁଲିସକୁ ଢେଲାମାରି ହତ୍ୟା ଉଦ୍ୟମ ଅଭିଯୋଗ: ଦୁର୍ଦ୍ଦାନ୍ତ ପାକା ଗିରଫ, ଭାଇ ଫେରାର
  • ||
  • ଆଜି ସରିବ ମାଟ୍ରିକ୍‌ ପରୀକ୍ଷା: ଭାଇରାଲ୍‌ ଓ ଲିକ୍‌ ଗୁଜବର ଘଟୁନି ଅନ୍ତ, କ୍ରାଇମ୍‌ବ୍ରାଞ୍ଚ୍‌ରେ ବୋର୍ଡ ଏତଲାର ଫଳ ଶୂନ୍ୟ
  • ||
  • WPL-2024: ଦିଲ୍ଲୀ କ୍ୟାପିଟାଲ୍ସର ଦମଦାର ପ୍ରଦର୍ଶନ, ଗୁଜରାଟକୁ ୨୫ରନ୍‌ରେ ହରାଇଲା
  • ||
  • କଳାହାଣ୍ଡିରେ ଇନ୍ଦ୍ରାବତୀ ଦକ୍ଷିଣ କେନାଲରେ ୨୦ ଫୁଟ୍‌ର ଘାଇ, ଦେପୁରରେ କୃତ୍ରିମ ବନ୍ୟା
  • ||
  • ରାଜ୍ୟରେ ବଦଳିବ ପାଣିପାଗ ମିଜାଜ: ଆଜିଠୁ କମିବ ତାତି, ୭ ଜିଲ୍ଲାରେ ବର୍ଷା ସମ୍ଭାବନା
  • ||

ନେତା ଦୌଡ଼ରେ ଅଫିସର୍: ବହୁ ଆଇଏଏସ୍‌, ଓଏଏସ୍‌ ଓ ପୁଲିସ ଟିକଟ ଆଶାୟୀ, ସିଗନାଲକୁ ଅପେକ୍ଷା

ଭୁବନେଶ୍ୱର,୦୨/୧୨: ବିଜେଡିରେ ଭି.କେ.ପାଣ୍ଡିଆନ ।  କଂଗ୍ରେସରେ ବିଜୟ ପଟ୍ଟନାୟକ ।  ବିଜେପିରେ ଅପରାଜିତା ଷଡ଼ଙ୍ଗୀ । ଏହି ତିନି ପୂର୍ବତନ ଆଇଏଏସ୍‌ ଅଧିକାରୀ  ଏକଦା ରାଜ୍ୟ ପ୍ରଶାସନର ଚର୍ଚ୍ଚିତ ଦକ୍ଷ ଅଧିକାରୀ ଭାବେ ପରିଚିତ ଥିଲେ । ଏଥିରୁ ସ୍ପଷ୍ଟ-ରାଜନୈତିକ କ୍ୟାରିୟର ପ୍ରତି ଆକର୍ଷଣ ବଢ଼ୁଛି ।  ରାଜନୀତିରେ ବାବୁ ଟ୍ରେଣ୍ଡ ଦେଖିବାକୁ  ମିଳିଲାଣି । ୨୦୨୪ ନିର୍ବାଚନ ପୂର୍ବରୁ  ଆହୁରି ଅନେକ ପ୍ରଶାସନିକ ଅଧିକାରୀ  (ଆଇଏଏସ୍‌, ଓଏଏସ୍‌, ଓଆରଏସ୍‌),  ପୁଲିସ ଅଧିକାରୀ, ସରକାରୀ କର୍ମଚାରୀ  ସରକାରୀ ଚାକିରିରୁ ଅବସର ପରେ  କିମ୍ବା ସ୍ୱେଚ୍ଛାକୃତ ଅବସର ନେଇ  ରାଜନୀତି ମଇଦାନକୁ ଓହ୍ଲାଇବାକୁ  ସଜବାଜ ହେଉଛନ୍ତି । ବହୁ ସରକାରୀ  ଅଫିସର ଗୋଡ଼ ଟେକି ବସିଛନ୍ତି,  ରାଜନୀତି ମଇଦାନକୁ ଆସିବା ପାଇଁ ।  ଅପେକ୍ଷା କେବଳ ଦଳୀୟ ଟିକଟ ସିଗନାଲକୁ । ଅଧିକାଂଶ ବିଜେଡି  ଟିକଟ ପାଇଁ ଆଶାୟୀ ଅଛନ୍ତି ।  

୨୦୨୪ ନିର୍ବାଚନ ପାଇଁ  ବାଲେଶ୍ୱରର ରେମୁଣା ଆସନ ପାଇଁ  ଜଣେ ଆଇଏଏସ୍‌ଙ୍କ ନାଁ ଚର୍ଚ୍ଚାରେ ଅଛି ।  ବିଧାୟକ ସୁଧାଂଶୁ ପରିଡ଼ା ବିଜେଡିରୁ  ବିଦା ହେବା ପରଠୁ ଏହି ଚର୍ଚ୍ଚା  ଜୋର୍‌ ଧରିଛି । ଭୋଗରାଇ ଆସନ  ପାଇଁ ଏମ୍ସର ଜଣେ ଡାକ୍ତର ଟିକଟ  ଆଶାୟୀ ଥିବା କୁହାଯାଉଛି । କଟକ  ଲୋକସଭା ଆସନ ପାଇଁ ଜଣେ ବରିଷ୍ଠ  ଓଏଏସ୍‌ ଅଧିକାରୀଙ୍କ ନାମକୁ ନେଇ ଗତ କିଛି ମାସ ହେବ ଚର୍ଚ୍ଚା ହେଉଛି । ବଲାଙ୍ଗିର ଲୋକସଭା ଆସନ ପାଇଁ  ଜଣେ ପୂର୍ବତନ ମୁଖ୍ୟ ଶାସନ ସଚିବଙ୍କ ନାଁ ଢେର ଦିନରୁ ଚର୍ଚ୍ଚାର ପରିଧିରେ ରହିଛି । 

ସେହିପରି ଜଣେ ବରିଷ୍ଠ ପୁଲିସ ଅଧିକାରୀ ନିଜ ପତ୍ନୀଙ୍କୁ ଲୋଇସିଂହା ଆସନରୁ ବିଜେଡି ପ୍ରାର୍ଥୀ କରିବା ଯୋଜନାରେ ଥିବା କୁହାଯାଉଛି। ଲୋୟର ସୁକତେଲ ପ୍ରକଳ୍ପ କାର୍ଯ୍ୟ ଆରମ୍ଭ ସମୟରେ ଏହି ପୁଲିସ ଅଧିକାରୀ ବଡ଼ ଭୂମିକା ତୁଲାଇଥିଲେ ଲୋଇସିଂହାରେ । ଛତ୍ରପୁରରୁ ବିଧାୟକ ପ୍ରାର୍ଥୀ ହେବାକୁ ଜଣେ ଓଆରଏସ୍‌ ଅଧିକାରୀ ପୂରା ଦମ୍‌ ଲଗାଇ ଦେଇଛନ୍ତି । ବର୍ତ୍ତମାନ ସେ ଗଞ୍ଜାମ ଜିଲ୍ଲାରେ ଏକ ବଡ଼ ପଦବୀରେ ଅଛନ୍ତି । ଜଣେ ଅବସରପ୍ରାପ୍ତ ଓଏଏସ୍‌ ପୂର୍ବରୁ ଏବେ ଚିକିଟିରୁ  ବିଜେଡି ଟିକଟ ନେବାକୁ କସରତ ଚଳାଇଛନ୍ତି । କେନ୍ଦୁଝର ସଦର ପାଇଁ ଖଣି ବିଭାଗର ଜଣେ ଅଧିକାରୀ  ଉଦ୍ୟମ କରୁଛନ୍ତି । 

ସମ୍ବଲପୁରରୁ ବିଜେଡି ଟିକଟ ହାତେଇବା ପାଇଁ ଜଣେ ପୁଲିସ କନଷ୍ଟେବଳ ଓ ରେଙ୍ଗାଲି ଆସନ ପାଇଁ ସ୍ୱାସ୍ଥ୍ୟ ବିଭାଗର ଜଣେ କିରାଣୀ ବି ଦୌଡ଼ରେ ଥିବା ଶୁଣିବାକୁ ମିଳୁଛି । ସମ୍ବଲପୁର, ରେଢାଖୋଲରୁ ବିଜେପି ଟିକଟ ପାଇଁ ଦୁଇଜଣ ଡାକ୍ତର ଚର୍ଚ୍ଚାରେ ଅଛନ୍ତି ।  

ନିର୍ବାଚନ ଯେତେ ପାଖକୁ ଆସିବ, ଆହୁରି ଅନେକ ପ୍ରଶାସନିକ ଅଧିକାରୀମାନଙ୍କ ନାଁ ଚର୍ଚ୍ଚାରେ ଯୋଡ଼ି ହେବ । ବର୍ତ୍ତମାନ ସମୟର କିଛି ବରିଷ୍ଠ  ଆଇଏଏସ୍‌, ଅବସରପ୍ରାପ୍ତ ଆଇଏଏସ୍‌ ଏବଂ ଓଏଏସ୍‌ ଅଧିକାରୀଙ୍କ ନାଁକୁ ନେଇ  ବିଭିନ୍ନ ଚର୍ଚ୍ଚା ଶୁଣିବାକୁ ମିଳୁଛି । ଅଧିକାଂଶ ବିଜେଡି ଟିକଟକୁ ଅନେଇଛନ୍ତି । ସିଗନାଲ  ମିଳିଲେ ମଇଦାନକୁ ଓହ୍ଲାଇବେ ।  

ନୂଆ କରି ରାଜନୀତି ମଇଦାନକୁ ଓହ୍ଲାଇଥିବା ଭି.କେ.ପାଣ୍ଡିଆନଙ୍କୁ ନିଜେ  ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜେଡିକୁ ଆଣିଛନ୍ତି। ୨୦୨୪ ନିର୍ବାଚନ ପାଇଁ ତାଙ୍କୁ  ଦଳରେ ବଡ଼ ଦାୟିତ୍ୱ ମିଳିବ ବୋଲି ଜଣାପଡ଼ିଛି । ବର୍ତ୍ତମାନ ସେ ୫-ଟି ଏବଂ ଆମ  ଓଡ଼ିଶା ନବୀନ ଓଡ଼ିଶାର ଅଧ୍ୟକ୍ଷ ଅଛନ୍ତି । ଓଡ଼ିଶା ରୂପାନ୍ତରଣର ସାରଥୀ ପାଲଟିଥିବା  ଶ୍ରୀ ପାଣ୍ଡିଆନଙ୍କ ଭଳି ବ୍ୟକ୍ତିତ୍ୱ ରାଜନୀତିକୁ ଆସିବା ପରେ ତାଙ୍କ ପଥକୁ ଅନୁସରଣ  କରି ଆହୁରି ଅନେକ ଅଧିକାରୀ ରାଜନୀତିକୁ ଓହ୍ଲାଇପାରନ୍ତି ।  

ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକ ଚାକିରୀ ଜୀବନରୁ ଅବସର  ପରେ ରାଜନୀତିକୁ ଆସିଛନ୍ତି । ଏବେ ସେ ରାଜ୍ୟ କଂଗ୍ରେସର ପ୍ରଚାର କମିଟି  ଅଧ୍ୟକ୍ଷ । ବିଜୟଙ୍କ ଆଗମନ ପରେ କିଛି ଅବସରପ୍ରାପ୍ତ ଆଇଏଏସ୍‌, ଓଏଏସ୍‌  କଂଗ୍ରେସକୁ ଆସିଛନ୍ତି ।  

ସେହିପରି ୨୦୧୯ ନିର୍ବାଚନ ପୂର୍ବରୁ ଆଇଏଏସ୍‌ ଚାକିରିରୁ ସ୍ୱେଚ୍ଛାକୃତ ଅବସର  ନେଇ ଅପରାଜିତା ଷଡ଼ଙ୍ଗୀ ହଠାତ୍‌ ରାଜନୀତି ମଇଦାନକୁ ଆସିଥିଲେ । ପ୍ରଥମ  ପରୀକ୍ଷାରେ ଉତ୍ତୀର୍ଣ୍ଣ ହୋଇ ସେ ଭୁବନେଶ୍ୱର ସାଂସଦ ହେବା ବିଜେପିର ଜାତୀୟ  ମୁଖପାତ୍ର ହୋଇଛନ୍ତି । ସେହିପରି ଆଇଏଏସ୍‌ ଚାକିରି ଛାଡ଼ି ବିଜେପିରେ ମିଶି ଓଡ଼ିଶା  କ୍ୟାଡରର ଅଶ୍ୱିନୀ ବୈଷ୍ଣବ କ୍ୟାବିନେଟ ମନ୍ତ୍ରୀ ହୋଇଛନ୍ତି କେନ୍ଦ୍ରରେ । ତାଙ୍କ ହାତରେ କେନ୍ଦ୍ର ରେଳ ମନ୍ତ୍ରଣାଳୟ ଓ ଆଇଟି ବିଭାଗ ରହିଛି ।  

ରାଜନୀତିରେ ‘ବାବୁ’ ଧାରା କିଛି ନୂଆ ନୁହେଁ । ଏକଦା ପ୍ୟାରୀମୋହନ  ମହାପାତ୍ର ରାଜ୍ୟ ରାଜନୀତିରେ ବେଶ୍‌ ପ୍ରଭାବଶାଳୀ ପାଲଟି ଥିଲେ। ସେ ମଧ୍ୟ  ଆଇଏଏସ୍‌ ଚାକିରିରୁ ଅବସର ପରେ ରାଜନୀତିକୁ ଆସିଥିଲେ । ବିଜେଡିରୁ ବିଦା  ହେବା ପରେ ଓଡ଼ିଶା ଜନମୋର୍ଚ୍ଚା ନାଁରେ ନୂଆ ଦଳ ଗଢ଼ିଥିଲେ ପ୍ୟାରୀ । ମାତ୍ର  ବିଜେଡିରୁ ବିଦା ହେବା ସହ ତାଙ୍କ ରାଜନୀତିକୁ ଯେମିତି ଗ୍ରହଣ ଲାଗିଯାଇଥିଲା ।  

ଆଇଏଏସ୍‌, ଓଏଏସ୍‌ ଅଧିକାରୀଙ୍କ ଭଳି ବହୁ ସରକାରୀ କର୍ମଚାରୀ, ଡାକ୍ତର,  ଇଞ୍ଜିନିୟର, ଆଇଟି ପ୍ରଫେସନାଲ, ବୈଜ୍ଞାନିକ ମଧ୍ୟ ରାଜନୀତି ପ୍ରତି ଆକର୍ଷିତ  ହୋଇ ନିର୍ବାଚନ ମଇଦାନକୁ ଆସିଲେଣି । ସବୁ ଦଳରେ ଏଭଳି ନେତାଙ୍କ ସଂଖ୍ୟା  ବଢ଼ି ଚାଲିଛି ୨୦୧୪ରୁ । ୨୦୧୯ ନିର୍ବାଚନରେ ଏ ଧାରା ଅଧିକ ଦେଖିବାକୁ ମିଳିଥିଲା ।  ପରିବେଶ ବୈଜ୍ଞାନିକରୁ ଲୋଇସିଂହାରୁ ବିଜେପି ଟିକଟରେ ବିଧାୟକ ହୋଇଛନ୍ତି  ମୁକେଶ ମହାଲିଙ୍ଗ । ଆଇଟି କ୍ଷେତ୍ରରୁ ଆସି ତୁଷାରକାନ୍ତି ବେହେରା ବର୍ତ୍ତମାନ ଓଡ଼ିଶା  ସରକାରରେ ଆଇଟି ମନ୍ତ୍ରୀ ହୋଇଛନ୍ତି । ସୁଜିତ କୁମାର, ଅମର ପଟ୍ଟନାୟକ ମଧ୍ୟ  ରାଜନୀତିକୁ ବାଛି ସାଂସଦ ହୋଇଛନ୍ତି । 

ଡାକ୍ତର ପେଷାରୁ ରାଜନୀତିକୁ ଓହ୍ଲାଇଥିବା  ନେତାଙ୍କ ଭିତରେ ବିଧାୟକ ସିଏସ୍‌ ରାଜନ ଏକା, ପ୍ରମୋଦ ମଲ୍ଲିକ, ନୃସିଂହ ସାହୁ,  ରାସେଶ୍ୱରୀ ପାଣିଗ୍ରାହୀ, ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକଙ୍କ ନାଁ ପ୍ରମୁଖ । ବିଧାୟକ  ଅନନ୍ତ ଦାସ, ରମେଶ ବେହେରା, ରମେଶ ସାଏ, ଶର୍ମିଷ୍ଠା ସେଠୀ, ସୁକାନ୍ତ ନାୟକ  ବି ସରକାରୀ ଚାକିରିରୁ ରାଜନୀତିକୁ ଆସିଛନ୍ତି । ଯନ୍ତ୍ରୀରୁ ପୂର୍ତ୍ତ ସଚିବ ହୋଇ  ଅବସର ନେବା ପରେ ନଳିନୀକାନ୍ତ ପ୍ରଧାନ ରାଜନୀତିକୁ ଆସି ବିଜେଡିରୁ ସମ୍ବଲପୁର  ଲୋକସଭା ଆସନରେ ଲଢ଼ି ପରାଜିତ ହୋଇଛନ୍ତି । ଏଥର ତାଙ୍କ ନାଁ ଆଠମଲ୍ଲିକ  ବିଧାନସଭା ଆସନକୁ ନେଇ ଚର୍ଚ୍ଚାରେ ଅଛି । ପୂର୍ବତନ ଡିଜିପି ପ୍ରକାଶ ମିଶ୍ର ୨୦୧୯ରେ  କଟକରୁ ବିଜେପି ସାଂସଦ ପ୍ରାର୍ଥୀ ହୋଇ ପରାଜିତ ହୋଇଛନ୍ତି । କଟକର ସୁନାମଧନ୍ୟ  ଡାକ୍ତର ପୂର୍ଣ୍ଣଚନ୍ଦ୍ର ମହାପାତ୍ର ନିକଟରେ ବିଜେପି ସହ ଯୋଡ଼ି ହୋଇଛନ୍ତି । ସେ  ନିର୍ବାଚନ ଲଢ଼ିବେ କି ନାହିଁ ଜଣାନାହିଁ, କିନ୍ତୁ ଚର୍ଚ୍ଚା ଆରମ୍ଭ ହୋଇଯାଇଛି ।  

ଅବସରପ୍ରାପ୍ତ ଆଇପିଏସ ଅନାଦି ସାହ, ବଟକୃଷ୍ଣ ତ୍ରିପାଠୀ, ଆଇଏଫଏସ୍‌  ଖାରବେଳ ସ୍ୱାଇଁ, ଆଇଏଏସ୍‌ ଯତୀଶ ମହାନ୍ତି, ପ୍ରସନ୍ନ ମିଶ୍ର, ଓଏଏସ୍‌ ଗୋପବନ୍ଧୁ  ଦାସ, ଆଇପିଏସ୍‌ ଅଶୋକ ସାହୁ ନିଜ ଚାକିରି କାଳ ପରେ ରାଜନୀତିରେ ଯୋଗ  ଦେଇଛନ୍ତି ।

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.