କଟକ,୨୯/୦୨: ରାଜ୍ୟରେ ଅଧ୍ୟୟନରତ ପ୍ରାୟ ୫ ଲକ୍ଷ ୪୦ ହଜାର ନବମ ଶ୍ରେଣୀ ଛାତ୍ରଛାତ୍ରୀଙ୍କର ବାର୍ଷିକ ପରୀକ୍ଷା ମାର୍ଚ୍ଚ ୬ ତାରିଖରୁ ୧୩ ତାରିଖ ପର୍ଯ୍ୟନ୍ତ ଚାଲିବ । ପରୀକ୍ଷା ସକାଳ ୯ଟାରୁ ଦିନ ୧୧ଟା ୩୦ ପର୍ଯ୍ୟନ୍ତ ଚାଲିବ । କେବଳ ଗଣିତ ପରୀକ୍ଷା ପାଇଁ ଅଧିକ ୧୫ ମିନିଟ୍ ସମୟ ଥିବାରୁ ଏହା ସକାଳ ୯ଟାରୁ ଦିନ ୧୧ଟା ୪୫ ପର୍ଯ୍ୟନ୍ତ ଚାଲିବ । ପ୍ରଥମ ଦିନ ଦ୍ୱିତୀୟ ଭାଷା ଇଂରାଜୀ ପରୀକ୍ଷା ରହିଛି । ସେହିପରି ୭ ତାରିଖରେ ତୃତୀୟ ଭାଷା ହିନ୍ଦୀ/ସଂସ୍କୃତ, ୯ରେ ସାଧାରଣ ବିଜ୍ଞାନ, ୧୧ରେ ଗଣିତ, ୧୨ରେ ସାମାଜିକ ବିଜ୍ଞାନ ଏବଂ ୧୩ ତାରିଖରେ ଓଡ଼ିଆ ପରୀକ୍ଷା ହେବ ବୋଲି ବୋର୍ଡ ପକ୍ଷରୁ ସୂଚନା ଦିଆଯାଇଛି ।
ପରୀକ୍ଷା ଲାଗି ବୋର୍ଡ ପକ୍ଷରୁ ପ୍ରଶ୍ନପତ୍ର ୱେବ୍ସାଇଟ୍ରେ ଅପଲୋଡ୍ କରାଯିବ । ପ୍ରଧାନ ଶିକ୍ଷକମାନେ ସେମାନଙ୍କ ବିଦ୍ୟାଳୟର ୟୁଜର୍ ଆଇଡି ଏବଂ ପାସ୍ୱାର୍ଡ ବ୍ୟବହାର କରି ୱେବ୍ସାଇଟ୍ରୁ ପ୍ରଶ୍ନପତ୍ର ଡାଉନ୍ଲୋଡ୍ କରିବେ । ଏହି ପ୍ରଶ୍ନପତ୍ରଗୁଡ଼ିକ ପରୀକ୍ଷା ଦିନ ସକାଳ ୭ଟାରୁ ୧୧ଟା ମଧ୍ୟରେ ଡାଉନ୍ଲୋଡ୍ କରିହେବ । ପରୀକ୍ଷା ପରିଚାଳନା ଏବଂ ମୂଲ୍ୟାୟନ ବ୍ୟବସ୍ଥାକୁ ଜିଲ୍ଲା ସ୍ତରରେ ଡିଇଓମାନେ ଅନୁଧ୍ୟାନ କରିବେ । ପରୀକ୍ଷା ଫଳ ଏପ୍ରିଲ୍ ୧ ପୂର୍ବରୁ ବିଦ୍ୟାଳୟ ସ୍ତରରେ ଘୋଷଣା କରାଯିବ ।
ସୂଚନାଯୋଗ୍ୟ, ନବମ ଶ୍ରେଣୀର ଏହି ବାର୍ଷିକ ପରୀକ୍ଷା ପାଇଁ ମାର୍ଗଦର୍ଶିକା ଏବଂ ପ୍ରଶ୍ନପତ୍ର ବୋର୍ଡ ପକ୍ଷରୁ ପ୍ରସ୍ତୁତ କରାଯାଇଥିଲେ ହେଁ ପରୀକ୍ଷା ପରିଚାଳନା, ମୂଲ୍ୟାୟନ ଆଦି ବିଦ୍ୟାଳୟ କର୍ତ୍ତୃପକ୍ଷଙ୍କ ଉପରେ ନ୍ୟସ୍ତ ରହିଛି ।
