ମୁମ୍ବାଇ,୦୭/୧୧: ଚଳିତ ବିଶ୍ୱକପ୍ରେ ମଙ୍ଗଳବାର ଏକ ଗୁରୁତ୍ୱପୂର୍ଣ୍ଣ ମୁକାବିଲା ରହିଛି । ଅଷ୍ଟ୍ରେଲିଆ ଓ ଆଫଗାନିସ୍ତାନ ୱାଙ୍ଖଡ଼େ ଷ୍ଟାଡିୟମ୍ରେ ପରସ୍ପରକୁ ଭେଟିବେ । ସେମି ଫାଇନାଲ୍ ଖେଳିବା ପାଇଁ ଆଫଗାନିସ୍ତାନ ନିକଟରେ ସୁଯୋଗ ରହିଛି । ତେଣୁ ମ୍ୟାଚ୍ର ଗୁରୁତ୍ୱ ବଢି ଯାଇଛି ।
ଭାରତ ଓ ଦକ୍ଷିଣ ଆଫ୍ରିକା ସେମି ଫାଇନାଲ୍କୁ ଯୋଗ୍ୟତା ଅର୍ଜନ କରିସାରିଛନ୍ତି । ବାକି ୨ଟି ସ୍ଥାନ ପାଇଁ ଅଷ୍ଟ୍ରେଲିଆ, ନ୍ୟୁଜିଲାଣ୍ଡ, ପାକିସ୍ତାନ ଓ ଆଫଗାନିସ୍ତାନ ଦୌଡ଼ରେ ରହିଛନ୍ତି । ଆଫଗାନିସ୍ତାନ ୭ଟି ମ୍ୟାଚ୍ ଖେଳି ୪ବିଜୟ ସହ ମୋଟ୍ ୮ ପଏଣ୍ଟ ହାସଲ କରିସାରିଛି । ମଙ୍ଗଳବାର ଅଷ୍ଟ୍ରେଲିଆକୁ ହରାଇଲେ ନ୍ୟୁଜିଲାଣ୍ଡ ଓ ପାକିସ୍ତାନକୁ ପଛରେ ପକାଇ ପଏଣ୍ଟ ତାଲିକାର ଚତୁର୍ଥ ସ୍ଥାନକୁ ଉଠିପାରିବ । ଅନ୍ୟ ପଟରେ ଅଷ୍ଟ୍ରେଲିଆ ଉକ୍ତ ମ୍ୟାଚ୍ ଜିତିଲେ ସେମିରେ ସ୍ଥାନ ପକ୍କା କରିବ ।
ଆଫଗାନିସ୍ତାନ ଇତି ମଧ୍ୟରେ ଇଂଲଣ୍ଡ, ପାକିସ୍ତାନ, ଶ୍ରୀଲଙ୍କା ଓ ନେଦରଲାଣ୍ଡ୍ସକୁ ହରାଇ ମନୋବଳ ଦୃଢ କରିଛି । ଅଷ୍ଟ୍ରେଲିଆକୁ ହରାଇବା ଭଳି ଦକ୍ଷତା ଦଳ ନିକଟରେ ରହିଛି । ବିଶେଷ କରି ଦଳରେ ରହିଥିବା ବିଶ୍ୱ ପ୍ରସିଦ୍ଧ ସ୍ପିନରମାନେ ଅଷ୍ଟ୍ରେଲିଆ ବ୍ୟାଟରଙ୍କୁ ଅଟକାଇବାର କ୍ଷମତା ରଖିଛନ୍ତି । ମଙ୍ଗଳବାର ଅଷ୍ଟ୍ରେଲିଆ ଚୂଡ଼ାନ୍ତ ଏକାଦଶରେ ପରିବର୍ତ୍ତନ କରିବ । ପୂର୍ବ ମ୍ୟାଚ୍ ଖେଳି ନଥିବା ମିଚେଲ ମାର୍ଶ ଓ ଗ୍ଲେନ ମ୍ୟାକ୍ସୱେଲ୍ ପ୍ରତ୍ୟାବର୍ତ୍ତନ କରିବେ । ମାତ୍ର ଷ୍ଟିଭେନ ସ୍ମିଥ୍ ଖେଳିବା ନେଇ ଆଶଙ୍କା ରହିଛି । ସେ ସମ୍ପ୍ରତି ସ୍ୱାସ୍ଥ୍ୟଗତ ସମସ୍ୟା ଦେଇ ଗତି କରୁଛନ୍ତି । ଆଫଗାନିସ୍ତାନ ମଧ୍ୟ ନୁର ଅହମ୍ମଦଙ୍କ ସ୍ଥାନରେ ନବୀନ ଉଲ-ହକ୍ଙ୍କୁ ଏକାଦଶରେ ସ୍ଥାନ ଦେବା ସମ୍ଭାବନା ରହିଛି ।
ମଙ୍ଗଳବାର ଡେଭିଡ୍ ୱାର୍ଣ୍ଣରଙ୍କ ଉପରେ ନଜର ରହିବ। ସେ ଆଉ ୪୫ ରନ୍ କଲେ ଅନ୍ତର୍ଜାତୀୟ କ୍ରିକେଟ୍(ସବୁ ଫର୍ମାଟ୍କୁ ମିଶାଇ)ରେ ୧୮,୦୦୦ ରନ୍ ପୂରଣ କରିବେ। ଶ୍ରୀଲଙ୍କାର ସନଥ ଜୟସୂରିୟା ଓ ୱେଷ୍ଟ ଇଣ୍ଡିଜର କ୍ରିସ୍ ଗେଲ୍ ଓପନର ଭାବେ ଅନ୍ତର୍ଜାତୀୟ କ୍ରିକେଟ୍ରେ ୧୮,୦୦୦ ରନ୍ ପୂରଣ କରିଛନ୍ତି । ୱାଙ୍ଖଡ଼େ ପିଚ୍ ବ୍ୟାଟିଂ ପାଇଁ ବେଶ୍ ଅନୁକୂଳ ।ଏଠାରେ ବିଶାଳ ସ୍କୋର ହେବା ଆଶା କରାଯାଉଛି । ପୂର୍ବ ୩ଟି ମ୍ୟାଚ୍ର ପ୍ରଥମ ଇନିଂସରେ ଯଥାକ୍ରମେ ୩୯୯, ୩୮୨ ଓ ୩୫୭ ରନ୍ ସଂଗୃହୀତ ହୋଇଥିଲା । ଆଫଗାନିସ୍ତାନ ଟସ୍ ଜିତି ବ୍ୟାଟିଂ ନେଲେ ବିଜୟ ସମ୍ଭାବନା ସୃଷ୍ଟି କରିପାରିବ । ଅଷ୍ଟ୍ରେଲିଆ ଏଠାରେ ଗୋଟିଏ ମ୍ୟାଚ୍ ଜିତି ସାରିଛି । ତେଣୁ ମଙ୍ଗଳବାର ବିଜୟ ଜାରି ରଖିବାକୁ ଦଳ ପ୍ରୟାସ କରିବ ।
ସମ୍ଭାବ୍ୟ ଦଳ
ଅଷ୍ଟ୍ରେଲିଆ: ଡେଭିଡ୍ ୱାର୍ଣ୍ଣର, ଟ୍ରେଭିସ୍ ହେଡ୍, ମିଚେଲ ମାର୍ଶ, ଷ୍ଟିଭେନ ସ୍ମିଥ୍/ମାର୍ନସ ଲାବୁସାନ, ଜୋସ ଇଂଲିଶ, ଗ୍ଲେନ ମ୍ୟାକ୍ସୱେଲ୍, ମାର୍କସ ଷ୍ଟଇନିସ୍, ପ୍ୟାଟ୍ କମିନ୍ସ(ଅଧିନାୟକ), ମିଚେଲ ଷ୍ଟାର୍କ, ଆଡାମ ଜାମ୍ପା, ଜୋସ ହାଜେଲଉଡ୍ ।
ଆଫଗାନିସ୍ତାନ: ରହମନୁଲ୍ଲା ଗୁରବାଜ, ଇବ୍ରାହିମ ଜାଡ୍ରାନ, ରହମତ ଶାହ, ହସମତୁଲ୍ଲା ସାହିଦି (ଅଧିନାୟକ), ଅଜମତୁଲ୍ଲା ଓମାରଜାଇ, ଇକରାମ ଅଲିଖିଲ, ମହମ୍ମଦ ନବି, ରସିଦ ଖାନ, ମୁଜିବ ଉର ରେହମାନ, ନବୀନ ଉଲ-ହକ୍/ନୁର ଅହମ୍ମଦ, ଫଜଲହକ୍ ଫାରୁକି ।
