ଭୁବନେଶ୍ୱର, ୭।୦୨: ମାଘ ମାସରେ ଆରମ୍ଭ ହେଲା ପ୍ରେମଋତୁ । ପ୍ରେମ ମାନିବନି ବାଧାବନ୍ଧନ । ନିଜ ପ୍ରେମକୁ ଆଉ ଟିକେ ମଝବୁତ କରିବା ଲାଗି ସପ୍ତାହର ୭ଦିନକୁ ନିଆରା ଢ଼ଙ୍ଗରେ ପାଳିବାକୁ ପ୍ରେମୀ ଯୁଗଳ ପ୍ରସ୍ତୁତ ହୋଇସାରିଲେଣି । ପ୍ରେମ ସପ୍ତାହର ପ୍ରଥମ ଦିନ ଆରମ୍ଭ ହେଉଛି ଗୋଲାପ ଦିବସ ବା ରୋଜ୍ ଡେରୁ । ବୁଧବାରଠାରୁ ଆରମ୍ଭ ହେଉଥିବା ପ୍ରେମ ସପ୍ତାହ ଭାଲେନ୍ଣ୍ଟାଇନ୍ ଡେ ଦିନ ସରିବ । ଏହି ଦିବସ ପାଇଁ ଯୁବପିଢ଼ି ପ୍ରସ୍ତୁତ । ଆଜିଠୁ ପାର୍କରେ ଜମିବ ଭିଡ଼ । କିଏ ଗୋଲାପ ଦେଇ ପ୍ରେମ ନିବେଦନ କରିବେ ତ ଆଉ କିଏ ରକ୍ତିମ ଗୋଲାପ ଦେଇ ସମ୍ପର୍କକୁ ରୋମାଣ୍ଟିକ୍ କରିବେ । ସକାଳୁ ରାତି ଯାଏ ଫୁଲ ଦୋକନରେ ଲାଗିବ ଭିଡ଼ । ଏହି ସପ୍ତାହରେ ଗୋଲାପର ଚାହିଦା ମଧ୍ୟ ବଢ଼ିବ ।
ରାଜଧାନୀର ବିଭିନ୍ନ ଫୁଲ ଦୋକାନରେ ଆଗୁଆ ବରାଦି ଦିଆସରିଛି । ଭାଲେନଣ୍ଟାଇନ୍ ସପ୍ତାହ ପାଇଁ ଫୁଲ ଦୋକନଗୁଡ଼ିକ ଲାଲ୍ ସହ ବିଭିନ୍ନ ରଙ୍ଗର ଗୋଲାପରେ ସଜେଇ ହୋଇଛି । ପ୍ରେମ ସପ୍ତାହ ପାଇଁ ଗୋଲାପର ଚାହିଦା ବଢ଼ୁଥିବାରୁ ଦୋକାନୀମାନେ ମଧ୍ୟ ଅଧିକ ମାତ୍ରାରେ ଗୋଲାପ ଫୁଲ ଅର୍ଡର କରିଛନ୍ତି । ଚାହିଦାକୁ ଦେଖି ଗୋଲାପର ଦାମ୍ ମଧ୍ୟ ବଢ଼ିଯାଇଛି । ପୂର୍ବରୁ ୧୫ରୁ ୨୦ଟଙ୍କାରେ ବିକ୍ରି ହେଉଥିବା ଫୁଲ ବର୍ତ୍ତମାନ ୩୦ଟଙ୍କାରୁ ଅଧିକ ଦାମ୍ରେ ବିକ୍ରି ହେବ । ଗୋଲାପ ଫୁଲର ବୁକେ ୨୦୦ରୁ ଆରମ୍ଭ ହୋଇ ୧୫ଶହ ଟଙ୍କା ପର୍ଯ୍ୟନ୍ତ ରହିଛି । ଏଥିପାଇଁ ମଙ୍ଗଳବାର ରାତିରୁ ଫୁଲ ଆସି ସାରିଲାଣି । ଓଡ଼ିଶାରେ ଗୋଲାପ ଫୁଲ ମିଳୁ ନଥିବାରୁ ଅଧିକ ମାତ୍ରାରେ ବେଙ୍ଗାଲୁରୁ ଓ କୋଲକାତାରୁ ଫୁଲ ଆସିଥାଏ । ଏକ ନମ୍ବର ହାଟରେ ଫୁଲ ଦୋକାନ କରିଥିବା ଜଗନ୍ନାଥ ବେହେରା କହିଛନ୍ତି, ଏ ମାସରେ ଗୋଲାପ ଫୁଲ ଅଧିକ ବିକ୍ରି ହୁଏ । ଅନ୍ୟ ଫୁଲ ତୁଳନାରେ ଲାଲ ଗୋଲାପ ଅଧିକ କିଣିବାକୁ ପସନ୍ଦ କରୁଛନ୍ତି ଯୁବପିଢ଼ି ।