ନୂଆଦିଲ୍ଲୀ ୦୭/୦୨: ମହାକାଶରେ ସର୍ବାଧିକ ୮୭୯ ଦିନ ବିତାଇବାର ରେକର୍ଡ କରିଛନ୍ତି ରୁଷ୍‌ ମହାକାଶଯାତ୍ରୀ ଓଲେଗ କୋନୋନେନ୍‌କୋ । ତେବେ ଏହା ଥରକେ ରହଣି ନୁହେଁ । ଏହି ରେକର୍ଡ ମାଧ୍ୟମରେ ସେ ନିଜ ଦେଶର ଜେନେଡି ପଡାଲ୍କାଙ୍କର ୮୭୮ ଦିନ, ୧୧ ଘଣ୍ଟା ଓ ୩୦ ମିନିଟ୍‌ର ରେକର୍ଡ ଭାଙ୍ଗିଛନ୍ତି । କୋନୋନେନ୍‌କୋ ଆସନ୍ତା ଜୁନ୍‌ ୫ ତାରିଖରେ ପୁଣି ମହାକାଶ କେନ୍ଦ୍ର ଯିବେ । ଏହି ଯାତ୍ରା ଜରିଆରେ ସେ ମହାକାଶରେ ୧୦୦୦ ଦିନ ବିତାଇଥିବା ମହାକାଶଚାରୀର ରେକର୍ଡ କରିବେ । ଆସନ୍ତା ସେପ୍ଟେମ୍ବର ୨୩ ତାରିଖରେ ତାଙ୍କ ମହାକାଶ ଯାତ୍ରା ଶେଷ ହେବ । ସେତେବେଳକୁ ସେ ମହାକାଶରେ ୧୧୧୦ ଦିନ ବିତାଇଥିବେ । ରୁଷ୍‌ ମହାକାଶଯାନ ରସ୍‌କସ୍‌ମସ୍‌ ଏହି ସୂଚନା ଦେଇଛି ।

ସୋଭିଏତ୍‌ ଓ ଋଷୀୟ ମହାକାଶଚାରୀମାନେ ଆରମ୍ଭରୁ ମହାକାଶରେ ଅଧିକ ସମୟ ବିତାଇବାର ରେକର୍ଡ କରିଆସିଛନ୍ତି । ସର୍ବାଧିକ ସମୟ ମହାକାଶରେ ବିତାଇଥିବା ମହାକାଶଚାରୀଙ୍କ ତାଲିକାର ପ୍ରଥମ ୮ ଜଣ ରୁଷ୍‌ର । ୯ମରେ ଅଛି ଆମେରିକା ଅର୍ଥାତ୍‌ ନାସାର ପେଗି ହ୍ୱିଟ୍‌ସନ୍‌ । ସେ ୬୭୫ ଦିନ ମହାକାଶରେ ବିତାଇଛନ୍ତି । ଋଷୀୟ ମହାକାଶଚାରୀ ଭ୍ୟାଲେରି ପୋଲିୟାକୋଭ୍‌ ୧୯୯୪ ମସିହା, ଜାନୁଆରୀରୁ ୧୯୯୫ ମସିହା ମାର୍ଚ୍ଚ ମଧ୍ୟରେ ମୀର ମହାକାଶ କେନ୍ଦ୍ରରେ ୪୩୮ ଦିନ ବିତାଇ ରେକର୍ଡ କରିଥିଲେ ।