ମୁମ୍ବାଇ ୦୩/୧୨: ସାଧାରଣତଃ ଦେଖାଯାଏ ଯେ, ଅଳ୍ପ କିଛି ନାମ ଓ ଯଶ କରିଦେଇ ବଲିଉଡର କିଛି କଳାକାର ବାପା, ମା’ଙ୍କଠାରୁ ଅଲଗା ରହନ୍ତି । କିନ୍ତୁ ସଲ୍ମାନ ଖାନ୍ ଆଜି ମଧ୍ୟ ବାପା, ଓ ମା’ଙ୍କ ସହ ରହନ୍ତି । ତାହା ପୁଣି କୌଣସି ଆଲିସାନ୍ ବଙ୍ଗଳାରେ ନୁହେଁ, ଅପେକ୍ଷାକୃତ ଏକ ଛୋଟ ଘରେ । ଲକ୍ଷ ଲକ୍ଷ ଲୋକଙ୍କ ହୃଦୟରେ ରାଜୁତି କରୁଥିବା ସଲ୍ମାନ ଏକ ଟିଭି ସୋ’ରେ ଯୋଗଦେଇ ନିଜର ରୋଜଗାର ଏବଂ ଖର୍ଚ୍ଚ ଉପରେ ଅନେକ କଥା ଖୋଲି କହିଥିଲେ ।
ସଲ୍ମାନ ଆଜି ମଧ୍ୟ ସେ ରୋଜଗାର କରୁଥିବା ସମସ୍ତ ଟଙ୍କା ବାପା ସଲିମ ଖାନଙ୍କୁ ଦେଇଦିଅନ୍ତି ଓ ଆବଶ୍ୟକ ହେଲେ ତାଙ୍କଠୁ ମାଗିକରି ନିଅନ୍ତି । ଆହୁରି ଆଶ୍ଚର୍ଯ୍ୟକର କଥା ଯେ, ସଲ୍ମାନ ପ୍ରାୟ ୨୫-୨୬ ବର୍ଷ ହେଲା ବାହାରେ କୌଣସି ହୋଟେଲ କିମ୍ବା ରେସ୍ତୋରାଁରେ ଖାଇ ନାହାନ୍ତି । ମା’ଙ୍କର ଯେତେବେଳେ ଇଚ୍ଛା ହୁଏ, ସେ ସଲ୍ମାନଙ୍କୁ ସାଙ୍ଗରେ ନେଇ ନିକଟସ୍ଥ କଫି କ୍ୟାଫେକୁ ଯାଆନ୍ତି ଓ କପେ କଫି ପିଇ ଫେରିଆସନ୍ତି ।
ନିଜର ସ୍ୱାସ୍ଥ୍ୟକୁ ନେଇ ବେଶ୍ ସଚେତନ ସଲ୍ମାନ ଖାନ କହନ୍ତି, ବାହାରେ ଖାଇବା ପିଇବା ଦୂରେ ଥାଉ, ସିନେମାର ସୁଟିଂ ନ ଥିଲେ ସେ ବାହାରକୁ ଆଦୌ ଯାଆନ୍ତି ନାହିଁ । ଫୁର୍ସତ ପାଇଲେ ଘରର ଲନ୍ରେ ବସନ୍ତି ନ ହେଲେ ଫାର୍ମ ହାଉସ୍କୁ ଯାଆନ୍ତି । ଏହା ହିଁ ତାଙ୍କ ପାଇଁ ‘ବାହାରକୁ ଯିବା’ ବୋଲି ସେ କହନ୍ତି । ସମୟ ପାଇଲେ ସେ ଘରେ, ପରିବାର ସଦସ୍ୟଙ୍କ ସହିତ ହିଁ ରହିବାକୁ ଭଲପାଆନ୍ତି ।
