ଫୁଲବାଣୀ,୨୭/୨ ବିଦ୍ୟାଳୟ ଶ୍ରେଣୀ ଗୃହ ନିର୍ମାଣ ପାଇଁ ଆସିଥିବା ସରକାରୀ ଅନୁଦାନକୁ ହଡପ କରିଥିବା ଅଭିଯୋଗର ବିଚାର କରି ଆଜି ଫୁଲବାଣୀ ସ୍ବତନ୍ତ୍ର ଭିଜିଲାନ୍ସ ଅଦାଲତ ଜନୈକ ତତ୍କାଳୀନ ସ୍କୁଲ କମିଟି ସଭାପତିଙ୍କୁ ତିନି ବର୍ଷ ଜେଲଦଣ୍ଡ ଆଦେଶ ଦେଇଛନ୍ତି । ଏଥି ସହ ଦୋଷୀଙ୍କୁ ୧୦ ହଜାର ଟଙ୍କା ଜରିମାନା କରାଯାଇଛି । ଜରିମାନା ଅନାଦେୟ ଅଭିଯୁକ୍ତଙ୍କୁ ଅଧିକ ୬ ମାସ ଜେଲ ଭୋଗିବାକୁ ପଡିବ ବୋଲି ଅଦାଲତ ତାଙ୍କ ରାୟରେ ନିର୍ଦ୍ଦେଶ ଦେଇଛନ୍ତି । ଅଭିଯୁକ୍ତ ଜଣକ ହେଲେ ରାଇକିଆ ବ୍ଲକ ସିକବାଡି ପ୍ରାଥମିକ ବିଦ୍ୟାଳୟ ପରିଚାଳନା କମିଟିର ତତ୍କାଳୀନ ସଭାପତି ମନୋଜ ପ୍ରଧାନ । ସୂଚନା ଅନୁଯାୟୀ, ଏହି ବିଦ୍ୟାଳୟର ଅତିରିକ୍ତ ଶ୍ରେଣୀ ଗୃହ ନିର୍ମାଣ ପାଇଁ ୮ ଲକ୍ଷ ୯୬ ହଜାର ୪୦୦ ଟଙ୍କା ଅନୁଦାନ ମିଳିଥିଲା । ଏଥି ମଧ୍ୟରୁ ୮ ଲକ୍ଷ ଟଙ୍କା ଉଠାଯାଇ କାମ ଆରମ୍ଭ କରାଯାଇଥିଲା । କିନ୍ତୁ କାମ ସମ୍ପୂର୍ଣ୍ଣ ନ ହୋଇ ଅଧାରୁ ବନ୍ଦ ରହିଥିଲା । ଏଥିରେ ଅର୍ଥ ତୋଷାରପାତ ହୋଇଥିବା ନେଇ ଦୁର୍ନୀତି ନିବାରଣ ବିଭାଗ ନିକଟରେ ଅଭିଯୋଗ ହେବାରୁ ବ୍ରହ୍ମପୁର ଭିଜିଲାନ୍ସ ଥାନାରେ ୫୭/୧୭ ରେ ଏକ ମାମଲା ରୁଜ୍ଜୁ କରାଯାଇ ତଦନ୍ତ କରାଯାଇଥିଲା । ତଦନ୍ତ ବେଳେ ମାତ୍ର ୨ ଲକ୍ଷ ୧୬ ହଜାର ୩୧୦ ଟଙ୍କା ଖର୍ଚ୍ଚ କରାଯାଇ ବଳକା ୫ ଲକ୍ଷ ୮୩ ହଜାର ୬୯୦ ଟଙ୍କା ଆତ୍ମସାତ କରାଯାଇଥିବା ଜଣାପଡିଥିଲା । ଫଳରେ ସ୍କୁଲର ପ୍ରଧାନ ଶିକ୍ଷକ ଓ ପରିଚାଳନା କମିଟି ସଭାପତିଙ୍କ ବିରୋଧରେ ଭିଜିଲାନ୍ସ ବିଭାଗ ପକ୍ଷରୁ ଅଦାଲତରେ କେସ ଚାଲିଥିଲା । ଆଜି ଏହି ମାମଲାର ଶୁଣାଣୀ କରି ଭିଜିଲାନ୍ସ କୋର୍ଟ ବିଚାରପତି ସମର ବିଳାସ ବେହେରା ଉପରୋକ୍ତ ଦଣ୍ଡାଦେଶ ଶୁଣାଇଛନ୍ତି । ତେବେ ଅନ୍ୟତମ ଅଭିଯୁକ୍ତ ତଥା ବିଦ୍ୟାଳୟର ତତ୍କାଳୀନ ପ୍ରଧାନ ଶିକ୍ଷକଙ୍କ ଇତି ମଧ୍ୟରେ ପରଲୋକ ହୋଇ ଯାଇଥିବାରୁ ତାଙ୍କ ବିରୋଧରେ ମାମଲା ବନ୍ଦ ହୋଇ ଯାଇଥିଲା । ମାମଲାଟିକୁ ସରକାରଙ୍କ ପକ୍ଷରୁ ସ୍ବତନ୍ତ୍ର ପିପି ଭି ଭି ରାମଦାସ ପରିଚାଳନା କରୁଥିଲେ ।