ହାଇଦ୍ରାବାଦ, ୦୨/୧୨: ତେଲଙ୍ଗାନା ବିଧାନସଭା ନିର୍ବାଚନ ଭୋଟିଂର ଠିକ୍ ପୂର୍ବରୁ ଆନ୍ଧ୍ରପ୍ରଦେଶ ନାଗାର୍ଜୁନ ସାଗର ବନ୍ଧକୁ କବଜା କରି ନେଇଥିଲା । ଡ୍ୟାମକୁ କବଜା କରିବା ପରେ ଆନ୍ଧ୍ରପ୍ରଦେଶ ଗେଟ୍ ଖୋଲି ଦେଇ ପାଣି ଛାଡ଼ିଥିଲା । ଯାହାକୁ ନେଇ ଉଭୟ ରାଜ୍ୟ ମଧ୍ୟରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଛି ।
କୃଷ୍ଣା ନଦୀ ଉପରେ ନିର୍ମିତ ନାର୍ଗାଜୁନ ସାଗର ବନ୍ଧ ତେଲଙ୍ଗାନା ସରକାରଙ୍କ ନିୟନ୍ତ୍ରଣରେ ରହିଛି । ନଦୀର ପାଣିକୁ ନେଇ ପୂର୍ବରୁ ବି ୨ ରାଜ୍ୟ ମଧ୍ୟରେ ଉତ୍ତେଜନା ସୃଷ୍ଟି ହୋଇଥିଲା । ଗୁରୁବାର ତେଲଙ୍ଗାନାରେ ମତଦାନ ପ୍ରସ୍ତୁତି ଚାଲିଥିବା ବେଳେ ରାତି ୨ଟାରେ ଆନ୍ଧ୍ରପ୍ରଦେଶର ପ୍ରାୟ ୭୦୦ ପୋଲିସ ବନ୍ଧକୁ ଅକ୍ତିଆର କରି ନେଇ ଡାହାର ପାର୍ଶ୍ୱ ଗେଟ୍ ଖୋଲି ଦେଇଥିଲେ ।
ଭୋଟିଂ ଚାଲିଥିବା ବେଳେ ତେଲଙ୍ଗାନାରେ ପଶି ଡ୍ୟାମର ଗେଟ୍ ଖୋଲିଦେଲା ଆନ୍ଧ୍ର ପୋଲିସ
ଗେଟ୍ ଖୋଲିବା ଫଳରେ ପ୍ରତି ଘଣ୍ଟା ୫୦୦ କ୍ୟୁସେକ୍ ଜଳ କୃଷ୍ଣା ନଦୀରୁ ଆନ୍ଧ୍ରପ୍ରଦେଶକୁ ଯାଉଛି । ଆନ୍ଧ୍ରପ୍ରଦେଶର ଜଳସେଚନ ମନ୍ତ୍ରୀ ଗୁରୁବାର ସୋସିଆଲ୍ ମିଡିଆରେ ଲେଖିଥିଲେ, ଆମେ ପଇବା ପାଣି ପାଇଁ ନାଗାର୍ଜୁନ ଡ୍ୟାମର ଡାହାଶ ପାର୍ଶ୍ୱ ଗେଟ୍ ଖୋଲି ଦେଇଛୁ ।
ମନ୍ତ୍ରୀ ଆହୁରି କହିଛନ୍ତି, ଆନ୍ଧ୍ର ଓ ତେଲଙ୍ଗାନା ମଧ୍ୟରେ ହୋଇଥିବା ଚୁକ୍ତି ଅନୁସାରେ ଯେତିକି ପାଣି ଦେବା କଥା ଆମେ ସେତିକି ନେଇଛୁ । ଆମେ କୌଣସି ଚୁକ୍ତି ଉଲ୍ଲଂଘନ କରି ନାହୁଁ । କୃଷ୍ଣା ନଦୀର ୬୬ ପ୍ରତିଶତ ପାଣି ଉପରେ ଆନ୍ଧ୍ରପ୍ରଦେଶର ଅଧିକାର ରହିଛି । ଯେତେବେଳେ କି ୩୪ ପ୍ରତିଶତ ପାଣି ତେଲଙ୍ଗାନାର ।
ଆନ୍ଧ୍ରପ୍ରଦେଶ ଓ ତେଲଙ୍ଗାନା ୨ ରାଜ୍ୟ ମଧ୍ୟରେ ବଢ଼ୁଥିବା ଉତ୍ତେଜନାକୁ ଦେଖି କେନ୍ଦ୍ର ସରକାର ହସ୍ତକ୍ଷେପ କରିଛନ୍ତି । ନଭେମ୍ବର ୨୮ ସ୍ଥିତିକୁ ଦେଖି କେନ୍ଦ୍ର ସରକାର ନାଗାର୍ଜୁନ ଡ୍ୟାମରୁ ପାଣି ଛାଡ଼ିବାକୁ କହିଛନ୍ତି । ଏଥିସହ ବନ୍ଧରେ ସୃଷ୍ଟି ଉତ୍ତେଜନାକୁ ଦେଖି ସିଆରପିଏଫ୍ ଯବାନଙ୍କୁ ମୁତୟନ କରାଯାଇଛି ।
