ସମ୍ବଲପୁର, ୧୮/୧୧ : ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ୨ ଦିନିଆ ସମ୍ବଲପୁର ଗସ୍ତ ନେଇ ଜିଲ୍ଲା ପୋଲିସ ପ୍ରଶାସନ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିଛି। ରାଷ୍ଟ୍ରପତିଙ୍କ କାର୍ଯ୍ୟକ୍ରମ ଥିବା ୩ ଟି ସ୍ଥାନକୁ ଏସପି ମୁକେଶ ଭାମୁ ଓ ଆଇଜି ଦୀପକ କୁମାର ଗସ୍ତ କରି ସୁରକ୍ଷା ବ୍ୟବସ୍ଥା ନିରୀକ୍ଷଣ କରିଛନ୍ତି। ୩୫ ପ୍ଲାଟୁନ ପୋଲିସ ଫୋର୍ସ , ୧୫୦ ଅଫିସର ସହ SPG ସୁରକ୍ଷା ଦାୟିତ୍ବରେ ରହିବେ। ମହାମହିମଙ୍କ କାରକେଡ୍ ଆସିବା ବେଳେ ସେହି ରାସ୍ତା ବନ୍ଦ ରହିବ। ଏହାସହ ଏମସିଏଲ ହ୍ୟାଲିପ୍ୟାଡରେ ଟ୍ରାଏଲ ରନ୍ କରିଛି ଏୟାରଫୋର୍ସର ଏମଆଇ-୧୭ ଏୟାରକ୍ରାଫ୍ଟ।

ମହାମହିମ ୨୧ ତାରିଖ ଅପରାହ୍ନରେ ବୁର୍ଲା ଭିସୁଟ ସମାବର୍ତ୍ତନ ଉତ୍ସବରେ ଯୋଗ ଦେବେ। ଏହା ପରେ ସନ୍ଧ୍ୟାରେ ମାଁ ସମଲେଶ୍ବରୀ ମନ୍ଦିର ଦର୍ଶନ ପାଇଁ ପହଞ୍ଚିବେ ।  ୨୨ ତାରିଖ ସକାଳ ୧୦ ଟାରେ ଶାସନ ସ୍ଥିତ ପାବନସରୋବର ପ୍ରଜାପିତା ବ୍ରହ୍ମା କୁମାରୀ ଆଶ୍ରମରେ "ନୂତନ ଭାରତ ନୂତନ ଶିକ୍ଷା" କାର୍ଯ୍ୟକ୍ରମରେ ଯୋଗ ଦେବେ ।