ମୁମ୍ବାଇ ୨୮/୦୧: ୨୦୧୬ରେ ମୁକ୍ତିଲାଭ କରିଥିବା ‘ରମଣ ରାଘବ ୨.୦’ ଜରିଆରେ ବଲିଉଡ୍ ଡେବ୍ୟୁ କରିଥିଲେ ଅଭିନେତ୍ରୀ ଶୋଭିତା ଧୁଲିପାଲା । ଅନୁରାଗ କଶ୍ୟପଙ୍କର ସେହି ଫିଲ୍ମରେ ଶୋଭିତାଙ୍କର ଅଭିନୟକୁ ବେଶ୍ ପ୍ରଶଂସା ମିଳିଥିଲା । ତା’ପରେ ମଲ୍ଟିଷ୍ଟାରର ‘ଘୋଷ୍ଟ ଷ୍ଟୋରିଜ୍’ରେ ତାଙ୍କୁ ଦେଖିବାକୁ ମିଳିଥିଲା । କିଛି ଦକ୍ଷିଣ ଭାରତୀୟ ଫିଲ୍ମ, ୱେବ୍ସିରିଜ୍ରେ ବି କାମ କରିଥିଲେ ସେ । ନିକଟରେ ଶୋଭିତାଙ୍କ ଅଭିନୀତ ପ୍ରଥମ ହଲିଉଡ୍ ଫିଲ୍ମ ‘ଦ ମଙ୍କି ମ୍ୟାନ୍’ର ଟ୍ରେଲର ରିଲିଜ୍ ହୋଇଛି । ସେଥିରେ ତାଙ୍କୁ ‘ସ୍ଲମଡଗ୍ ମିଲେନିୟର’ ଫେମ୍ ଅଭିନେତା ଦେବ ପଟେଲଙ୍କ ବିପକ୍ଷରେ ଦେଖିବାକୁ ମିଳୁଛି ।
ଦେବ ପଟେଲ୍ ମଧ୍ୟ ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି । ଆସନ୍ତା ଏପ୍ରିଲ ୫ରେ ଫିଲ୍ମଟି ସାରା ବିଶ୍ୱରେ ମୁକ୍ତିଲାଭ କରିବ । ଏ ସଂପର୍କରେ ଏକ ସାକ୍ଷାତକାରରେ ଶୋଭିତା କହିଛନ୍ତି, ଏହି ଆକ୍ସନ୍ ଥ୍ରିଲର ଫିଲ୍ମ ଲାଗି ମୁଁ ୨୦୧୬ରେ ଅଡିସନ୍ ଦେଇଥିଲି । ଏତେ ବର୍ଷ ପରେ ତାହା ଦର୍ଶକଙ୍କ ସାମ୍ନାକୁ ଆସିବାକୁ ଯାଉଥିବାରୁ ଉତ୍ସାହିତ ଅଛି । ବିଶେଷକରି ଦେବ ପଟେଲଙ୍କ ସହ କାମ କରିବା ନିଶ୍ଚିତ ଭାବେ ମୋ କ୍ୟାରିୟର ପାଇଁ ଟର୍ଣ୍ଣିଂ ପଏଣ୍ଟ ସାବ୍ୟସ୍ତ ହେବ ବୋଲି ଆଶା କରୁଛି ।
‘ଦ ମଙ୍କି ମ୍ୟାନ୍’ରେ ଦେବ-ଶୋଭିତାଙ୍କ ବ୍ୟତୀତ ମକରନ୍ଦ ଦେଶପାଣ୍ଡେ, ସିକନ୍ଦର ଖେର୍, ବିପିନ୍ ଶର୍ମା, ଅଦିତି କାଲଙ୍କୁଟେ, ଅଶ୍ୱିନୀ କାଲସେକର ପ୍ରମୁଖଙ୍କୁ ଦେଖିବାକୁ ମିଳିବ । ସୂଚନାଥାଉକି, ଏହି ଫିଲ୍ମଟି ଭାରତୀୟ ପୃଷ୍ଠଭୁମିରେ ନିର୍ମିତ । ଫିଲ୍ମର ନାୟକ(ଦେବ ପଟେଲ) ପିଲାଦିନରୁ ନିଜର ମା’ଙ୍କୁ ହରାଉଛନ୍ତି । ବଡ଼ ହେବା ପରେ ସେ ନିଜ ମା’ଙ୍କୁ ହତ୍ୟା କରିଥିବା ଲୋକଙ୍କ ବିରୋଧରେ କିଭଳି ପ୍ରତିଶୋଧ ନେଉଛନ୍ତି ତାକୁ ଚିତ୍ରଣ କରାଯାଇଛି ।
