ଭୁବନେଶ୍ୱର - ବିଧାନସଭାରେ ରାଜ୍ୟ ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ ୨୦୨୪-୨୫ ଆର୍ଥିକ ବର୍ଷ ପାଇଁ କାମଚଳା ବଜେଟ ଉପସ୍ଥାପନ କରିଛନ୍ତି। ନିର୍ବାଚନୀ ବର୍ଷ ଥିବାରୁ କାମଚଳା ବଜେଟ ଉପସ୍ଥାପନ କରିଛନ୍ତି ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ। ୨୦୨୪-୨୫ ଆର୍ଥିକ ବର୍ଷ ପାଇଁ ମୋଟ ୨,୫୫,୦୦୦ କୋଟି ଟଙ୍କାର ବଜେଟ୍ ଆକଳନ ହୋଇଥିବା ବେଳେ ଏପ୍ରିଲରୁ ଜୁଲାଇ ପାଇଁ ୧,୧୮,୦୦୦ କୋଟି ଟଙ୍କାର ଲେଖାନୁଦାନ ଆଗତ କରାଯାଇଛି । ଆମ ରାଜ୍ୟରେ ଅଧିକାଂଶ ଲୋକ କୃଷି ଉପରେ ନିର୍ଭର କରୁଥିବାରୁ ଏହି ବଜେଟ୍‌ରେ କୃଷି ଓ ଆନୁଷଙ୍ଗିକ କ୍ଷେତ୍ରର ଆବଶ୍ୟକତାକୁ ଉପଲବ୍ଧି କରି ଏହି କ୍ଷେତ୍ର ପାଇଁ ୨୮ ହଜାର ୯ ଶହ ୪୪ କୋଟି ଟଙ୍କାର ବ୍ୟୟବରାଦ କରାଯାଇଛି , ଯାହାକି ପୂର୍ବ ବର୍ଷର ବ୍ୟୟବରାଦ ତୁଳନାରେ ୧୬ ଦଶମିକ ୬ ପ୍ରତିଶତ ଅଧିକ। 

ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ କହିଛନ୍ତି, କାଳିଆ ଯୋଜନାରେ ୪୩ ଲକ୍ଷ ୮୮ ହଜାର କ୍ଷୁଦ୍ର ଏବଂ ନାମ ମାତ୍ର ଚାଷୀ ଏବଂ ୧୮ ଲକ୍ଷ ୯୩ ହଜାର ଭୂମିହୀନ ଚାଷୀ ଉପକୃତ ହୋଇଛନ୍ତି । ସେହିପରି କୃଷି କ୍ଷେତ୍ର ପାଇଁ simplified application for agriculture loan (SAFAL)   ୱେବସାଇଟ୍ ଆଣିବାରେ ଓଡ଼ିଶା ଦେଶରେ ପ୍ରଥମ ରାଜ୍ୟ।  ଏହା ଋଣ ଆଶାୟୀ କୃଷି ଉଦ୍ୟୋଗୀମାନଙ୍କ ପାଇଁ ଏକ ବରଦାନ ସଦୃଶ ବୋଲି ଅର୍ଥମନ୍ତ୍ରୀ କହିଛନ୍ତି।

ପଶୁ ସମ୍ପଦ ଓ ମତ୍ସ୍ୟ ଚାଷ କ୍ଷେତ୍ର ଓଡ଼ିଶା ଚାଷୀଙ୍କ ଆୟ ବୃଦ୍ଧିରେ ପ୍ରମୁଖ ଭୂମିକା ନିର୍ବାହ କରେ। ଏହି କ୍ଷେତ୍ରର ଉନ୍ନତି ପାଇଁ ୧ ହଜାର ୯ଶହ ୩୮ କୋଟି ଟଙ୍କାର ବ୍ୟୟବରାଦ କରିବାକୁ ପ୍ରସ୍ତାବ ଦିଆଯାଇଛି । 

ସେହିପରି ବଜେଟ୍‌ରେ ଜଳସେଚନ ଉପରେ ମଧ୍ୟ ଫୋକସ ଦିଆଯାଇଛି । ବଜେଟ୍‌ରେ ସରକାର   କହିଛନ୍ତି ,ଏହି ଅନୁସାରେ  ୨୦୨୪-୨୫ରେ ୨୫ଟି ଇନଷ୍ଟ୍ରିମ ଷ୍ଟୋରେଜ ଷ୍ଟ୍ରକଚର ନିର୍ମାଣ ହେବ। ଏହି ପ୍ରକଳ୍ପ ପାଇଁ ୮୬୦ କୋଟିର ପ୍ରସ୍ତାବ ରହିଛି। ପାର୍ବତୀଗିରି ଉଠା ଜଳସେଚନ ପ୍ରକଳ୍ପ ଯୋଜନାର ଦ୍ୱିତୀୟ ପର୍ଯ୍ୟାୟରେ ଆସନ୍ତା ୫ ବର୍ଷ ମଧ୍ୟରେ ୧୦୭୫୯ କୋଟି ବ୍ୟୟରେ ୧୭୦ଟି ନୂଆ ପ୍ରକଳ୍ପ ନିର୍ମାଣ ହେବ । ୨୦୨୪-୨୫ ଆର୍ଥିକ ବର୍ଷରେ ଏହି ଯୋଜନା ପାଇଁ ୧୨୨୫ କୋଟିର ବ୍ୟୟବରାଦ କରାଯାଇଛି।