ନୂଆଦିଲ୍ଲୀ ୨୯/୦୨: ବଲିଉଡ୍ରେ ଜଣଙ୍କ ପରେ ଜଣେ କଳାକାର ବିବାହ କରୁଥିବାବେଳେ ଏବେ ଚର୍ଚ୍ଚାକୁ ଆସିଛନ୍ତି ତାପସୀ ପନ୍ନୁ । ତାଜା ଖବର ଅନୁସାରେ, ପୁରୁଷ ବନ୍ଧୁ ମାଥିଆସ ବୋଙ୍କ ସହ ତାପସୀ ଖୁବ୍ଶୀଘ୍ର ବିବାହ ବନ୍ଧନରେ ବାନ୍ଧି ହେବାକୁ ଯାଉଛନ୍ତି । ଉଦୟପୁରରେ ଉଭୟ ଖ୍ରୀଷ୍ଟିଆନ୍ ଓ ଶିଖ ପରମ୍ପରା ଅନୁସାରେ ବିବାହ କରିବେ । ଏଥିରେ କେବଳ ଉଭୟଙ୍କ ପରିବାର ସାମିଲ ହେବେ । କିନ୍ତୁ ତାପସୀ ଏପର୍ଯ୍ୟନ୍ତ ସିନେ ଇଣ୍ଡଷ୍ଟ୍ରିକୁ ନିମନ୍ତ୍ରଣ କରିନାହାନ୍ତି ।
ଏହା ପୂର୍ବରୁ ପ୍ରିୟଙ୍କା ଚୋପ୍ରା, ପରିଣୀତି ଚୋପ୍ରା, କ୍ୟାଟ୍ରିନା କୈଫ୍ ଓ କିଆରା ଆଡ଼ଭାନି ଉଦୟପୁରରେ ବିବାହ କରିଥିଲେ । ତେବେ ଅଦ୍ୟାବଧି ଦୁହିଁଙ୍କ ମଧ୍ୟରୁ କେହି ବିବାହ ବିଷୟରେ ଔପଚାରିକ ଘୋଷଣା କରିନାହାନ୍ତି । ନିକଟରେ ତାପସୀ ମାଥିଆସଙ୍କ ବିଷୟରେ ଖୋଲି କଥା ହୋଇଛନ୍ତି । ନିଜର ପ୍ରଥମ ବଲିଉଡ୍ ଫିଲ୍ମ ‘ଚଶ୍ମେ ବଦ୍ଦୂର୍’ର ସୁଟିଂ ସମୟରେ ଉଭୟଙ୍କର ଭେଟ ହୋଇଥିଲା । ୪୩ ବର୍ଷୀୟ ମାଥିଆସ୍ ଡେନ୍ମାର୍କର ଜଣେ ବ୍ୟାଡ୍ମିଣ୍ଟନ୍ ଖେଳାଳି । ସେ ଦୁଇ ଥର ୟୁରୋପିଆନ୍ ଚାମ୍ପିଅନ୍ ଓ ଅଲିମ୍ପିକ୍ ମେଡାଲ ପାଇଛନ୍ତି । ୨୦୨୦ ମସିହାରେ ସେ ବ୍ୟାଡ୍ମିଣ୍ଟନ୍ରୁ ସନ୍ନ୍ୟାସ ନେଇଥିଲେ ।
ତାପସୀ-ମାଥିଆସ ଗତ ୧୦ ବର୍ଷ ହେଲା ଏକାଠି ଅଛନ୍ତି । ଉଭୟ ସର୍ବଦା ଲାଇମ୍ଲାଇଟ୍ରୁ ଦୂରରେ ରହି ନିଜ ସମ୍ପର୍କକୁ ବ୍ୟକ୍ତିଗତ ରଖିଛନ୍ତି । ତାପସୀ ମାଥିଆସଙ୍କ ସହ ଫଟୋ ଓ ଭିଡିଓ ସୋସିଆଲ ମିଡିଆରେ ଶେୟାର କରିଥାନ୍ତି । ଖୁବ୍ଶୀଘ୍ର ‘ହସୀନ୍ ଦିଲ୍ରୁବା’ର ସିକ୍ୱେଲରେ ସେ ନଜର ଆସିବେ । ଫିଲ୍ମର ଟାଇଟଲ୍ ‘ଫିର୍ ଆୟି ହସୀନ୍ ଦିଲ୍ରୁବା’ । ଏଥିରେ ସେ ବିକ୍ରାନ୍ତ ମେସି, ସନ୍ନି କୌଶଲ ଓ ଜିମ୍ମି ଶେରଗିଲଙ୍କ ସହ ସ୍କ୍ରିନ୍ ଶେୟାର କରିବେ । ଫିଲ୍ମର ରିଲିଜ୍ ତାରିଖ ଅଦ୍ୟାବଧି ଘୋଷଣା ହୋଇନାହିଁ ।
