ନୂଆଦିଲ୍ଲୀ ୨୬/୦୨: ଆନ୍ଧ୍ରପ୍ରଦେଶର ଜଣେ ବ୍ୟକ୍ତି ବିଶ୍ୱର ସବୁଠୁ ଛୋଟ ୱାଶିଙ୍ଗ୍ ମେସିନ୍ ପ୍ରସ୍ତୁତ କରି ଗିନିଜ୍ ରେକର୍ଡରେ ସ୍ଥାନ ପାଇଛନ୍ତି । ସେ ହେଲେ ଟୁନି ସହରର ବାସିନ୍ଦା ସାଇ ତିରୁମଲାନିଡି । ସେ ଯେଉଁ ୱାଶିଙ୍ଗ୍ ମେସିନ୍ ପ୍ରସ୍ତୁତ କରିଛନ୍ତି ତାର ଆକାର ଏକ ଦିଆସିଲି ଖୋଳ ଭଳି । ଗିନିଜ୍ ରେକର୍ଡ କର୍ତ୍ତୁପକ୍ଷ ନିଜ ଇନ୍ଷ୍ଟାଗ୍ରାମ ଆକାଉଣ୍ଟରେ ଏହାର ଭିଡିଓ ମଧ୍ୟ ଶେୟାର କରିଛନ୍ତି ।
ଭିଡିଓରେ ତିରୁମଲାନିଡିଙ୍କୁ ଛୋଟ ଛୋଟ ପାର୍ଟସ୍ ବ୍ୟବହାର କରି ୱାଶିଙ୍ଗ୍ ମେସିନ୍ ପ୍ରସ୍ତୁତ କରୁଥିବା ଦେଖିବାକୁ ମିଳୁଛି । ସେ ମେସିନ୍ର ସ୍ୱିଚ୍ ଅନ୍ କରିବା ସହିତ ତାକୁ ଚଳାଇ ବି ଦେଖାଇଛନ୍ତି ।ତିରୁମଲାନିଡି ମେସିନ୍ରେ ଦୁଇ ଖଣ୍ଡ ଛୋଟ କପଡ଼ା, ପାଣି ଓ ପୋଷାକ ସଫା ଲାଗି ଡିଟରଜେଣ୍ଟ ପକାଇଥିବାବେଳେ ସଫା ହୋଇସାରିବା ପରେ ତାକୁ କାଢ଼ି ଶୁଖାଉଥିବା ଦେଖିବାକୁ ମିଳିଛି । ଗତବର୍ଷ ଜୁନ୍ ୧୭ ତାରିଖରେ ସେ ଏହି ସଫଳତା ହାସଲ କରିଥିଲେ । ତେବେ ଗିନିଜ୍ ରେକର୍ଡ କର୍ତ୍ତୁପକ୍ଷ ନିକଟରେ ନିଜର ଆନୁଷ୍ଠାନିକ ଇନ୍ଷ୍ଟାଗ୍ରାମ ଆକାଉଣ୍ଟରେ ଏହାର ଭିଡିଓ ଶେୟାର କରିବା ପରେ ଘଟଣାଟି ସାମ୍ନାକୁ ଆସିଛି । ଭିଡିଓ ଦେଖିବା ପରେ ସୋସିଆଲ ମିଡିଆରେ ବହୁ ଲୋକ ତାଙ୍କୁ ପ୍ରଶଂସା କରୁଛନ୍ତି ।
