ନିମବାହାଳି, ୨୩।୧୧ : ଢେଙ୍କାନାଳ ରୁଙ୍ଗଟା ମାଇନ୍ସ ଷ୍ଟିଲପ୍ଲାଣ୍ଟ କାରଖାନାରୁ ଲୋଡିଙ୍ଗ ଦାବିରେ ଧାରଣାରେ ବସିଲେ ଟ୍ରକ୍ ମାଲିକ। ମୋଟଙ୍ଗା ଥାନା ଅଧୀନ ରୁଙ୍ଗଟା ରାସ୍ତାରେ ବ୍ରାହ୍ମଣୀ ଟ୍ରକ ଓନର ୱେଲଫେୟାର ଆସୋସିଏସନ ପକ୍ଷରୁ ପୁଣି ଥରେ ଧାରଣା ଦିଆଯାଇଛି ଫଳରେ କାରଖାନାକୁ ଯାତାୟାତ କରୁଥିବା ଟ୍ରକ୍ ଗୁଡ଼ିକ ରାସ୍ତାରେ ଅଟକି ରହିଛି। 

ସୂଚନାଯୋଗ୍ୟ, ଆଜକୁ ବହୁ ଦିନ ହେଲା ରୁଙ୍ଗଟା କମ୍ପାନୀ ଟ୍ରକ୍ ଲୋଡିଙ୍ଗ ଦେବାକୁ ବିଭିନ୍ନ ପ୍ରକାରର ଆଳ ଦେଖାଇ ପ୍ରତିଶ୍ରୁତି ଦେଇ ଆସୁଥିବା ବେଳେ ବାହାର ଅଞ୍ଚଳରେ ଟ୍ରକକୁ ଲୋଡ଼ିଙ୍ଗ ଦିଆଯାଉଛି। ସ୍ଥାନୀୟ ଅଞ୍ଚଳର ଟ୍ରକକୁ ଲୋଡିଙ୍ଗ ଦେବା ବଦଳରେ ବାରମ୍ବାର କାରଖାନା କର୍ତ୍ତୃପକ୍ଷ ପ୍ରତାରଣା କରି ଆସୁଛନ୍ତି । ଫଳରେ ଉତ୍ୟକ୍ତ ଟ୍ରକ ମାଲିକମାନେ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତି ରଖି ଶାନ୍ତିପୂର୍ଣ୍ଣ ଭାବେ ଧାରଣା ଦେଇଛନ୍ତି । ଘଟଣା ସ୍ଥଳରେ ମୋଟଙ୍ଗା ପୁଲିସ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରୁଥିବା ବେଳେ ସେମାନେ ଧାରଣାରେ ବସି ରହିଛନ୍ତି।