ହାଇଦ୍ରାବାଦ,୦୮/୦୯: ଗତ ମାସ ଟମାଟୋ ଦର ଆକାଶଛୁଆଁ ଥିଲା । ସାରା ଦେଶରେ  କିଲୋ ପିଛା ୨୦୦ ଟଙ୍କାରୁ ଅଧିକ ମୂଲ୍ୟରେ ବିକ୍ରି  ହେଉଥିଲା । ଲୋକଙ୍କ ହାଣ୍ଡିଶାଳରୁ ଟମାଟୋ ଉଭାନ୍‌  ହୋଇଯାଇଥିଲା । ଏବେ କିନ୍ତୁ ଆନ୍ଧ୍ରପ୍ରଦେଶରେ ଭିନ୍ନ  ଦୃଶ୍ୟ ଦେଖିବାକୁ ମିଳିଛି। ଟମାଟୋ କିଲୋ ପିଛା ୪  ଟଙ୍କାରେ ବିକ୍ରି ହେଉଛି । 

ଏଥିରେ ବ୍ୟତିବ୍ୟସ୍ତ ହୋଇ  ରାଜ୍ୟର କୁରନୂଲରେ ଚାଷୀମାନେ ଅମଳ କରିଥିବା  ଟମାଟୋକୁ ରାଜରାସ୍ତାରେ ଗଦା କରିଛନ୍ତି । ଟମାଟୋ ଚାଷରେ କରିଥିବା ପରିଶ୍ରମ ଓ ପରିବହନକୁ ଦୃଷ୍ଟିରେ  ରଖି ସେମାନଙ୍କର ବଡ଼ ଧରଣର କ୍ଷତି ହୋଇଥିବା  ଚାଷୀମାନେ କହିଛନ୍ତି । 

କୁରନୂଲ ଜିଲ୍ଲାର ନିରାଶ ଚାଷୀ  କହିଛନ୍ତି, ଟମାଟୋର ବର୍ତ୍ତମାନ ମୂଲ୍ୟ ପାଇଁ ସେମାନେ  ମୂଳ ଧନ ମଧ୍ୟ ଭରଣା କରି ପାରିନାହାନ୍ତି । ହାଟକୁ ଆଣିଥିବା ଟମାଟୋ ବିକ୍ରି କରି ନ ପାରି ସ୍ଥାନୀୟ ହାଟ  ନିକଟସ୍ଥ ରାସ୍ତାରେ ସେଗୁଡ଼ିକୁ ଗଦା କରିଦେଇଛନ୍ତି ।