ରାଞ୍ଚି: ଝାଡ଼ଖଣ୍ଡର ଜାମତାରା ଜିଲ୍ଲାରେ ବୁଧବାର ଭୟଙ୍କର ଟ୍ରେନ୍ ଦୁର୍ଘଟଣା ଘଟିଛି । କଲଝରିଆ ନିକଟରେ ୧୨ ଜଣ ଯାତ୍ରୀଙ୍କ ଉପରେ ଟ୍ରେନ୍ ମାଡ଼ିଯାଇଥିବା ଜଣାପଡ଼ିଛି । ଏହି ଦୁର୍ଘଟଣାରେ ଅନେକ ଗୁରୁତର ହୋଇଥିବା ବେଳେ ମୃତ୍ୟୁ ସଂଖ୍ୟା ବଢ଼ିପାରେ ବୋଲି କୁହାଯାଉଛି । ମିଳିଥିବା ପ୍ରାଥମିତ ସୂଚନା ଅନୁସାରେ ମୃତାହତ ଅଙ୍ଗ ଏକ୍ସପ୍ରେସ୍ରେ ଥିଲେ । ଟ୍ରେନ୍ରେ ନିଆଁ ଲାଗିଥିବା ନେଇ ଆଶଙ୍କା କରି ଲୋକୋ ପାଇଲଟ୍ ଟ୍ରେନ୍କୁ ଅଟକାଇଥିଲେ । ସେପଟେ ଏହି ଖବର ପ୍ରଚାର ହୋଇଯିବା ପରେ ଭୟରେ ଅନେକ ଯାତ୍ରୀ ଟ୍ରେନ୍ରୁ ଟ୍ରାକକୁ ଡେଇଁ ପଡ଼ିଥିଲେ । ଅନ୍ୟ ଟ୍ରାକରେ ଆସୁଥିବା ଝାଝା-ଆସାନସୋଲ ଟ୍ରେନ୍ ସେମାନଙ୍କ ଉପରେ ମାଡ଼ିଯାଇଥିଲା ।
ଟ୍ରେନ୍ ଦୁର୍ଘଟଣା ନେଇ ଖବର ମିଳିବା ପରେ, ପୋଲିସ ସମେତ ସ୍ଥାନୀୟ ପ୍ରଶାସନ ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟ ଜାରି ରଖିଛନ୍ତି । ସେପଟେ ସ୍ଥାନୀୟ ଲୋକଙ୍କ କହିବା ଅନୁସାରେ, ଯାନ୍ତ୍ରିକ ତ୍ରୁଟି ଯୋଗୁଁ ଆସାନସୋଲ୍-ଝାଝା ପାସେଞ୍ଜର ଟ୍ରେନ୍ ଟ୍ରାକ୍ରେ ରୋକିଥିଲା । ଏହି ସମୟରେ କିଛି ଯାତ୍ରୀ ଟ୍ରେନ୍ରୁ ଓହ୍ଲାଇ ଟ୍ରାକ୍ ଉପରେ ଛିଡ଼ା ହୋଇଥିଲେ । ଠିକ ଏହି ସମୟରେ ଭାଗଲପୁର-ଯଶୋବନ୍ତପୁର ଏକ୍ସପ୍ରେସ ଟ୍ରାକରେ ଛିଡ଼ା ହୋଇଥିବା ଯାତ୍ରୀଙ୍କ ଉପରେ ମାଡ଼ି ଯାଇଥିଲା ।
ଏଥିରେ ଏକାଧିକ ଲୋକଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଆହତଙ୍କୁ ଆମ୍ବୁଲାନ୍ସ ଯୋଗେ ହସ୍ପିଟାଲ ନିଆଯାଇଛି । ମୃତ୍ୟୁସଂଖ୍ୟାକୁ ନେଇ କୌଣସି ସ୍ପଷ୍ଟ ସୂଚନା ଆସିନଥିବା ବେଳେ ଖୁବଶୀଘ୍ର ଏନେଇ ଖବର ସାମ୍ନାକୁ ଆସିବ । ଅନ୍ୟପକ୍ଷରେ ଏହି ରେଳ ଦୁର୍ଘଟଣା ସଂପର୍କରେ ମଧ୍ୟ ବିଭିନ୍ନ ଗଣମାଧ୍ୟମରେ ଭିନ୍ନ ଭିନ୍ନ ଚର୍ଚ୍ଚା ଜାରି ରହିଛି । ଏହାକୁ ନେଇ ସ୍ପଷ୍ଟ ସୂଚନା ଖୁବଶୀଘ୍ର ମିଳିବ ବାେଲି ବିଶ୍ବାସ କରାଯାଉଛି ।