ନୂଆଦିଲ୍ଲୀ: ବିଲ୍‌ ଉପରେ ଅଧିକ ଟଙ୍କା ଦେଇଥିବା ନେଇ ଜଣେ ରେଳ ଯାତ୍ରୀଙ୍କ ଅଭିଯୋଗ ପରେ ଭାରତୀୟ ରେଳ କ୍ୟାଟେରିଂ ଆଣ୍ଡ ଟୁରିଜିମ୍ କର୍ପୋରେସନ୍ (ଆଇଆରସିଟିସି) ଶନିବାର ଏକ ଟ୍ରେନ୍ ଖାଦ୍ୟ ଯୋଗାଣକାରୀ ସଂସ୍ଥା ଉପରେ ଜରିମାନା ଲଗାଇଛି । ଅଭିଯୋଗକାରୀଙ୍କ ଅନୁସାରେ, ଟ୍ରେନ୍‌ରେ ସେ ଭେଜ୍‌ ଥାଳି ଅର୍ଡର କରିଥିଲେ । ହେଲେ ଖାଦ୍ୟ ପରଷୁଥିବା ସଂସ୍ଥାର ଜଣେ କର୍ମଚାରୀ କହିଥିଲେ ଯେ, ଏଥିପାଇଁ ୧୫୦ ଟଙ୍କା ଦେବାକୁ ପଡ଼ିବ ।

ଏହା ସହ ସେ ଆହୁରି ଲେଖିଛନ୍ତି ‘ଆମେ ତାଙ୍କୁ ସ୍ପଷ୍ଟ ଭାବରେ କହିଲୁ ଯେ ଆମକୁ ବିଲ୍ ଦରକାର । ଯେତେବେଳେ ସେ ବିଲ୍ ଆଣିଥିଲେ ସେତେବେଳେ ସେ ଏହି ପରିମାଣକୁ ଦୁଇ ଭାଗ କରିଥିଲେ । ଭେଜ୍ ଥାଳି- ୮୦ ଟଙ୍କା + ପନିର ତରକାରୀ ୭୦ ଟଙ୍କା = ୧୫୦ ଟଙ୍କା ।’ ଏନେଇ ଯାତ୍ରୀଜଣଙ୍କ IRCTCକୁ ଟ୍ୟାଗ କରି ଅଭିଯୋଗ କରିଥିଲେ । ସେପଟେ କେବଳ ଭେଜ୍‌ ଥାଳି (ନିରାମିଷ ମିଲ୍‌) ଲାଗି ବିଲ କରିବାକୁ ଯାତ୍ରୀ ଜଣଙ୍କ ଦାବି କରିବାରୁ ସଂପୃକ୍ତ କର୍ମଚାରୀ  ଏକ ଘଣ୍ଟା ଧରି ଯୁକ୍ତିତର୍କ କରିଥିବା ନେଇ ସେ ଅଭିଯୋଗ କରିଥିଲେ ।

ଯାତ୍ରଜଣଙ୍କ ଆହୁରି ଲେଖିଥିଲେ ଯେ, ‘ଏକ ଘଣ୍ଟା ପରେ ଜଣେ ଅଧିକାରୀ ଏଥିରେ ହସ୍ତକ୍ଷେପ କରି ଭୁଲ ବିଲ୍ ଦିଆଯାଇଛି ବୋଲି ସ୍ୱୀକାର କରିଥିଲେ । ଭେଜ୍ ଥାଳି ପାଇଁ ୮୦ ଟଙ୍କା ସ୍ଥିର କରିଥିଲେ । ସେ ଆହୁରି ମଧ୍ୟ କହିଥିଲେ ଯେ, ଆପଣ ୮୦ ଟଙ୍କା ହିଁ ଦିଅନ୍ତୁ ।’ ଏହା ସହ କର୍ମଚାରୀମାନେ ଖାଦ୍ୟ ଦେବା ପରେ ବିଲରେ ଅନ୍ୟାନ୍ୟ ଖର୍ଚ୍ଚ ଯୋଡି ଜନସାଧାରଣଙ୍କୁ ଲୁଟ କରୁଛନ୍ତି। ଦୟାକରି ଏହାକୁ ଦେଖନ୍ତୁ କାରଣ ଏହି ପ୍ରକାର ଆଚରଣ ଭାରତୀୟ ରେଳବାଇର ଭାବାମୂର୍ତ୍ତିକୁ କ୍ଷୁର୍ଣ୍ଣ କରୁଛି ବୋଲି ଯାତ୍ରୀଜଣଙ୍କ ଲେଖିଥିଲେ ।

ତେବେ ଯାତ୍ରୀଙ୍କ ଅଭିଯୋଗ ପାଇବା ପରେ ସଂପୃକ୍ତ ଖାଦ୍ୟ ପ୍ରଦାନକାରୀ ସଂସ୍ଥା ବିରୁଦ୍ଧରେ କାର୍ଯ୍ୟନୁଷ୍ଠାନ ଗ୍ରହଣ କରିଛି ଆଇଆରସିଟିସି । ଏପରିକି ଯେଉଁ କର୍ମଚାରୀ ଅଧିକ ଟଙ୍କା ନେବାକୁ ଦାବି କରିଥିଲେ ତାଙ୍କର ଲାଇସେନ୍ସ ରଦ୍ଦ କରାଯାଇଥିବା ଜଣାପଡ଼ିଛି ।