ବ୍ରହ୍ମପୁର, ୩/୧୧ : ଅବକାରୀ ଗୋଇନ୍ଦା ଉପ ଅଧିକ୍ଷକ (ଡ଼ିଏସପି)କୁବେର ସେଠୀଙ୍କ ନେତୃତ୍ୱରେ ଏକ ଟିମ ଶୁକ୍ରବାର ଫାଷ୍ଟଗେଟ ନିକଟରୁ ମୁମ୍ବାଇ ଚାଲାଣ ପୂର୍ବରୁ ଦୁଇ ଜଣ ଯୁବକଙ୍କୁ କାବୁ କରିଛି । ବୋଲେରୋ ଗାଡ଼ି ଭିତରେ ଥିବା ୪୫କେଜି ଗଞ୍ଜେଇ ଜବତ ହୋଇଛି। ସେମାନେ ବେଆଇନ ଭାବେ ଗଜପତିରୁ ଗଞ୍ଜେଇ ଆଣି ବ୍ରହ୍ମପୁର ଦେଇ ମୁମ୍ବାଇ ଚାଲାଣ କରିଥାନ୍ତେ ବୋଲି ଟିମ୍ ଜାଣିବାକୁ ପାଇଛି । ଅଭିଯୁକ୍ତମାନେ ହେଲେ ମୁମ୍ବାଇର ଅବୁ ଅଶ୍ଵଦ ଶେଖ(୩୬) ଓ ଜାଫର ଜାବର ଶେଖ(୨୬)। ସେମାନେ ଅଧିକ ଅର୍ଥ ଲାଳସାରେ ଏଭଳି ଅପରାଧିକ କାର୍ଯ୍ୟରେ ଲିପ୍ତ ଥିଲେ ବୋଲି ଜଣାପଡିଛି । କେଶ ନଂ ୫୬୫/୨୩-୨୪ରେ  ଅଭିଯୁକ୍ତ ଦ୍ୱୟଙ୍କୁ କୋର୍ଟ ଚାଲାଣ କରାଯାଇଛି । 

ପ୍ରକାଶ ଯେ, ବ୍ରହ୍ମପୁର ଦେଇ ଗଞ୍ଜେଇ ଚାଲାଣ ହେଉଥିବା ନେଇ ଖବର ମିଳିଥିଲା । ଅବକାରୀ ଡିଏସପିଙ୍କ ନେତୃତ୍ୱରେ ଟିମ୍ ଫାଷ୍ଟଗେଟରେ ଯାନବାହନ ଯାଞ୍ଚ କରିଥିଲେ । ଏକ ବୋଲେରୋ ନମ୍ବର (ଏମଏଚ ୦୨ - ବିଜି - ୧୪୩୭)ଙ୍କୁ ଅଟକାଇ ଟିମ ଯାଞ୍ଚ କରିଥିଲା। ସେଥିରେ ଗଞ୍ଜେଇ ଭର୍ତ୍ତି ହୋଇଥିବା ଦେଖିବାକୁ ମିଳିଥିଲା । ଜବତ ଗଞ୍ଜେଇ ଓ ଗାଡ଼ିର ମୂଲ୍ୟ ୧୫ଲକ୍ଷ ଟଙ୍କା ହେବ ବୋଲି ସୂଚନା ଦିଆଯାଇଛି ।