ବୁର୍ଲା,୨୯/୦୨: ବିଶୃଙ୍ଖଳିତ ଆଚରଣ ପାଇଁ ବୁର୍ଲା ବୀର ସୁରେନ୍ଦ୍ର ସାଏ ବୈଷୟିକ ବିଶ୍ୱବିଦ୍ୟାଳୟ (ଭିସୁଟ୍) ର ସହକାରୀ ପ୍ରଫେସର ଶିବପ୍ରସାଦ ପାଣିଗ୍ରାହୀଙ୍କୁ ବୁଧବାର ଚାକିରିରୁ ବାଧ୍ୟତାମୂଳକ ଅବସର ଦିଆଯାଇଛି । ଭିସୁଟ୍ ଇଲେକ୍ଟ୍ରିକାଲ୍ ଇଞ୍ଜିନିୟରିଂ ବିଭାଗର ସହକାରୀ ପ୍ରଫେସର ଥିଲେ ଶିବପ୍ରସାଦ ପାଣିଗ୍ରାହୀ । ବିଶୃଙ୍ଖଳା ପାଇଁ ପୂର୍ବରୁ ସେ ନିଲମ୍ବିତ ହୋଇଥିଲେ । ଜଣେ ସହକାରୀ ପ୍ରଫେସରଙ୍କୁ ବାଧ୍ୟତାମୂଳକ ଅବସର ଦିଆଯିବାରେ ଭିସୁଟ୍ ଇତିହାସରେ ଏହା ହେଉଛି ଦ୍ୱିତୀୟ ଘଟଣା । ପୂର୍ବରୁ ଗତ ଅକ୍ଟୋବରରେ ପ୍ରଫେସର ପାଣିଗ୍ରାହୀଙ୍କ ପତ୍ନୀ ତଥା ଭିସୁଟ୍ର କମ୍ପ୍ୟୁଟର ଆପ୍ଲିକେସନ୍ ବିଭାଗର ସହକାରୀ ପ୍ରଫେସର ସସ୍ମିତା ପାଢ଼ୀଙ୍କୁ ମଧ୍ୟ ବିଶୃଙ୍ଖଳିତ ଆଚରଣ ପାଇଁ ବାଧ୍ୟତାମୂଳକ ଅବସର ଦିଆଯାଇଥିଲା ।
ସୂଚନା ମୁତାବିକ, ପ୍ରଫେସର ପାଣିଗ୍ରାହୀଙ୍କୁ ପୂର୍ବରୁ ବିଶୃଙ୍ଖଳିତ ଆଚରଣ ପାଇଁ ନିଲମ୍ବିତ କରାଯାଇଥିଲା । ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ବିଭାଗୀୟ ତଦନ୍ତ ହୋଇଥିଲା । ତଦନ୍ତରେ ସମସ୍ତ ଦୋଷାରୋପ ସତ୍ୟ ପ୍ରମାଣିତ ହେବା ପରେ ଅଭିଯୋଗର ଦସ୍ତାବିଜ୍କୁ ବିଚାରକୁ ନେଇ ବିଶ୍ୱବିଦ୍ୟାଳୟ ବୋର୍ଡ ଅଫ୍ ମ୍ୟାନେଜମେଣ୍ଟ ତାଙ୍କୁ ଚାକିରିରୁ ବାଧ୍ୟତାମୂଳକ ଅବସର ଦେବା ପାଇଁ ନିଷ୍ପତ୍ତି ନେଇଥିବା କର୍ତ୍ତୃପକ୍ଷ ସୂଚନା ଦେଇଛନ୍ତି । ଏହି ନିଷ୍ପତ୍ତି ବିଶ୍ୱବିଦ୍ୟାଳୟର ନିୟମ ଓ ଓଡ଼ିଶା ସରକାରଙ୍କ ଚାକିରି ସର୍ତ୍ତାବଳୀ ଅନୁସାରେ ଗ୍ରହଣ କରାଯାଇଥିବା କୁହାଯାଉଛି ।