ବେଙ୍ଗାଲୁରୁ,୨୫/୦୨: ଘରୋଇ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର ଓ ୟୁପି ୱାରିୟର୍ସ ମଧ୍ୟରେ ଅନୁଷ୍ଠିତ ଡବ୍ଲ୍ୟୁପିଏଲ୍ ମୁକାବିଲାରେ ରୟାଲ୍ ଚ୍ୟାଲେଞ୍ଜର୍ସ ୨ରନ୍ରେ ରୋମାଞ୍ଚକର ବିଜୟ ହାସଲ କରିଛି । ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ରୟାଲ୍ ଚ୍ୟାଲେଞ୍ଜର୍ସ ୬ ୱିକେଟ୍ ବିନିମୟରେ୧୫୭ ରନ୍ ସଂଗ୍ରହ କରିଥିଲା । ଜବାବରେ ୟୁପି ୱାରିୟର୍ସ ୭ୱିକେଟ୍ ହରାଇ ୧୫୫ ରନ୍ କରିବାକୁ ସକ୍ଷମ ହୋଇଥିଲା ।
ଚିନ୍ନାସ୍ୱାମୀ ଷ୍ଟାଡିୟମ୍ରେ ୧୫୮ରନ୍ ଲକ୍ଷ୍ୟ ହାସଲ କରିବା କଷ୍ଟକର ନୁହେଁ । ୟୁପି ୱାରିୟର୍ସ ନିକଟରେ ଯଥେଷ୍ଟ ଶକ୍ତିଶାଳୀ ବ୍ୟାଟିଂ ବିଭାଗ ରହିଥିଲା । ମାତ୍ର ଲେଗ୍ ସ୍ପିନର ଆଶା ଶୋଭନାଙ୍କ ଯାଦୁକରୀ ସ୍ପିନ୍ ବୋଲିଂର ମୁକାବିଲା କରିପାରି ନଥିଲା ୱାରିୟର୍ସ । ୧୭ତମ ଓଭରରେ ଆଶା ୩ଟି ୱିକେଟ୍ ନେଇ ବିଜୟ ଛଡ଼ାଇ ଆଣିଥିଲେ ।
ୱାରିୟର୍ସ ଓପନର ତଥା ଅଧିନାୟିକା ଆଲିସା ହିଲି ୫ ରନ୍ କରି ଆଉଟ୍ ହୋଇଥିଲେ । ଅନ୍ୟ ଓପନର ବୃନ୍ଦା ଦିନେଶ ଓ ତାହିଲା ମ୍ୟାକ୍ଗ୍ରା ଲଢୁଆ ବ୍ୟାଟିଂ କରି ଦଳୀୟ ସ୍କୋରକୁ ୪୮ରେ ପହଞ୍ଚାଇଥିଲେ । ନବମ ଓଭରରେ ଆଶା ଉଭୟଙ୍କୁ ଆଉଟ୍ କରିଥିଲେ । ଏହାପରେ ଗ୍ରେସ ହ୍ୟାରିସ ଓ ଶ୍ୱେତା ସେରାୱତ ଦମ୍ଦାର ବ୍ୟାଟିଂ କରି ୭୭ ରନ୍ର ଭାଗିଦାରୀ ଗଠନ କରିବା ଫଳରେ ୟୁପି ବିଜୟ ନିକଟତର ହୋଇଥିଲା।
୧୬ ଓଭର ଶେଷ ସୁଦ୍ଧା ୟୁପି ୧୨୬ ରନ୍ ସଂଗ୍ରହ କରିନେଇଥିଲା । ୧୭ତମ ଓଭରରେ ଆଶା ଆଉ ୩ଟି ୱିକେଟ୍ ନେଇ ବିପର୍ଯ୍ୟୟ ଘଟାଇଥିଲେ । ଶ୍ୱେତା ୩୧, ଗ୍ରେସ ୩୮ ଓ କିରଣ ନାଭଗିରେ ୧ ରନ୍ କରି ଆଉଟ୍ ହୋଇଥିଳେ । ତଥାପି ୟୁପି ଲଢେଇ ଜାରି ରଖିଥିଲା। ଅନ୍ତିମ ଓଭରରେ ବିଜୟ ପାଇଁ ୧୧ ରନ୍ ଆବଶ୍ୟକ ହେଉଥିଲା । କ୍ରିଜରେ ଥିବା ଦୀପ୍ତି ଶର୍ମା ବହୁ ପ୍ରୟାସ କରିଥିଲେ ହେଁ ଜିତାଇ ପାରି ନଥିଲେ । ମାତ୍ର ୨ ରନ୍ରେ ଦଳ ପରାଜିତ ହୋଇଥିଲା ।
ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେବା ୟୁପି ୱାରିୟର୍ସ ଫିଲ୍ଡିଂ ନିଷ୍ପତ୍ତି ନେଇଥିଲା । ରୟାଲ୍ ଚ୍ୟାଲେଞ୍ଜର୍ସ ୬ୱିକେଟ୍ ହରାଇ ୧୫୭ ରନ୍ କରିଥିଲା। ଦଳ ପକ୍ଷରୁ ରିଚା ଘୋଷ ୩୭ଟି ବଲ୍ରୁ ୬୨(୧୨ଚୌକା) ରନ୍ କରିଥିଲେ । ସେହିପରି ଏସ ମେଘନା ୫୩(୭ଚୌକା, ୧ଛକା) ରନ୍ କରିଥିଲେ ।
