ଫିରିଙ୍ଗିଆ,୨୧/୯ :  କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ କାର୍ଯ୍ୟାଳୟ ପରିସରରେ ବ୍ଲକ ସ୍ତରୀୟ ମନରେଗା ଜନ ଶୁଣାଣି କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି I  ବ୍ଲକରେ କାର୍ଯ୍ୟରତ ମନରେଗା ସମ୍ପ୍ରସାରଣ ଅଧିକାରୀ ସୁମନ୍ତ ଉଠାଣ ସିଂଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଜନଶୁଣାଣି କାର୍ଯ୍ୟକ୍ରମକୁ ପଞ୍ଚାୟତ ସମିତି ଅଧ୍ୟକ୍ଷା ନମିତା କହଁର ମୁଖ୍ୟ ଅତିଥି ଭାବେ  ଯୋଗଦେଇ ଅନୁଷ୍ଠାନିକ ଭାବରେ ଉଦଘାଟନ କରିଥିଲେ ।

ଅନ୍ୟମାନଙ୍କ ମଧ୍ୟରେ ଜିଲ୍ଲା ସାମାଜିକ ସମୀକ୍ଷକ ଦୁଃଶାସନ ସିଂ, ସହକାରୀ ଯନ୍ତ୍ରୀ ଜୟପ୍ରକାଶ ଜେନା, ଜନଶୁଣାଣି କମିଟି ସଦସ୍ୟ ମହାଦେବ ସାହୁ ଓ ଅକ୍ଷୟ ନାୟକ ପ୍ରମୁଖ ଉପସ୍ଥିତି ଥିଲେ I ଅନ୍ୟମାନଙ୍କ ମଧ୍ୟରେ ବ୍ଲକ ଅଧୀନରେ କାର୍ଯ୍ୟରତ ବିଭିନ୍ନ ବିଭାଗ ଯଥା ଆଦିବାସୀ ଉନ୍ନୟନ ବିଭାଗ, କୃଷି ବିଭାଗ, ବନ ବିଭାଗ, ଉଠା ଜଳସେଚନ ବିଭାଗ, ମୃତ୍ତିକା ସଂରକ୍ଷଣ ବିଭାଗ ସହ ସମସ୍ତ ବିଭାଗର ସରକାରୀ କର୍ମଚାରୀମାନେ ଉପସ୍ଥିତ ରହି ନିଜ ନିଜ ବିଭାଗ ଅଧୀନରେ ମହାତ୍ମା ଗାନ୍ଧୀ କର୍ମ ନିଯୁକ୍ତି ଯୋଜନାରେ କିଭଳି କାର୍ଯ୍ୟ ହେଉଛି ତା ଉପରେ ବିବରଣୀ ରଖିଥିଲେ I ସେପଟେ ଏହି କାର୍ଯ୍ୟକ୍ରମ ଅବସରରେ ମନରେଗା କାମରେ ଉତ୍ତମ ପ୍ରଦର୍ଶନ କରିଥିବା ଡିଣ୍ଡିରାଗାଁ, କେଳାପଡା, ଡ଼ିମିରିଗୁଡା ଓ ବାନ୍ଧଗଡ଼ ପଞ୍ଚାୟତକୁ ପୁରସ୍କୃତ କରାଯାଇଥିବାବେଳେ ୩ଶହ ଦିନ ପୂରଣ କରିଥିବା ଡିଣ୍ଡିରାଗାଁ ପଞ୍ଚାୟତର ନନ୍ଦ କହଁର ଓ କନିଷ୍ଠ କହଁର, କେଳାପଡା ପଞ୍ଚାୟତର କବିରାଜ କହଁର, ପବିଙ୍ଗିଆ ପଂଚାୟତର ମାଲେରା କହଁରଙ୍କୁ ଏହି କାର୍ଯ୍ୟକ୍ରମ ଅବସରରେ ପଞ୍ଚାୟତ ସମିତି ତରଫରୁ ସମ୍ମାନିତ କରାଯାଇଥିଲା I 

କାର୍ଯ୍ୟକ୍ରମରେ ବ୍ଲକର ସମୁଦାୟ ୨୪ଟି ପଞ୍ଚାୟତରେ ମନରେଗା ଯୋଜନାରେ କ‘ଣ କ’ଣ କାମ ହୋଇଛି ତାର ବାର୍ଷିକ ବିବରଣୀ ପଞ୍ଚାୟତ ଅଧିକାରୀମାନେ ପାଠ କରିଥିଲେ I ସେପଟେ କାର୍ଯ୍ୟକ୍ରମରେ ବିଭିନ୍ନ ପଞ୍ଚାୟତର ଗାଁ ସାଥିମାନଙ୍କ ସହ ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀ, ବିବଫଟିମାନଙ୍କ ସହ ସମସ୍ତ ସିଆରପି ଓ ଏମ୍ବିକେମାନେ ଉପସ୍ଥିତ ଥିଲେ I କାର୍ଯ୍ୟକ୍ରମ ଶେଷରେ ଫିରିଙ୍ଗିଆ ବ୍ଲକରେ ହୋଇଥିବା ମନ ରେଗା କାମରେ ସଫଳ ରୂପାୟନ ପାଇଁ ସମସ୍ତ ଉପସ୍ଥିତ ବ୍ୟକ୍ତି ବିଶେଷଙ୍କୁ ଏପିଓ ଧନ୍ୟବାଦ ଦେବା ସହ ସଭା ସାଙ୍ଗ କରିଥିଲେ I