କଟକ, ୩୦।୪: କଟକ ଦୋଳମୁଣ୍ଡାଇ ଛକରେ ଟ୍ରକ୍ ଚକା ତଳେ ଚାପି ହୋଇ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିବା ସୂଚନା । ସୋମବାର ରାତିରେ ଏହି ଦୁର୍ଘଟଣା ଘଟିଥିବା ବେଳେ ନୋ ଏଣ୍ଟ୍ରି ସମୟରେ କିଭଳି ସହର ଭିତରକୁ ଟ୍ରକ୍ ପଶୁଛି ତାକୁ ନେଇ ଉତ୍ତେଜନା ଦେଖାଦେବା ସହ ଲୋକମାନେ ଟ୍ରକ୍ ଭଙ୍ଗାରୁଜା କରି ଡ୍ରାଇଭରକୁ ମାଡ଼ ମାରିଥିବା ଦେଖିବାକୁ ମିଳିଛି । ଏହି ସମୟରେ ଟ୍ରାଫିକ ପୋଲିସ କଣ କରୁଥିଲେ ବୋଲି ପ୍ରଶ୍ନ କରିଛନ୍ତି ସାଧାରଣ ଲୋକ । ମହତାବ ରୋଡ୍‌ସ୍ଥିତ ଏକ ଟ୍ରାନ୍ସପୋର୍ଟରେ ମାଲ ଖାଲି କରି ଫେରିବା ସମୟରେ ଏହି ଦୁର୍ଘଟଣା ଘଟିଥିଲା । ସାଇକେଲରେ ଯାଉଥିବା କଟକ ଭଗତପୁର ଅଞ୍ଚଳର ପ୍ରମୋଦ କୁମାର ମଲ୍ଲିକଙ୍କ ଉପରେ ଟ୍ରକ୍ ଚଢ଼ି ଯାଇଥିଲା । ଯାହା ଫଳରେ ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା । ଦୁର୍ଘଟଣା ପରେ ସ୍ଥାନୀୟ ଅଞ୍ଚଳରେ ପ୍ରବଳ ଉତ୍ତେଜନା ଦେଖାଦେବା ସହ ଲୋକେ ଟ୍ରକ୍ ଭଙ୍ଗାରୁଜା କରିଥିଲେ । ଏଭଳି କି ଟ୍ରକ୍ ଚାଳକକୁ ମଧ୍ୟ ମାଡ଼ ମାରିଥିଲେ । 

ଖବର ପାଇ ଘଟଣାସ୍ଥଳରେ ପୋଲିସର ବରିଷ୍ଠ ଅଧିକାରୀ ପହଞ୍ଚିଥିଲେ । ଟ୍ରାଫିକ ପୋଲିସ ସାଧାରଣ ଲୋକଙ୍କ ନମ୍ବର ପ୍ଲେଟ୍‌ର ଫଟୋ ଉଠାଇ ଫାଇନ କାଟୁଥିବା ବେଳେ ଟଙ୍କା ନେଇ ନୋ ଏଣ୍ଟ୍ରି ସମୟରେ ମଧ୍ୟ ଭାରିଯାନ ଓ ଟ୍ରକ୍ ସବୁ ଛାଡ଼ୁଥିବାରୁ ଏଭଳି ଦୁର୍ଘଟଣା ଘଟୁଥିବା ସାଧାରଣ ଲୋକ ଅଭିଯୋଗ କରିଛନ୍ତି । ସକାଳ ୬ଟା ରୁ ରାତି ୧୦ଟା ଭିତରେ ସହର ଭିତରକୁ କୌଣସି ଭାରିଯାନ ପଶିବାର ଅନୁମତି ନାହିଁ । ସହରରେ ବାରମ୍ବାର ଦୁର୍ଘଟଣା ଘଟିବା ପରେ କମିଶନରେଟ୍ ଟ୍ରାଫିକ ପୋଲିସ ପକ୍ଷରୁ ଏଭଳି କଟକଣା ଲଗାଯାଇଥିଲା । ହେଲେ ସେହି ଟ୍ରାଫିକ କର୍ମଚାରୀ ହିଁ ନିୟମକୁ ଫୁ କରି ଚୁପ ବସିଯାଇଛନ୍ତି । ଯାହାଫଳରେ ସୋମବାର ରାତିରେ ଏହି ଦୁର୍ଘଟଣା ଘଟିଥିଲା । 

ଅନ୍ୟପଟେ ଖରା ଦିନ ଥିବାରୁ ଲୋକ ଦିନରେ ବାହାରକୁ ଯିବା ପରିବର୍ତ୍ତେ ଅଧିକାଂଶ ଲୋକ ରାତିରେ ବଜାର ଯାଉଛନ୍ତି । ସେଥିପାଇଁ ବିଳମ୍ବିତ ରାତି ପର୍ଯ୍ୟନ୍ତ ମାର୍କେଟରେ ଗହଳି ଚହଳି ରହୁଛି । ତେଣୁ ରାତିରେ ଅଧିକ ଟ୍ରାଫିକ ବ୍ୟବସ୍ଥା କରିବା ସହ ରାତି ୧୦ଟା ଯାଏଁ ଥିବା ନୋ ଏଣ୍ଟ୍ରି ନିୟମକୁ ବଢ଼ାଯାଉ ବୋଲି କଟକ ବାସିନ୍ଦା କହିଛନ୍ତି । ସେପଟେ ଟ୍ରାଫିକ ଏସିପିଙ୍କ ପକ୍ଷରୁ ସଫେଇ ରଖାଯାଇଛି କି ଟ୍ରକ୍‌ଟି ରାତି ୧୦ଟା ପରେ ଦୁର୍ଘଟଣା ଘଟାଇଛି । ଯେଉଁ ଟ୍ରାଫିକ୍ କର୍ମଚାରୀମାନେ ନିୟମ ଉଲଙ୍ଘନ କରି ନୋ ଏଣ୍ଟ୍ରି ବେଳେ ଟ୍ରକ୍ ଛାଡ଼ୁଥିବେ, ଏନେଇ ଅଭିଯୋଗ ଆସିଲେ ଉକ୍ତ ଟ୍ରାଫିକ୍ କର୍ମଚାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି ।