ନୂଆଦିଲ୍ଲୀ: ପ୍ରବାସୀ ମାନଙ୍କୁ ନେଇ ଯାଉଥିବା ଏକ ଡଙ୍ଗା ୟେମେନ ଉପକୂଳରେ ବୁଡ଼ିଯାଇଛି । ଏହି ଦୁର୍ଘଟଣାରେ ୪୯ ଜଣଙ୍କର ମୃତ୍ୟୁ ଘଟିଥିବା ବେଳେ ୧୪୦ ଜଣ ନିଖୋଜ ହୋଇଯାଇଛନ୍ତି । ମିଳିତ ଜାତିସଂଘର ଅନ୍ତର୍ଜାତୀୟ ପ୍ରବାସୀ ସଂଗଠନ(IOM) ମଙ୍ଗଳବାର ଏହି ସୂଚନା ଦେଇଛି ।

ଆଇଓଏମ୍ ଏକ ବିବୃତ୍ତିରେ କହିଛି ଯେ, ଏହି ଡଙ୍ଗାଟି ସୋମାଲିଆର ଉତ୍ତର ଉପକୂଳଠାରୁ ପ୍ରାୟ ୩୨୦ କିଲୋମିଟର ଦୂରରେ ପ୍ରାୟ ୨୬୦ ଜଣ ସୋମାଲିୟ ଏବଂ ଇଥିଓପିଆର ଲୋକଙ୍କୁ ନେଇ ଯାଉଥିଲା । କିନ୍ତୁ ଏହା ୟେମେନର ଦକ୍ଷିଣ ଉପକୂଳରେ ବୁଡ଼ିଗଲା ।

ସୂଚନା ଅନୁଯାୟୀ,ନିଖୋଜ ଲୋକଙ୍କ ପାଇଁ ସର୍ଚ୍ଚ ଅପରେସନ ଜାରି ରହିଛି ଏବଂ ଏପର୍ଯ୍ୟନ୍ତ ୭୧ ଜଣଙ୍କୁ ଉଦ୍ଧାର କରାଯାଇଛି । ମୃତକଙ୍କ ମଧ୍ୟରେ ୩୧ ଜଣ ମହିଳା ଏବଂ ୬ ଜଣ ଶିଶୁ ଅଛନ୍ତି । ପୂର୍ବ ଆଫ୍ରିକା ଏବଂ ଆଫ୍ରିକାର ହର୍ନରୁ ଆସୁଥିବା ପ୍ରବାସୀ ମାନଙ୍କ ପାଇଁ ୟେମେନ ଏକ ପ୍ରମୁଖ ଗମନାଗମନ ମାର୍ଗ, ଯାହାକି କାମ ପାଇଁ ଗଲ୍ଫ ଦେଶମାନଙ୍କରେ ପହଞ୍ଚିବାକୁ ଚେଷ୍ଟା କରେ । ଗତ ମାସରେ ଆଇଓଏମ୍ କହିଛି ଯେ, ୟେମେନରେ ପ୍ରାୟ ଏକ ଦଶନ୍ଧି ଧରି ଚାଲିଥିବା ଗୃହଯୁଦ୍ଧ ସତ୍ତ୍ବେ ବାର୍ଷିକ ଆସୁଥିବା ପ୍ରବାସୀଙ୍କ ସଂଖ୍ୟା ୨୦୨୧ ରୁ ୨୦୨୩ ମଧ୍ୟରେ ତିନିଗୁଣ ବୃଦ୍ଧି ପାଇଛି ।