ଚନ୍ଦ୍ରଶେଖରପୁର, ୨୫।୯: ମୋମୋ ଦୋକାନକୁ ଜଣେ ଯୁବତୀ ଆସିଲେ । ୨ ପ୍ଲେଟ୍ ଖାଇଲେ, ୨ ପ୍ଲେଟ୍ ପାର୍ସଲ ବାନ୍ଧିଲେ । କ୍ୟାସ୍ ନଥିବାରୁ ଫୋନ୍ ପେ ଜରିଆରେ ଟଙ୍କା ଦେବାକୁ କହିଲେ । ବାରକୋର୍ଡ ସ୍କାନରରେ ସ୍କାନ କଲେ । ଭିଡ଼ ସୁଯୋଗରେ ପଳାଇଗଲେ । ଏପଟେ ଆକାଉଣ୍ଟକୁ ଟଙ୍କା ନଆସିଥିବା ଜାଣି ଦୋକାନୀ ପିଛା କରି ଅଧା ବାଟରେ ଯୁବତୀଙ୍କୁ ଧରି ପକାଇଲେ । ତା’ପରେ ଯୁବତୀଙ୍କ ଅକଲଗୁଡୁମ୍ । ଏମିତି ଏକ ରୋଚକ ଘଟଣା ଦେଖିବାକୁ ମିଳିଛି ଇନଫୋସିଟି-ପଟିଆ ରାସ୍ତାରେ । ମଙ୍ଗଳବାର ଅପରାହ୍ଣ ୫ଟା ହେବ ।
ଶୈଳଶ୍ରୀ ବିହାର ରଙ୍ଗେଶ୍ୱର ନଗର ପଟୁ ଜଣେ ଯୁବତୀ ଇନଫୋସିଟି ରାସ୍ତା କଡ଼ରେ ଥିବା ଏକ ମୋମୋ ଦୋକାନକୁ ଆସିଥିଲେ । ଦୋକାନୀଙ୍କୁ କେଉଁ କେଉଁ ମୋମୋ ଅଛି ପଚାରିଥିଲେ । ଭେଜ୍, ପନିର,ଚିକେନ୍ ଓ କେଏଫ୍ସି ମୋମୋ ଅଛି ବୋଲି ଦୋକାନୀ ଜଣଙ୍କ କହିଥିଲେ । ମଙ୍ଗଳବାର ଥିବାରୁ ପ୍ରଥମେ ପନିର ମୋମୋ ଅର୍ଡର କରିଥିଲେ । ଖାଇବା ସାରିବା ପରେ ଆଉ ଏକ ପ୍ଲେଟ୍ କେଏଫ୍ସି ମୋମୋ ଅର୍ଡର କରିଥିଲେ । ମୋମୋ ଭଲ ହୋଇଥିବା ତାରିଫ କରି ୨ ପ୍ଲେଟ୍ ପନିର ମୋମୋ ପାର୍ସଲ କରିବାକୁ କହିଥିଲେ । ଦୋକାନୀ ଗରମ ଗରମ ମୋମୋ ପଲିଥିନରେ ଭର୍ତ୍ତି କରି ଦେଇଥିଲେ । ଖାଇବା ଓ ପାର୍ସଲ ବାବଦକୁ ମୋଟ୍ ୧୫୦ ଟଙ୍କା ହୋଇଥିଲା । ଏହି ସମୟରେ ଯୁବତୀ ଦୋକାନୀଙ୍କୁ କହିଥିଲେ ପାଖରେ କ୍ୟାସ ନାହିଁ ଫୋନ୍ ପେ’ରେ ଟଙ୍କା ଟଙ୍କା ଦେବେ । ଦୋକାନୀ ତାଙ୍କୁ ଏକ ସ୍କାନର ଦେଖାଇଥିଲେ । ସେ ସେଥିରେ ସ୍କାନ କରିଥିଲେ । ମିଛ ସ୍କ୍ରିନ୍ ସଟ୍ ଦେଖାଇ ଟଙ୍କା ଯାଇଥିବା କହିଥିଲେ ।
ଏହି ସମୟରେ ଅନ୍ୟ ୫ ଜଣ ଛାତ୍ରଛାତ୍ରୀ ଖାଇବାକୁ ଆସିଥିଲେ । ଏହି ସୁଯୋଗରେ ଯୁବତୀ ସେଠାରୁ ଚମ୍ପଟ ମାରିଥିଲେ । ଦୋକାନୀଙ୍କ ମନରେ ସନ୍ଦେହ ହୋଇଥିଲା । ସେ ମୋବାଇଲ ଦେଖିବା ପରେ ଜାଣିବାକୁ ପାଇଥିଲେ ଆକାଉଣ୍ଟକୁ ଟଙ୍କା ଆସିନାହିଁ । ପାଖ ଦୋକାନୀଙ୍କୁ ସେଠାରେ ଠିଆ କରି ଯୁବତୀଙ୍କ ପିଛା କରିଥିଲେ । ସିପେଟ୍ କଲେଜ ନିକଟରେ ତାଙ୍କୁ ଅଟକାଇଥିଲେ । ଫୋନ୍ ପେ ରେ ଟଙ୍କା ଆସିନାହିଁ, ତୁରନ୍ତ ଟଙ୍କା ଦିଅ ବୋଲି ଦୋକାନୀ କହିଥିଲେ । ଟଙ୍କା ନଦେଲେ ପୁଲିସକୁ ଡାକିବେ ବୋଲି ଦୋକାନୀ ଜଣଙ୍କ କହିଥିଲେ । ଏହା ଦେଖି ସେହି ବାଟ ଦେଇ ଯାଉଥିବା କିଛି ଲୋକ ଅଟକି ଯାଇଥିଲେ । ଭିଡ଼ ଦେଖି ନିଜ ଭୁଲ ମାନିଥିଲେ ଯୁବତୀ । ହଷ୍ଟେଲରୁ ତାଙ୍କର ଜଣେ ବାନ୍ଧବୀଙ୍କ ପାଖରୁ ଟଙ୍କା ଆଣି ମୋମୋ ଦୋକାନୀଙ୍କୁ ଦେଇଥିଲେ ।
