ମୁମ୍ବାଇ ୨୦/୦୪: ଦୁର୍ଘଟଣାର ଶିକାର ହୋଇଛନ୍ତି ଲୋକପ୍ରିୟ ଟେଲିଭିଜନ୍ ଅଭିନେତ୍ରୀ ଦିବ୍ୟଙ୍କା ତ୍ରିପାଠୀ । ଉଚ୍ଚରୁ ପଡ଼ି ତାଙ୍କ ବାହୁର ଦୁଇଟି ହାଡ଼ ଭାଙ୍ଗିଯାଇଛି । ସେଥିପାଇଁ ସଙ୍ଗେସଙ୍ଗେ ତାଙ୍କର ସର୍ଜରି କରିବାକୁ ପଡ଼ିଛି । ତାଙ୍କ ସ୍ୱାମୀ ବିବେକ ଦହିୟା ଇନ୍ଷ୍ଟାଗ୍ରାମ୍ ପୋଷ୍ଟ୍ ମାଧ୍ୟମରେ ଏ ବିଷୟରେ ଜଣାଇଛନ୍ତି । ପ୍ରଶଂସକଙ୍କ ଭଲପାଇବା ଓ ସ୍ନେହ ଯୋଗୁ ସେ ଖୁବ୍ଶୀଘ୍ର ଭଲ ହୋଇଯିବେ ବୋଲି ବିବେକ କହିଛନ୍ତି । କିଛି ମାସ ତଳେ ଦିବ୍ୟଙ୍କାଙ୍କର ଲିଗାମେଣ୍ଟ୍ ସର୍ଜରି ହୋଇଥିଲା । ଏ ବିଷୟରେ ମଧ୍ୟ ସେ ସୋସିଆଲ ମିଡିଆରେ ସେ ସୂଚନା ଦେଇଥିଲେ । ସର୍ଜରି ହେବା ପରଠୁ ସୁସ୍ଥ ହେବା ପର୍ଯ୍ୟନ୍ତର ଯାତ୍ରା ସେ ନିକଟରେ ଶେୟାର କରିଥିଲେ ।
ଟେଲିଭିଜନ୍ର ଶୀର୍ଷ ଅଭିନେତ୍ରୀ ତାଲିକାରେ ଦିବ୍ୟଙ୍କାଙ୍କ ନାଁ ରହିଛି । ‘ୟେ ହୈ ମୋହବତେଁ’, ‘ବନୁ ମେଁ ତେରି ଦୁଲହନ୍’, ‘ଚିଣ୍ଟୁ ଚିଙ୍କି ଔର୍ ଏକ ବଡ଼ି ସି ଲଭ୍ ଷ୍ଟୋରୀ’ ଭଳି ଅନେକ ଧାରାବାହିକରେ ସେ ମୁଖ୍ୟ ଭୂମିକା ନିର୍ବାହ କରିଛନ୍ତି । ଏବେ ସେ ୱେବ୍ ସିରିଜ୍ ‘ଅଦୃଶ୍ୟମ୍’ରେ ନଜର ଆସୁଛନ୍ତି । ଏଥିରେ ସେ ଇନ୍ସପେକ୍ଟର ପାର୍ବତୀ ସେହଗଲ ଭୂମିକା ନିର୍ବାହ କରୁଛନ୍ତି ।