ଭୁବନେଶ୍ୱର, ୨୦/୦୯: ଆର୍ମି ମେଜର ଗୁରୁବଂଶ ସିଂ ଓ ତାଙ୍କ ବାନ୍ଧବୀ ଅଙ୍କିତାଙ୍କୁ ନିର୍ଯାତନା ଦେବା ଘଟଣା ଦିନକୁ ଦିନ ଅଧିକରୁ ଅଧିକ ବିବାଦୀୟ ହେଉଛି । ଯେଉଁ ରୋଡ୍ ରୋମିଓଙ୍କ ପାଇଁ ଏତେ କାଣ୍ଡ ଘଟିଲା ସେମାନଙ୍କ ବିରୋଧରେ ମାମଲା ରୁଜୁ କରି ତୁରନ୍ତ ଗିରଫ କରିବାକୁ ନିର୍ଦ୍ଦେଶ ଦେଇଛନ୍ତି ଡିଜିପି ୱାଇ.ବି ଖୁରାନିଆ ।
ଆର୍ମୀ ଅଫିସର ଗୁରୁବଂଶ ସିଂ ଓ ତାଙ୍କ ବାନ୍ଧବୀ ଅଙ୍କିତା ଗତ ଶନିବାର ରାତିରେ ପଟିଆରୁ ଭରତପୁରକୁ ଆସୁଥିଲେ । ମଝି ରାସ୍ତାରେ ୨ଟି କାର୍କୁ ସେ ଓଭରଟେକ୍ କରିଥିଲେ । କାର୍ରେ ଥିବା ଯୁବକମାନେ ଆର୍ମି ଅଫିସର ଓ ତାଙ୍କ ବାନ୍ଧବୀଙ୍କୁ ଅଟକାଇ ଦୁର୍ବ୍ୟବହାର କରିଥିଲେ। ଏନେଇ ଭରତପୁର ଥାନାକୁ ଅଭିଯୋଗ କରିବାକୁ ଆସିଥିଲେ ଆର୍ମି ଅଫିସର ଗୁରୁବଂଶ ଓ ଅଙ୍କିତା । ତେବେ ସେଠାରେ ଉଭୟଙ୍କୁ ପୁଲିସ ନିର୍ଯାତନା ଦେଇଥିବା ସେମାନେ ଅଭିଯୋଗ କରିଥିଲେ ।
ଏହାରି ଭିତରେ ପୁଲିସ୍ ଭୁଲି ଯାଇଥିଲା ରୋଡ୍ ରୋମିଓଙ୍କ ଆତଙ୍କରାଜ । ଡିଜିପି ଶ୍ରୀ ଖୁରାନିଆ ଭୁବନେଶ୍ୱର ଡିସିପି ପ୍ରତୀକ ସିଂହଙ୍କୁ ନିର୍ଦ୍ଦେଶ ଦେଇଛନ୍ତି ତୁରନ୍ତ ମାମଲା ରୁଜୁ କରି ଅଭିଯୁକ୍ତଙ୍କୁ ଗିରଫ କରିବାକୁ । ପୁଲିସ୍ ମାମଲା ରୁଜୁ କରି ତୁରନ୍ତ ସେମାନଙ୍କୁ ଧରିବାକୁ ବିଭିନ୍ନ ଆଡେ ଚଢ଼ଉ ଜାରି ରଖିଛି । ତେବେ ଅଙ୍କିତା ଏମ୍ସରୁ ଡିସଚାର୍ଜ ହେବା ପରେ ଥାନାରେ ହୋଇଥିବା ନିର୍ଯାତନା କାହାଣୀକୁ ଦୋହରାଇଛନ୍ତି । ସେପଟେ ପୁରା ଘଟଣାର ରିପୋର୍ଟ ତଲବ କରିଛନ୍ତି ନ୍ୟାସ୍ନାଲ୍ କମିଶନ ଫର ଓମେନ୍ (ଏନ୍ସିଡବ୍ଲ୍ୟୁ) । ତୁରନ୍ତ ରିପୋର୍ଟ ଦେବାକୁ କ୍ରାଇମ୍ବ୍ରଞ୍ଚକୁ କୁହାଯାଇଛି ।
