ଯୋଧପୁର – ଯୌନ ନିର୍ଯାତନା ମାମଲାରେ ଆଜୀବନ କାରାଦଣ୍ଡର ସଜା କାଟୁଥିବା ଆଶାରାମ ବାପୁଙ୍କୁ ମିଳିଲା ଆଶ୍ୱସ୍ତି। ରାଜସ୍ଥାନ ହାଇକୋର୍ଟ ତାଙ୍କୁ ଚିକିତ୍ସା ପାଇଁ ୭ ଦିନର ପାରୋଲ ମଞ୍ଜୁର କରିଛନ୍ତି। ସେ ପୁଲିସ କଷ୍ଟଡିରେ ଚିକିତ୍ସା ପାଇଁ ମହାରାଷ୍ଟ୍ର ଯିବେ। ରାଜସ୍ଥାନ ହାଇକୋର୍ଟଙ୍କ ବିଚାରପତି ଜଷ୍ଟିସ୍‌ ପୁଷ୍ପେନ୍ଦ୍ର ସିଂହ ଭାଟିଙ୍କ ଖଣ୍ଡପୀଠ ତାଙ୍କର ଅନ୍ତରୀଣ ପାରୋଲକୁ ମଞ୍ଜୁର ଦେଇଛନ୍ତି। ଯୋଧପୁର ସେଣ୍ଟ୍ରାଲ ଜେଲ୍‌ରେ ଆଜୀବନ କାରାଦଣ୍ଡର ସଜା କାଟୁଥିବା ଆଶାରାମ ବାପୁଙ୍କର ଏହି ଭିତରେ ହଠାତ୍‌ ସ୍ୱାସ୍ଥ୍ୟ ଖରାପ ହୋଇ ଯାଇଥିଲା। 

ସେ ଛାତିରେ ଯନ୍ତ୍ରଣା ଅନୁଭବ କରିଥିଲେ , ଏହାପରେ ଜିଲ୍ଲା ପ୍ରଶାସନ ତାଙ୍କୁ ଯୋଧପୁର ଏମ୍ସରେ ଭର୍ତ୍ତି କରାଇ ଥିଲେ। ଏଠାରେ ମେଡିକାଲ ଚେକଅପ୍‌ ପରେ ତାଙ୍କୁ ଚିକିତ୍ସା ପାଇଁ ଭର୍ତ୍ତି କରାଯାଇ ଥିଲା। ଆଶାରାମଙ୍କ ସ୍ୱାସ୍ଥ୍ୟ ଖରାପ ହେବା ଓ ଯୋଧପୁର ଏମ୍ସରେ ଭର୍ତ୍ତି ହେବା ଖବର ସାର୍ବଜନିକ ହେବା କ୍ଷଣି , ହସ୍ପିଟାଲ ବାହାରେ ତାଙ୍କ ସମର୍ଥକଙ୍କ ଭିଡ଼ି ଲାଗି ଯାଇଥିଲା। ଆଶାରାମ ବାପୁଙ୍କୁ ୨୦୧୮ରେ ଯୋଧପୁରର ଏକ ସ୍ୱତନ୍ତ୍ର ପୋକ୍ସୋ କୋର୍ଟ ନାବାଳିକାଙ୍କ ସହ ଦୁଷ୍କର୍ମ ନେଇ ଦୋଷୀ ସାବ୍ୟସ୍ତ କରିଥିଲେ ଏବଂ ଆଜୀବନ କାରାଦଣ୍ଡର ସଜା ଶୁଣାଇ ଥିଲେ। 

ଉଲ୍ଲେଖନୀୟ ଯେ, ଆଶାରାମ ୨ ସେପ୍ଟମ୍ୱର ୨୦୧୩ରୁ ଜେଲ୍‌ରେ ଅଛନ୍ତି। ନାବାଳିକା ନିଜ ଏତଲାରେ ଅଭିଯୋଗ କରିଥିଲେ କି, ୧୫ ଅଗଷ୍ଟ, ୨୦୧୩ ରାତିରେ ଆଶାରାମ ତାଙ୍କୁ ଯୋଧପୁର ନିକଟ ମଣାଇ ସ୍ଥିତ ନିଜର ଆଶ୍ରମକୁ ଡ଼ାକି ତାଙ୍କ ସହ ଦୁଷ୍କର୍ମ କରିଥିଲେ। ୫ବର୍ଷରୁ ଅଧିକ ସମୟ ଧରି ଚାଲିଥିଲା ଟ୍ରାୟଲ ପରେ ପକ୍ସୋ କୋର୍ଟ ଆଶାରାମଙ୍କୁ ଦୋଷୀ ସାବ୍ୟସ୍ତ କରିଥିଲେ ଏବଂ ଆଜୀବନ କାରାଦଣ୍ଡର ସଜା ଶୁଣାଇ ଥିଲେ।