ଲାହୋର,୦୯/୦୯: ଚଳିତ ଏସିଆ କପ୍ର ସୁପର-୪ ରାଉଣ୍ଡରେ ଶନିବାର ଶ୍ରୀଲଙ୍କା ଓ ବାଂଲାଦେଶ ପରସ୍ପରକୁ ଭେଟିବେ । ପୂର୍ବରୁ ଲିଗ୍ ପର୍ଯ୍ୟାୟରେ ଉଭୟ ଦଳ ପରସ୍ପରକୁ ଭେଟିସାରିଛନ୍ତି । ଶ୍ରୀଲଙ୍କା ଉକ୍ତ ମ୍ୟାଚ ଜିତିଥିଲା । ବର୍ତ୍ତମାନ ବାଂଲାଦେଶ ପ୍ରତିଶୋଧ ନେବାକୁ ପ୍ରୟାସ କରିବ । ସୁପର-୪ ରାଉଣ୍ଡ୍ରେ ବାଂଲାଦେଶ ଗୋଟିଏ ମ୍ୟାଚ୍ ଖେଳିସାରିଛି । ପାକିସ୍ତାନ ବିପକ୍ଷ ଉକ୍ତ ମ୍ୟାଚ୍ରେ ବାଂଲାଦେଶ ୭ ୱିକେଟ୍ରେ ପରାଜିତ ହୋଇଥିଲା ।
ସେମି ଫାଇନାଲ୍ରେ ପହଞ୍ଚିବାକୁ ହେଲେ ବାଂଲାଦେଶକୁ ଯଥା ସମ୍ଭବ ଶନିବାର ବିଜୟ ଧାରାକୁ ଫେରିବାକୁ ହେବ। ଘରୋଇ ଗ୍ରାଉଣ୍ଡ୍ରେ ଶ୍ରୀଲଙ୍କାର ପଲା ଭାରି ରହିବା ସ୍ୱାଭାବିକ୍ । ମାତ୍ର ଶ୍ରୀଲଙ୍କାକୁ ହରାଇବାର ଯଥେଷ୍ଟ କ୍ଷମତା ବାଂଲାଦେଶ ନିକଟରେ ରହିଛି । ଦଳର ବ୍ୟାଟିଂ ବିଭାଗ ସୁଦୃଢ । ସ୍ପିନ ବୋଲିଂ ବିଭାଗ ଶକ୍ତିଶାଳୀ । କେବଳ ଫିଲ୍ଡିଂ ଓ ପେସ୍ ବୋଲିଂକୁ ଶୃଙ୍ଖଳିତ କରିପାରିଲେ ବାଂଲାଦେଶକୁ କେହି ଅଟକାଇ ପାରିବେ ନାହିଁ । ସାକିବ ଅଲ୍-ହାସନ ଓ ମୁସଫିକର ରହିମଙ୍କ ଉପରେ ବ୍ୟାଟିଂ ବିଭାଗ ନିର୍ଭର କରିବ । ସୁସ୍ଥ ହୋଇ ଫେରିଥିବା ଲିଟନ ଦାସ ଲୟ ଫେରି ପାଇଛନ୍ତି ।
ଶନିବାର ତାଙ୍କ ବ୍ୟାଟରୁ ଏକ ବଡ଼ ଇନିଂସ ଆଶା କରାଯାଉଛି । ଶ୍ରୀଲଙ୍କା କ୍ରମାନ୍ୱୟରେ ୧୨ଟି ଦିନିକିଆ ଜିତି ସାରିଛି । ବାଂଲାଦେଶକୁ ହରାଇ ଦ୍ୱିତୀୟ ସର୍ବାଧିକ ବିଜୟ ରେକର୍ଡ କରିବାକୁ ପ୍ରୟାସ କରିବ । ଦିନିକିଆ କ୍ରିକେଟ୍ରେ କ୍ରମାନ୍ୱୟରେ ସର୍ବାଧିକ ମ୍ୟାଚ୍ ବିଜୟ ରେକର୍ଡ ଅଷ୍ଟ୍ରେଲିଆ ନାମରେ ରହିଛି । ୨୦୦୩ରେ ଅଷ୍ଟ୍ରେଲିଅ ଦଳ କ୍ରମାନ୍ୱୟରେ ୨୧ଟି ଦିନିକିଆ ଜିତିଥିଲା । ପାକିସ୍ତାନ ଓ ଦକ୍ଷିଣ ଆଫ୍ରିକା ମଧ୍ୟ କ୍ରମାନ୍ୱୟରେ ୧୨ଟି ଲେଖାଏଁ ଦିନିକିଆ ଜିତିଛନ୍ତି ।
ପିଚ୍: ପାଲେକେଲ ତୁଳନାରେ ପ୍ରେମଦାସା ଷ୍ଟାଡିୟମ୍ର ପିଚ୍ ସାଧାରଣତଃ ମନ୍ଥର । ସ୍ପିନରମାନେ ଏହି ପିଚ୍ର ଫାଇଦା ଉଠାଇବା ଏକ ପ୍ରକାର ନିଶ୍ଚିତ । ବ୍ୟାଟିଂ ପାଇଁ ମଧ୍ୟ ପିଚ୍ ଅନୁକୂଳ ରହିବ । ଫଳରେ ଟସ୍ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେଇପାରନ୍ତି । ଆସନ୍ତା କାଲି ବର୍ଷା ମ୍ୟାଚ୍ରେ ବାଧକ ସାଜିପାରେ । ୬୮ପ୍ରତିଶତ ବର୍ଷା ହେବ ବୋଲି ପାଣିପାଗ ବିଭାଗ ଆକଳନ କରିଛି ।
