ଭୁବନେଶ୍ୱର,୧୨/୦୪: କମିଶନରେଟ୍ ପୁଲିସ୍ ଭୁବନେଶ୍ୱର ୟୁପିଡିରେ ଚୋରମାନେ ଆତଙ୍କ ଖେଳାଇଛନ୍ତି । ପୁଲିସ୍କୁ ବି ଖାତିର କରୁନାହାନ୍ତି । ଥାନା ଭିତରୁ ଚୋରି କରିବାକୁ ବି ପଛାଉ ନାହାନ୍ତି । ଗତକାଲି ଭରତପୁର ଥାନା ପରିସରରୁ ଦୁର୍ଘଟଣା ମାମଲାରେ ଜବତ ହୋଇଥିବା ଏକ ଅଟୋକୁ ଚୋରମାନେ ନେଇଯାଇଛନ୍ତି । ପୁଲିସ୍ କିଛି ଉପାୟ ନ ପାଇ (୨୪୨/୨୪)ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।
ଗତ ମାର୍ଚ୍ଚ ୧୧ ତାରିଖରେ ଭରତପୁର ଥାନାର ନୂତନ କୋଠା ଉଦ୍ଘାଟନ କରିଥିଲେ ମୁଖ୍ୟମନ୍ତ୍ରୀ । ପୁରୁଣା କୋଠାରୁ ନୂଆକୁ ଯିବାକୁ ୧୦ ଦିନ ସମୟ ଲାଗିଥିଲା । ତା’ପରେ ମଧ୍ୟ କିଛି କର୍ମଚାରୀ ପୁରୁଣା କୋଠାରେ ଡ୍ୟୁଟି କରୁଥିଲେ । କାରଣ ଥାନାର ମାଲ୍ଖାନାରେ ସବୁ ଜିନିଷ ରହିଛି । ଗତ ୯ ତାରିଖ ରାତିରେ କିଛି କର୍ମଚାରୀ ଡ୍ୟୁଟି କରୁଥିଲେ । ହେଲେ ଚୋରାନେ ଥାନା ପଛରେ ଥିବା ଏକ ଅଟୋ (ଓଡି୦୨ଇ୨୦୬୧) ନେଇ ପଳାଇଥିଲେ । ୧୦ ତାରିଖ ଦିନ ଘଟଣା ବିଷୟରେ ଜାଣିବାକୁ ପାଇଥିଲେ ଥାନା କର୍ମଚାରୀ । ବହୁ ଖୋଜାଖୋଜି କରିବା ପରେ ପୁଲିସ୍ ଗାଡ଼ିର ପତ୍ତା ପାଇ ନଥିଲା । ଶେଷରେ ଡ୍ୟୁଟିରେ ଥିବା ହୋମ୍ ଗାର୍ଡ ସନ୍ତୋଷ ମହାରାଣା ଥାନାରେ ଏତଲା ଦେଇଥିଲେ ।