ବାଲେଶ୍ୱର,୧୫/୦୪: ସବୁ କଳ୍ପନାଜଳ୍ପନାର ଅନ୍ତ ଘଟାଇ ଶେଷରେ କଂଗ୍ରେସ ବାଲେଶ୍ୱର ଲୋକସଭା ଆସନ ପାଇଁ ପ୍ରାର୍ଥୀ ଘୋଷଣା କରିଛି । ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନାଙ୍କୁ ଦଳ ପ୍ରାର୍ଥୀ କରିଛି । ଏହା ସହ ଏହି ନିର୍ବାଚନମଣ୍ଡଳୀ ପାଇଁ ତିନି ଦଳ ସେମାନଙ୍କ ପ୍ରାର୍ଥୀ ଘୋଷଣା କରିଛନ୍ତି । ନିର୍ବାଚନ ମଇଦାନ ପ୍ରସ୍ତୁତ ଥିବା ବେଳେ ଏଥର ଅଭିଜ୍ଞ ବନାମ ନୂଆ ମୁହଁଙ୍କ ମଧ୍ୟରେ ଲଢ଼େଇ ହେବ ।
ବାଲେଶ୍ୱର ଲୋକସଭା ଆସନ ପାଇଁ ସର୍ବପ୍ରଥମେ ବିଜେପି ପୂର୍ବତନ କେନ୍ଦ୍ରମନ୍ତ୍ରୀ ପ୍ରତାପ ଚନ୍ଦ୍ର ଷଡ଼ଙ୍ଗୀଙ୍କ ନାମ ଘୋଷଣା କରିଥିଲା । କିଛି ଦିନ ପରେ ବିଜେଡିରେ ମିଶିଥିବା ପୂର୍ବତନ ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାରଙ୍କ ନାମ ବିଜେଡି ଘୋଷଣା କରିଥିଲା । ତେବେ କଂଗ୍ରେସ ଶ୍ରୀକାନ୍ତ ଜେନାଙ୍କୁ ଲୋକସଭା ପ୍ରାର୍ଥୀ କରିବା ପରେ ଏଥର ଏହି ନିର୍ବାଚନ ଆସନରେ ତ୍ରିମୁଖୀ ପ୍ରତିଦ୍ୱନ୍ଦ୍ୱିତା ହେବା ନେଇ ଆଶା କରାଯାଉଛି ।
ଏହି ତିନି ପ୍ରାର୍ଥୀଙ୍କ ମଧ୍ୟରୁ ଉଭୟ ଶ୍ରୀ ଷଡ଼ଙ୍ଗୀ ଓ ଶ୍ରୀ ଜେନାଙ୍କ ପୂର୍ବରୁ ନିର୍ବାଚନ ଲଢ଼ିବା ନେଇ ବହୁ ଅଭିଜ୍ଞତା ଅଛି । ପୂର୍ବରୁ ଶ୍ରୀ ଷଡ଼ଙ୍ଗୀ ନୀଳଗିରିରେ ୨୦୦୪ରେ ବିଜେପି ଓ ବିଜେଡି ଟିକଟ, ୨୦୦୯ରେ ସ୍ୱାଧୀନ ଟିକଟରୁ ବିଧାୟକ ଭାବେ ନିର୍ବାଚିତ ହୋଇଥିଲେ । ୨୦୧୪ରେ ସେ ବାଲେଶ୍ୱର ଲୋକସଭା ଆସନରେ ନିର୍ବାଚନ ଲଢ଼ିଥିଲେ ହେଁ ବିଜେଡିର ରବୀନ୍ଦ୍ର ଜେନାଙ୍କ ନିକଟରୁ ପରାସ୍ତ ହୋଇଥିଲେ । ୨୦୧୯ରେ ପୁନଶ୍ଚ ବିଜେପି ଟିକଟରେ ନିର୍ବାଚନ ଲଢ଼ିବା ସହ ବିଜୟୀ ହୋଇଥିଲେ । ସେଥର ମୋଦି ସରକାରଙ୍କ ୨ୟ ପାଳିର ପ୍ରଥମ ଅଢ଼େଇ ବର୍ଷ ସେ ପ୍ରାଣୀ, ଗୋ-ସମ୍ପଦ, ମତ୍ସ୍ୟ, ଛୋଟ ଓ ମଧ୍ୟମ ଉଦ୍ୟୋଗ ବିଭାଗର ରାଷ୍ଟ୍ରମନ୍ତ୍ରୀ ଥିଲେ । ଏଥର ସେ ତୃତୀୟ ଥର ପାଇଁ ସାଂସଦ ଭାବେ ନିର୍ବାଚନ ଲଢ଼ୁଥିବାରୁ ସବୁ ନିର୍ବାଚନମଣ୍ଡଳୀରେ ତାଙ୍କ ସଙ୍ଗଠନ ଅଛି । ଏହି କାରଣରୁ ଏଥର ଭଲ ପ୍ରଦର୍ଶନ କରିବା ନେଇ ସେ ଲକ୍ଷ୍ୟ ରଖିଥିବା କହିଛନ୍ତି । ଗତ ୫ ବର୍ଷ ଧରି ଜିଲ୍ଲାରେ କରିଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟର ହିସାବ ନେଇ ଭୋଟରଙ୍କ ନିକଟକୁ ଯିବେ ବୋଲି ସେ ନିଜ ପ୍ରତିକ୍ରିୟାରେ କହିଛନ୍ତି ।
ଅପରପକ୍ଷରେ ଶ୍ରୀ ଜେନା ରାଜ୍ୟ ତଥା ଜାତୀୟ ରାଜନୀତିରେ ଜଣେ ଚିହ୍ନା ମୁହଁ । ପୂର୍ବରୁ ସେ ବିଭିନ୍ନ ବିଭାଗରେ କେନ୍ଦ୍ରମନ୍ତ୍ରୀ ଥିଲେ । ଏହା ବ୍ୟତୀତ ୧୯୭୭ରୁ ୧୯୮୯ ପର୍ଯ୍ୟନ୍ତ ବିଧାୟକ ଭାବେ ନିର୍ବାଚିତ ହୋଇଥିଲେ । ୧୯୭୯-୮୦ରେ ରାଷ୍ଟ୍ରମନ୍ତ୍ରୀ ମଧ୍ୟ ଥିଲେ । ଏହି ନିର୍ବାଚନକୁ ଲଗାଇ ଶ୍ରୀ ଜେନା ବାଲେଶ୍ୱର ଲୋକସଭା ଆସନରେ ତିନିଥର ନିର୍ବାଚନ ଲଢ଼ିବେ । ପୂର୍ବରୁ ୨ ଥର ନିର୍ବାଚନ ଲଢ଼ିଥିବାରୁ ବିଭିନ୍ନ ନିର୍ବାଚନ ମଣ୍ଡଳୀରେ ତାଙ୍କର ସଙ୍ଗଠନ ଅଛି । ବାଲେଶ୍ୱର ରାଜନୀତିରେ ଶ୍ରୀ ଜେନାଙ୍କ ପୂର୍ବ ଅଭିଜ୍ଞତା ଅଛି ।
ଏହି ଅଭିଜ୍ଞତାକୁ ଏଥର ସେ ନିର୍ବାଚନରେ ବ୍ୟବହାର କରିବେ ବୋଲି ଆଶା କରାଯାଉଛି । ନିର୍ବାଚନ ଉପରେ ପ୍ରତିକ୍ରିୟା ଦେଇ ଶ୍ରୀ ଜେନା ପୂର୍ବ ପ୍ରତିଶ୍ରୁତିକୁ ଦେହରାଇଛନ୍ତି । ବାଲେଶ୍ୱରବାସୀ ଦିଲ୍ଲୀ ପଠାଇଲେ³ ଦିଲ୍ଲୀକୁ ସେ ବାଲେଶ୍ୱରବାସୀଙ୍କ ନିକଟକୁ ଆଣିବେ ବୋଲି କହିଛନ୍ତି। କେନ୍ଦ୍ରମନ୍ତ୍ରୀ ଥିବା ବେଳେ ବାଲେଶ୍ୱରରେ ଯେଉଁ ଉନ୍ନୟନମୂଳକ କାର୍ଯ୍ୟ କରିଛନ୍ତି³ ତାହାକୁ ନେଇ ଲୋକଙ୍କ ନିକଟକୁ ଯିବେ ବୋଲି କହିଛନ୍ତି । ଏହି ଦୁଇ ଅଭିଜ୍ଞ ନେତାଙ୍କୁ ଟକ୍କର ଦେବା ପାଇଁ ବିଜେଡି ଏଥର ଶ୍ରୀମତୀ ସାମନ୍ତସିଂହାରଙ୍କୁ ପ୍ରାର୍ଥୀ କରିଛି । ପୂର୍ବରୁ ଶ୍ରୀମତୀ ସାମନ୍ତସିଂହାର ବିଜେପିର ମୁଖପାତ୍ର ସହ ରାଜ୍ୟ ଉପସଭାପତି ଥିଲେ । ମାତ୍ର ଅଣଦେଖାର ଶିକାର ହୋଇଥିବା ଅଭିଯୋଗ କରି ନିକଟରେ ସେ ବିଜେଡିରେ ମିଶିଥିଲେ ।
ବିଜେଡିରେ ମିଶିବା ପରେ ଦଳ ତାଙ୍କୁ ବାଲେଶ୍ୱରରେ ସାଂସଦ ପ୍ରାର୍ଥୀ କରିଛି । ଏହା ସହ ଦଳ ୩୩ ପ୍ରତିଶତ ମହିଳା କୋଟା ପୂରଣ କରିବା ସହ ମହିଳା କାର୍ଡ ମଧ୍ୟ ଖେଳିଛି । କିଛି ବର୍ଷ ହେବ ବିଜେଡି ‘ମାଆଙ୍କୁ ସମ୍ମାନ’ ନାରା ଦେଇ ଆସୁଛି । ଏଭଳି ସମୟରେ ଦଳ ଶ୍ରୀମତୀ ସାମନ୍ତସିଂହାରଙ୍କୁ ପ୍ରାର୍ଥୀ କରି ମହିଳା ସମର୍ଥନ ହାସଲ କରିବାକୁ ଲକ୍ଷ୍ୟ ରଖିଛି । ଶ୍ରୀମତୀ ସାମନ୍ତସିଂହାର ବାଲେଶ୍ୱରରେ ପ୍ରଥମ ଥର ନିର୍ବାଚନ ଲଢ଼ୁଛନ୍ତି । ଏହି କାରଣରୁ ଉକ୍ତ ନିର୍ବାଚନ ତାଙ୍କ ପାଇଁ ଏତେଟା ସହଜ ହେବନି ବୋଲି ଆଶା କରାଯାଉଛି। ତଥାପି ଏହି ଲୋକସଭା ଆସନ ଅଧୀନରେ ଥିବା ବିଭିନ୍ନ ବିଧାନସଭା ନିର୍ବାଚନ ମଣ୍ଡଳୀରେ ବିଜେଡିର ସ୍ଥିତି ଭଲ ଅଛି । ଦଳୀୟ ନେତାଙ୍କ ସହାୟତାରେ ସେ ନିର୍ବାଚନ ବୈତରଣୀ ପାର ହୋଇପାରନ୍ତି ବୋଲି ମଧ୍ୟ ଆଶା କରାଯାଉଛି । ଏହା ବ୍ୟତୀତ ସେ ବାଲେଶ୍ୱରର ବୋହୂ ହୋଇଥିବାରୁ କିଛି ସହାନୁଭୂତି ଭୋଟ ତାଙ୍କ ଖାତାକୁ ଯିବ ବୋଲି ରାଜନୈତିକ ସମୀକ୍ଷକମାନେ କହିଛନ୍ତି।
