ଢାକା,୧୩/୦୯: ଭାରତ ବିପକ୍ଷ ଆଗାମୀ ୨ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ପାଇଁ ବାଂଲାଦେଶ ଦଳ ଘୋଷଣା କରାଯାଇଛି । ଗତ ମାସରେ ପାକିସ୍ତାନକୁ ହରାଇଥିବା ଟେଷ୍ଟ ଦଳରୁ କେବଳ ଜଣେ ଖେଳାଳିଙ୍କୁ ବାଦ ଦିଆଯାଇଛି । ବାକି ଖେଳାଳି ଭାରତ ଗସ୍ତ ପାଇଁ ଘୋଷିତ ଦଳରେ ସ୍ଥାନ ବଜାୟ ରଖିଛନ୍ତି ।
ପାକିସ୍ତାନ ବିପକ୍ଷ ପ୍ରଥମ ଟେଷ୍ଟରେ ଆହତ ହୋଇଥିବା ପେସ୍ ବୋଲର ସରିଫୁଲ ଇସଲାମ ଫିଟ୍ ହୋଇ ନଥିବାରୁ ତାଙ୍କ ସ୍ଥାନରେ ବ୍ୟାଟର ଜାକର ଅଲିଙ୍କୁ ସ୍ଥାନ ମିଳିଛି । ଇତି ମଧ୍ୟରେ ୧୭ଟି ଟି-ଟ୍ୱେଣ୍ଟି ଖେଳିସାରିଥିବା ଜାକର ପ୍ରଥମ କରି ଟେଷ୍ଟ ଦଳରେ ସ୍ଥାନ ପାଇଛନ୍ତି । ଗତ ପାକିସ୍ତାନ ଏ’ ବିପକ୍ଷରେ ସେ ୧୭୪ ରନ୍ର ଏକ ଇନିଂସ ଖେଳିଥିଲେ । ଏହା ବ୍ୟତୀତ ପ୍ରଥମ ଶ୍ରେଣୀ କ୍ରିକେଟ୍ରେ ସେ ୪ଟି ଶତକ ଅର୍ଜନ କରିସାରିଛନ୍ତି । ଭାରତ ଗସ୍ତ ପାଇଁ ବାଂଲାଦେଶ ୪ଜଣ ପେସ ବୋଲରଙ୍କୁ ଦଳରେ ସ୍ଥାନ ଦେଇଛି । ସରିଫୁଲଙ୍କ ଅନୁପସ୍ଥିତିରେ ଟସ୍କିନ ଅହମ୍ମଦ, ନାହିଦ ରାଣା, ହାସାନ ମହମଦ ଓ ଖାଲିଦ ଅହମ୍ମଦ ପେସ୍ ବିଭାଗ ସମ୍ଭାଳିବେ ।
ସୂଚନାଯୋଗ୍ୟ, ୧୯ ତାରିଖରୁ ଚେନ୍ନାଇରେ ପ୍ରଥମ ଟେଷ୍ଟ ଆରମ୍ଭ ହେବ । ସେହିପରି ସେପ୍ଟେମ୍ବର ୨୭ରୁ ଅକ୍ଟୋବର ୧ ତାରିଖ ମଧ୍ୟରେ କାନପୁରରେ ଦ୍ୱିତୀୟ ଟେଷ୍ଟ ଖେଳାଯିବ ।
ଘୋଷିତ ଦଳ: ନଜମୁଲ ହୋସେନ ଶାନ୍ତୋ(ଅଧିନାୟକ), ସଦମନ ଇସଲାମ, ଜାକିର ହାସାନ, ମୋମିନୁଲ ହକ୍, ମୁସଫିକର ରହିମ, ସାକିବ ଅଲ ହାସନ, ଲିଟନ ଦାସ, ମେହଦି ହାସାନ ମିରାଜ, ଜାକର ଅଲି, ଟସ୍କିନ ଅହମ୍ମଦ, ହାସାନ ମହମୁଦ, ନାହିଦ ରାଣା, ତାଇଜୁଲ ଇସଲାମ, ମହମୁଦୁଲ ହାସାନ ଜୟ, ନୟିମ ହାସାନ, ଖାଲିଦ ଅହମ୍ମଦ ।
