ନୂଆଦିଲ୍ଲୀ,୦୯/୦୮: ବାଂଲାଦେଶରେ ରାଜନୈତିକ ସଂକଟ ଓ ହିଂସା ମଧ୍ୟରେ ପଡ଼ୋଶୀ ରାଷ୍ଟ୍ରରୁ ବହୁଳ ମାତ୍ରାରେ ବାଂଲାଦେଶୀ ଭାରତରେ ଅନୁପ୍ରବେଶ କରିବାକୁ ବସିଛନ୍ତି। ଭାରତ-ବାଂଲାଦେଶ ସୀମାରେ ଶତାଧିକ ଲୋକ ଏକତ୍ରିତ ହୋଇ ରହିଛନ୍ତି, ସେମାନଙ୍କୁ ଜିରୋ ପଏଣ୍ଟରେ ବିଏସ୍ଏଫ୍ ଜବାନ ମାନେ ଅଟକାଇ ରଖିଛନ୍ତି। ନ୍ୟୁଜ୍ ଏଜେନ୍ସି ଏଏନ୍ଆଇ ସୀମା ସେପାଖର ଭିଡିଓ ଜାରି କରିଛି। ଏଥିରେ ଦେଖିବାକୁ ମିଳିଛି ଯେ, ସୀମାନ୍ତ ରାସ୍ତା ଗୁଡ଼ିକ ବନ୍ଦ କରିଦିଆଯିବା କାରଣରୁ ବାଂଲାଦେଶୀ ନଦୀ ନାଳ ରାସ୍ତା ଦେଇ ଅନୁପ୍ରବେଶ କରିବାକୁ ଚେଷ୍ଟା କରୁଛନ୍ତି। ଅବଶ୍ୟ ବିଏସ୍ଏଫ୍ ଜବାନ ମାନେ, ବାଂଲାଦେଶୀଙ୍କ ଅନୁପ୍ରବେଶ ବେଳେ ସେମାନଙ୍କୁ ରୋକିଥିଲେ।
ପଶ୍ଚିମବଙ୍ଗ କୁଚ୍ଚବିହାରର ପଥରଟୁଲିର ଅଧିବାସୀ ଇକରାମୁଲ ହକ୍ ତମାମ ମାମଲାକୁ ନେଇ ଏଏନ୍ଆଇ ସହିତ ଆଲୋଚନା କରିଛନ୍ତି। ସେ କହିଛନ୍ତି ସକାଳ ୯.୦୦ ଟାରୁ ୯.୩୦ ମଧ୍ୟରେ କିଛି ବାଂଲାଦେଶୀ ସୀମାରେ ଏକତ୍ରିତ ହୋଇଥିଲେ। ସେମାନଙ୍କ ମଧ୍ୟରୁ ଅନେକ ଫେରିଯାଇଥିବା ବେଳେ ଅନେକ ସେଠାରେ ଏବେବି ଅଟକି ରହିଛନ୍ତି। ଭିଡ଼ ଆଗ ଅପେକ୍ଷା ଏବେ କମ୍ ରହିଛି। ବିଏସ୍ଏଫ୍ ଜବାନ ମାନଙ୍କର ଉପସ୍ଥିତି ଯୋଗୁ ଅନେକ ବାଂଲାଦେଶୀ ଗଳାବାଟ ଦେଇ ପ୍ରବେଶ କରିବାକୁ ଚେଷ୍ଟା କରୁଥିଲେ, କିନ୍ତୁ ସେମାନଙ୍କୁ ଅଟକାଯାଇଥିବା ବେଳେ ଅନ୍ୟମାନଙ୍କ ଉପରେ କଡ଼ା ନଜର ରଖାଯାଇଛି।
ସୂଚନାଥାଉକି, କେନ୍ଦ୍ର ସରକାର ପଡ଼ୋଶୀ ରାଷ୍ଟ୍ରର ବର୍ତ୍ତମାନର ସ୍ଥିତିକୁ ନଜରରେ ରଖି ଭାରତ-ବାଂଲାଦେଶ ସୀମାରେ ପରିସ୍ଥିତିକୁ ନଜରରେ ରଖିବା ପାଇଁ ଏକ ଉଚ୍ଚ ସ୍ଥରୀୟ କମିଟି ଗଠନ କରିଛନ୍ତି। ଗୃହମନ୍ତ୍ରୀ ଅମିତ ଶାହା ଏକ୍ସରେ କହିଛନ୍ତି ଯେ, ବଂଲାଦେଶର ସାମ୍ପ୍ରତିକ ପରିସ୍ଥିତିକୁ ନଜରରେ ରଖି ମୋଦୀ ସରକାର ଭାରତ-ବାଂଲାଦେଶ ସୀମାରେ ବର୍ତ୍ତମାନର ସ୍ଥିତିକୁ ନଜରରେ ରଖିବା ପାଇଁ ଏକ ଉଚ୍ଚସ୍ଥରୀୟ କମିଟି ଗଠନ କରିଛନ୍ତି। ଏହି କମିଟି ବାଂଲାଦେଶରେ ତାଙ୍କର ସମକକ୍ଷ ଅଧିକାରୀମାନଙ୍କ ସହିତ ସମ୍ପର୍କରେ ରହିବ, ଯଦ୍ଦ୍ବାରା ସେଠାରେ ଥିବା ଭାରତୀୟ ନାଗରିକ, ହିନ୍ଦୁ ଓ ଅନ୍ୟ ସଂଖ୍ୟାଲଘୁ ସମ୍ପ୍ରଦାୟଙ୍କ ସୁରକ୍ଷା ନିଶ୍ଚିତ କରିବ। କମିଟିର ଅଧ୍ୟକ୍ଷତା ସୀମା ସୁରକ୍ଷା ବଳର ପୂର୍ବତଟ ଅତିରିକ୍ତ ମହାନିର୍ଦ୍ଦେଶକ କରିବେ।
